1 Иоано 2:1-29
2 Мэрнэ сомнакунэ бэяцэ, мэ пистросарав тумэнди пала када, кай тумэ тэ на стерэн нисаво бэзэх. Если жэ варико стерэла бэзэх, амэндэ исин помошнико*, саво паша Дад, — када о Исусо Христос, саво андэ вся правильно.
2 Во — примирительно жэртва важ амаро бэзэх, и най кати важ амаро, но и важ всаворя люмако бэзэх.
3 Если амэ ритярас лэско законо, тоди дицол, кай амэ ӷанас лэс.
4 Если варико ԥэнэн, кай ӷанэн лэс, но на ритярэл лэско законо, во — хохавно, и андэ лэско ди нинай чачимос.
5 Ай если варико жувэл кадя, сар во ԥэнэн, тоди дицол, кай во па чачимастэ любий лэ Дэвлэс. Если и амэ кадя терас, амэ сыкавас, кай амэндэ лэса ек гиндо.
6 Если варико ԥэнэн, кай лэстэ лэ Дэвлэса ек гиндо, тоди во трэбуй тэ андярэл пэс кадя, сар андярэлас пэс о Исусо.
7 Мэрнэ кучутнэ, мэ пистросарав тумэнди най пала нэво законо, ай пала пурано, пала кодэва законо, саво тумэ ашундэ, кала уӷанглэ пала Христос и жылэ лэстирэ дромэса. Кадэва пурано законо — о алав, саво тумэ ашундэ.
8 И всаек мэ пистросарав тумэнди пала лэстэ сар пала нэво законо — законо, саво ритярэлас о Исусо и саво ритярэн тумэ, важ кода кай и тэмнота прожал и о чачуно свето ужэ ԥабол.
9 Кодэва, ко ԥэнэн, кай во ԥирэл андо свето, но вэрыцый пэстирэ ԥралэс, всаек ашэлпэ андэ тэмнота.
10 Кодэва, ко любий пэстирэ ԥралэс, ашэлпэ андо свето и на дэлпэдап*.
11 Ай кодэва, ко вэрыцый пэстирэ ԥралэс, — во ашэлпэ андэ тэмнота. Во ԥирэл андэ тэмнота и на ӷанэн, каринг жал, важ кода кай ашэля коро ла тэмнотатар.
12 Мэ пистросарав тумэнди, мэрнэ сомнакунэ бэяцэ, важ кода кай тумаро бэзэх сас простимэ ради лэско алав*.
13 Мэ пистросарав тумэнди, дада, важ кода кай тумэ ӷанэн кодэлэс, ко исин жы анда дэлмутни время. Пистросарав тумэнди, тэрнэ мануша, важ кода кай тумэ победисардэ лэ Бэнгэс*. Пистросарав тумэнди, бэяцэ, важ кода кай тумэ ӷанэн лэ Дадэс.
14 Пистросарав тумэнди, дада, важ кода кай тумэ ӷанэн кодэлэс, ко исин жы анда дэлмутни время. Пистросарав тумэнди, тэрнэ мануша, важ кода кай тумэндэ исин зор, тумэ фэрин андо ди о алав лэ Дэвлэстар и победисардэ лэ Бэнгэс*.
15 На́ любин кадэя люма и кода, со исин андэ люма. Кодэва, ко любий и люма, на любий лэ Дадэс,
16 важ кода кай вся, со исин андэ люма: каринг со цырдэл лэ бэзэхэстири тила, со камэн и яқа и кала путён пэстирэ мищимаса*, — када най лэ Дадэстар, ай кадэла люматар.
17 Кадэя люма и вся, со вой камэл, ӥто на авэла, ай кодэва, ко андярэл лэ Дэвлэстири время, лэла тэ жувэл вечно.
18 Мэрнэ сомнакунэ бэяцэ, поджыля о послиднё часо. Тумэ ашундэ, кай трэбуй тэ авэл лэ Христоско вороӷо, и чаче, акана появисайлэ бут лэ Христостирэ вороӷоря. Кочай амэ ӷанас: поджыля о послиднё часо.
19 Вонэ сас машкар амэндэ, но ужылэ амэндар, важ кода кай на сас кацавэ, сар амэ*. Тэ авелоп вонэ кацавэ, сар амэ, тоди ашэлопэ амэнца. Но вонэ ужылэтар и дицэля, кай най всаворэ кацавэ, сар амэ.
20 Тумэн витидя о свынто Дэл, и всаворэ тумэ ӷанэн о чачимос.
21 Мэ пистросарав тумэнди най важ кода, кай тумэ на ӷанэн о чачимос, ай важ кода, кай тумэ ӷанэн лэс и кай лэ чачимастар не можэт тэ жал нисаво хохаимос.
22 Хэба най хохавно кодэва мануш, ко отԥэндёл, кай о Исусо — када Христос? Када лэ Христоско вороӷо, во одбандёл и лэ Дадэстар, и лэ Шавэстар.
23 Кодэлэсти, ко одбандёл лэ Шавэстар, на дэл блаӷословения ни о Шаво, ни о Дад. Ай кодэлэсти, ко прижанэн лэ Шавэс, дэл блаӷословения и о Шаво, и о Дад.
24 Ай если тэ ԥэнас пала тумэндэ, мэк кода, со тумэ ашундэ пала Христос, ашэлпэ андэ тумаро ди. Если кода, со тумэ ашундэ пала Христос, ашэлпэ андэ тумаро ди, тумэндэ авэла ек гиндо лэ Шавэса и лэ Дадэса.
25 Ай во дя алав, кай дэла тумэнди вечно жызня.
26 Мэ пистросарав тумэнди пала кодэла, ко камэл тэ заандярэл тумэн андо хохаимос.
27 Ай тумэн о Дэл витидя пэстирэ свынтонэ зорэса, и кадэва зор ашэлпэ тумэнца, важ кода кай тумэнди на трэбуй, кай варико тумэн тэ сытярэл. О Дэл витидя тумэн, и када чачимос, андэ када нинай хохаимос и через када во сытярэл тумэн всаворэсти. Мэк тумэндэ вся и время авэл лэса ек гиндо, сар во тумэн и сытярдя.
28 Важ када, мэрнэ сомнакунэ бэяцэ, мэк тумэндэ вся и время авэл лэса ек гиндо, кай, кала во сыкавэла пэско зор*, амэ смило тэ дас дума и тэ на гарадювас лажаимастар андэ лэстири время*.
29 Если тумэ ӷанэн, кай во вся терэл правильно, тумэ кадяжэ ӷанэн, кай кажно, ко андярэл пэс правильно, лэ Дэвлэско бэято.
Сноски
^ Или «защитнико».
^ Или «спотыкнийпэ».
^ Катэ и дума жал пала лэ Исусоско алав.
^ Ворта «лэ найлашэс».
^ Ворта «лэ найлашэс».
^ Или «кала старыинпэ англа всаворэ тэ путён пэстирэ мищимаса».
^ Или «на сас амарэ».
^ Ворта «сыкадёла».
^ Или «кала во рияпэ».
