Свынто тайна 22:1-21
22 О анӷело сыкадя манди и лэн лэ паеса, саво дэл жызня. Кадэва паи сас вужо сар ясвин. Кадэя лэн жалас лэ Дэвлэстирэ и лэ Бакрорэстирэ троностар
2 и питялас па лэ форостири ӷлавно вулица. Па лэдуй ла лэнатирэ рига барёнас витки, савэ дэн жызня. Кадэла витки анэнас урожаё кажно шон, 12 разоря андо бэрш. И листоря па кадэла витки — важ кода, кай тэ исцэлинпэ и народоря.
3 О Дэл никала на видэла амрая кадэва форо. Андэр лэстэ лэла тэ тердёл лэ Дэвлэско и лэ Бакрорэско троно, и лэ Дэвлэстирэ раборя лэна тэ терэн лэстири дила.
4 Вонэ диқэна лэско муй, и лэндэ по чикат авэла пистромэ лэско алав.
5 Котэ на авэла и рят, и лэнди на трэбуй авэла ни и лампа, ни о свето лэ қамэстар, важ кода кай о Дэл о Иегова* лэла тэ светий лэнди, и вонэ лэна тэ правин сар царёря о вико вечно.
6 Во ԥэндя манди: «Кадэла алава чачунэ и лэнди исин патяимос. О Иегова, о Дэл, саво дэл дума через пэстирэ особи мануша, бишалдя лэ анӷелос, кай тэ сыкавэл пэстирэ рабонэнди, со ӥто трэбуй тэ авэл.
7 Мэ ӥто авава! Бахтало кодэва, ко приритярдёл лэ дэвликунэ алавэнди, савэ пистромэ андэ кадэва лил».
8 Мэ, о Иоа́но, ашундэм и диқлэм када. Кала мэ ашундэм и диқлэм вся, со сыкадя манди о анӷело, мэ пэлэм англа лэстэ пэ чанга и камлэм тэ тэлював лэсти.
9 Но во ԥэндя манди: «Най, на́ тер када! Мэ кацаво жэ рабо, сар ту, сар тирэ ԥрала, лэ Дэвлэстирэ особи мануша, и всаворэ, ко приритярдёл лэ алавэнди анда кадэва лил. Тэлюв лэ Дэвлэсти».
10 Но потом во ԥэндя манди: «На́ гарав и дэвликунэ алава, савэ пистромэ андэ кадэва лил, важ кода кай пашэ и время, кай вся тэ ашэл кадя, сар котэ пистромэ.
11 Мэк кодэва, ко терэл неправильно, кадя и жувэл и мэк о мэлало ашэлпэ мэлало. Но кодэва, ко терэл правильно, мэк кадя и жувэл и о свынто мэк ашэлпэ свынто.
12 „Мэ ӥто авава и кажно затерэла мандар па пэстири дила.
13 Мэ А́льфа и Аме́га, пэрво и послиднё, кодэва, кастар вся залэлпэ и пэр кастэ вся кончийпэ.
14 Бахталэ кодэла, ко вихаладя пэстири ӥда, кай лэстэ тэ авэл право тэ хал па витки, савэ дэн жызня, и тэ зажал через и вороты андо форо.
15 Но и мануша, савэ терэн гряцымос*, кодэла, ко драбатярэл, андярэл пэс билажавардэс*, умарэл, полэл аврэ дэвлэн*, и всаворэ, кас цырдэл каринг о хохаимос и ко хытрияса обжалпэ аврэнца, на зажана андо форо“.
16 „Мэ, о Исусо, бишалдэм лэ анӷелос, кай во тэ потвердий када и кай када тэ анэн лашымос лэ ӷуртонэнди. Мэ анда лэ Давидоско колено и лэско шаво. Мэ ярко особено* черӷай“».
17 О Дэл через пэско свынто зор и лэ Бакрорэстири тэрни ԥэнэн: «Ав!» И кодэва, ко ашунэл када, мэк ԥэнэн: «Ав!» Мэк авэн всаворэ, ко камэл тэ пэл паи. И кодэва, ко камэл, мэк просто кадя лэл о паи, саво дэл жызня.
18 «Ԥэнав всаворэнди, ко ашунэл и дэвликунэ алава, савэ пистромэ андэ кадэва лил: „Ко варисо каринг лэндэ достола, пэр лэстэ о Дэл бишалэла бида, пала сави пистромэ андэ кадэва лил.
19 И ко варисо андар лэндэ вилэла, лэстар о Дэл одлэла о право тэ хал па ла жызнятирэ витки и тэ зажал андо свынто форо, сар пистромэ андэ кадэва лил“.
20 Кодэва, ко потвердий када, ԥэнэн: „Мэ ӥто авава“».
Аминь! Ав, Баро Хулай Исусо!
21 Тэ здиқэл о Баро Хулай о Исусо пэ свынти па пэско баро ковло ди.
Сноски
^ Ворта «риконэ».
^ Греч. алав, саво катэ тердёл, фартэ пашэ лэ алавэсти парнэ́я.
^ Или «лэ дэвлэндирэ статуэтки».
^ Ворта «утренё».
