Римо 14:1-23
14 Анда ди шон сама лэ манушэс, саво найсасто андо патяимос, и на́ сындон кодэлэс, ко гиндой най кадя, сар тумэ.
2 Ек патял, кай можэт тэ хал вся, ай ко найсасто андо патяимос, хал ек и овощи.
3 Кодэва, ко хал вся, на трэбуй тэ гиндой, кай во май лашо кодэлэстар, ко на хал вся. И кодэва, ко на хал вся, на трэбуй тэ сындой кодэлэс, ко хал вся. О Дэл анда ди шутя сама кадэлэ манушэс.
4 Ко ту кацаво, кай тэ сындос аврэстирэ слуӷос? Тердёла во или пэрэла, решый лэско хулай. И лэстэ вижала тэ тердёл, важ кода кай о Иегова* поможыя лэсти.
5 Варико гиндой, кай ек дес май важно аврэстар, ай варико гиндой — кай всаворэ деса еқэндар. Мэк кажно патял, кай во приля правильно решэния.
6 Кодэва, ко ритярэл варисаво дес, терэл када важ о Иегова. Кодэва, ко хал вся, терэл када важ о Иегова, важ кода кай блаӷодарно лэ Дэвлэсти. И кодэва, ко на хал вся, терэл када важ о Иегова и кадяжэ блаӷодарно лэ Дэвлэсти.
7 Нико андар мэндэ на жувэл кати важ пэстэ, и нико на мэрэл кати важ пэстэ.
8 Если амэ жувас — жувас важ о Иегова, и если мэрас — мэрас важ о Иегова. Важ када, или жувас амэ, или мэрас, амэ всаек прижас лэ Иеговасти.
9 Ай о Христос муля и жунделя, кай тэ авэл Баро Хулай и лэ мулэнго, и лэ жундэнго.
10 Тоди васо ту сындос тирэ ԥралэс? Или васо ту гиндос, кай май лашо пэстирэ ԥралэстар? Всаворэ амэ тердюваса англа Дэл по сындо.
11 Важ кода кай андэ пистромэ: «„Солахав пэр пэстэ, — ԥэнэн о Иегова, — всаворэ тердёна англа мандэ пэ чанга и всаворэ прижанэна, кай мэ Дэл“».
12 Ни акэ, о Дэл спушэла кажнонэстар па лэстири дила.
13 Важ када будэр на ласа тэ сындосарас ек еқэс. Фэдэр ласа тэ старысавас тэ на терас кода, через со о ԥрал можэт тэ змардёл па правильно дром или тэ стерэл бэзэх.
14 Сар лэ Барэ Хуласко лэ Исусоско ученико, мэ точно ӷанав: вся, со амэ хас, вужо. Но если важ о мануш исин варисо мэлало, тоди авелоп неправильно, кай во тэ хал када.
15 Если тирэ ԥралэсти ашэл ԥарэс по ди через кода, со ту хас, тоди ту на любис лэс. На́ домэк, кай через о хамос тэ змарэс па правильно дром кодэлэс, пала кастэ муля о Христос.
16 Ни акэ, на́ терэн кода, со па тумарятэ правильно, если авэр моӷут найдраго тэ дэн дума пала када.
17 Кай тэ попэрэс андэ лэ Дэвлэско Царство, на́ шув сама, со ту хас и пэс. Но шув сама пэ кода, кай тэ терэс правильно, тэ жувэс мирно аврэнца и тэ авэс лошало, и вся када авэла через о свынто зор.
18 Кажно, ко кадя терэл лэ Христостири дила, уӷодно лэ Дэвлэсти и затерэл лашо алав англа миро.
19 Важ када ласа тэ пристас вся о зор, кай тэ авэл мирно и кай тэ подритярас ек еқэс.
20 Хутила тэ римон лэ Дэвлэстири дила через о хамос. Па чачимастэ, тэ хан можно вся, но авелоп неправильно тэ хан о хамос, через саво варико можэт тэ змардёл па правильно дром.
21 Фэдэр тэ на хан мас, тэ на пэн вино и тэ на терэн нисо кацаво, через со о ԥрал можэт тэ змардёл па правильно дром.
22 Кода, андэр со ту патяс, мэк ашэлпэ машкар тутэ и машкар о Дэл. Бахтало кодэва, ко на дошалярэл корко пэс важ пэстири решэния.
23 Но если о мануш допутя на розляпэ и хал, тоди во ужэ дошало, важ кода кай во приля решэния, хоть на уӷангля, точно када правильно чи най. Ни акэ, если о мануш прилэл решэния, но май данглал на уӷанэн, правильно када чи най, тоди во терэл бэзэх.
