Филипы 3:1-21
3 Ни акэ, мэрнэ ԥрала, вся и время лошавэн андэ лэ Барэ Хуластири дила. Манди най ԥарэс упалэ и упалэ тэ пистросарав тумэнди пала ек, ай тумэн када фэрия.
2 Фэринпэ лэ хортонэндар. Фэринпэ кодэлэндар, ко терэл аврэнди вэрыто. Фэринпэ кодэлэндар, ко шынэн и тила*.
3 Па чачимастэ опшындэ амэн, кодэлэн, ко терэл лэ Дэвлэстири дила лэстирэ зорэса, ко абурой андо Христос Исусо и на надеийпэ пэ кода, со цэнин и мануша,
4 хоть мандэ, сар никастэ аврэстэ, исин право пэ када.
Если варико гиндой, кай лэстэ исин право тэ надеийпэ пэ кода, со цэнин и мануша, тоди мандэ исин инке май баро право.
5 Ман опшындэ по восьмо дес, мэ анда израильско народо, анда лэ Веняминоско колено, мэ евреё, анда еврейско ери. Если тэ дас дума пала законо, мэ сымас фарисеё,
6 мэ хваткаса ӷонисаравас кодэлэн, ко сас анда лэ Дэвлэско ӷурто, ритяравас о законо и никай на шылисававас.
7 Но вся, со сас манди куч, хасардя и цэмин важ мандэ через о Христос.
8 Па мэрнятэ, вся када нисо на ашэл, если тэ сыстосарав кодэлэса, пэскати дэ куч тэ ӷанав пала Христос Исусо, пала амаро Баро Хулай. Важ лэстэ мэ отԥэнделэм всаворэстар и па мэрнятэ када гуной, саво сас вишуто. Мэ стердэм када, кай тэ авав уӷодно лэ Христости
9 и кай мандэ тэ авэл ек гиндо лэса. Мэ найдошало англа Дэл най важ кода, кай ритярав о законо, ай кай патяв андо Христос. И о Дэл прижанэн ман найдошалэса, важ кода кай мэ патяв.
10 Мэ камав тэ уӷанав лэ Христос и о зор кодэлэско, ко лэс жундярдя, и тэ пэрэандярав кацави жэ бида, сар во. Мэ ӷотово дажэ тэ мэрав кадя жэ, сар муля во,
11 кай, если получияпэ, тэ авав машкар кодэла, ко пэрви авэна жундярдэ.
12 Манди инке на дорэсляпэ и блаӷословения* и мэ инке на ашэлэм идеально. Но мэ пристав вся о зор, кай тэ стерав кода, важ со витидя ман о Христос Исусо.
13 Ԥрала, мандэ нинай андо гиндо, кай мэ ужэ домарделэм када. Но мэ моӷу точно тэ ԥэнав: мэ бистрав кода, со сас, и старысавав тэ жав англэ.
14 Мэ пристав вся о зор, кай тэ домардював и блаӷословения — и жызня по небо, сави о Дэл дэла кодэлэнди, кас витидя через о Христос Исусо.
15 Всаворэ амэ, ко ашэля взросло па лэ Дэвлэстири время, трэбуй кадя жэ тэ диқэн пэ када. Ай если варикастэ авэр гиндо, о Дэл поможыя лэсти правильно пэ када тэ диқэл.
16 И всаек, со амэ тэ на домардювас, на́ парашам тэ жас кодэлэ жэ дромэса.
17 Ԥрала, лэн мандар примеро и диқэн пэ кодэла, ко терэл кадя, сар сыкавас амэ.
18 Бут мануша андярэн пэс сар кодэла, ко вэрыцый лэ Христоско столбо. Мэ най еқвар ԥэнавас пала лэндэ, ай акана ԥэнав дажэ ясвэнца.
19 Вонэ жан дромэса, саво андярэл каринг и смэрть, лэнго Дэл — о ело, вонэ путён пэстиря диласа, важ сави трэбуй тэ авэл лажаво, и на гиндон пала лэ Дэвлэстири время.
20 Ай амаро ӷражданство* — по небо, и амэ фартэ аштярас, кала котар авэла кодэва, ко амэн спасыя, — о Баро Хулай о Исусо Христос.
21 Во парувэла амари би зорэстири тила, кай вой тэ ашэл ашунгли, сар лэстири тила. Во стерэла када пэстирэ барэ зорэса, кодэлэ зорэса, савэса во лэла тэ хулаий пэ всаворэ.
Сноски
^ Катэ и дума жал пала кодэла, ко заставий аврэн тэ опшындён.
^ Или «наӷрада».
^ Или «амари прописка».
