1 Каринфо 12:1-31
12 Ԥрала, камав, кай тумэ тэ ӷанэн пала бах, сави випэрэл лэ Дэвлэстар.
2 Тумэ ӷанэн, кай, инке жы каринг кода сар тумэ патяе андо Дэл, тумэ полэнас лэ хохавнэ дэвлэн, савэ на дэн дума, и терэнас кода, со вонэ камэнас.
3 Акана мэ камав, кай тумэ тэ полэн: нико, кастэ исин лэ Дэвлэско зор, на ԥэнэна: «Тэ дэл бида по Исусо!» И кати если кай о мануш исин о свынто зор, во можэт тэ ԥэнэн: «О Исусо — када Баро Хулай!»
4 Лэ манушэнди можэт тэ випэрэл разно бах лэ Дэвлэстар, но вся када жал кати лэ свынтонэ зорэстар.
5 Амэ можэм по разному тэ поможысарас аврэнди, но пэ всаворэ кати ек Баро Хулай.
6 И мануша моӷут тэ терэн разно дила, но исин кати ек Дэл, саво пэстирэ зорэса поможый лэнди тэ терэн ла.
7 О свынто зор дэлпэ кажнонэ манушэсти, кай тэ авэл драго всаворэнди.
8 Кадя, через о свынто зор еқэ манушэсти випэрэл бах годявэрнэс тэ дэл дума, и через кодэва жэ свынто зор аврэсти випэрэл бах тэ авэл бужангло,
9 варикасти через кодэва жэ свынто зор випэрэл бах тэ патял, ай варикасти — тэ исцэлий,
10 варикасти — тэ терэл чудеса, варикасти — тэ пэрэдэл и дэвликунэ алава, варикасти — тэ росполэл и дэвликунэ алава, варикасти — тэ дэл дума пэ авэр шыба, ай варикасти — тэ пэрэандярэл па авэр шыба.
11 Вся када терэлпэ через ек свынто зор. Кажнонэ манушэсти випэрэл пэстири бах, сар уӷодно лэ Дэвлэсти*.
12 Лэ манушэстири тила стиди анда бут части, но када всаек ек тила, и всаворэ части прижан еқа тилати. Кацави жэ и лэ Христостири тила.
13 Всаворэ амэ болделям через ек свынто зор, кай тэ ашас ек тила. Евреёря и грекоря, раборя и свободни мануша — всаворэнди амэнди сас дино ек свынто зор.
14 Чаче, и тила стиди най анда ек часть, ай анда бут части.
15 Тэ диноп дума о пэрно и тэ ԥэндоп: «Если мэ най вас, тоди мэ най часть ла тилатар», во всаек ашэлопэ ла тилатири часть.
16 Тэ диноп дума о кан и тэ ԥэндоп: «Если мэ най як, тоди мэ най часть ла тилатар», во всаек ашэлопэ ла тилатири часть.
17 Тэ авелоп вся и тила яқаса, сар о мануш тэ ашунэл? Тэ авелоп вся и тила канэса, сар о мануш тэ росполэл о запахо?
18 Но о Дэл стидя ла тилатирэ части, сар лэсти сас уӷодно.
19 Тэ авелоп и тила стиди кати анда ек часть, хэба када авелоп вся и тила?
20 Ни акэ, исин бут части, но и тила ек.
21 И як не можэт тэ ԥэнэн лэ вастэсти: «Ту манди на трэбуй», и о шэро не можэт тэ ԥэнэн лэ пэрнэнди: «Тумэ манди на трэбуй».
22 Па чачимастэ, андэ тила исин кодэла части, савэ здэнпэ би зорэстирэ, но би лэнго тожэ нисар.
23 И амэ май бут шас сама пэ кодэла ла тилатирэ части, савэ па амарятэ най кацавэ важни. Кадя амэ май драго заботисавас пала ла тилатирэ части, савэ най шукарнэ,
24 ай тэ диқас пала ла тилатирэ части, савэ шукарнэ, ужэ на трэбуй. О Дэл стидя и тила кадя, кай май бут сама тэ шон пэ кодэла части, савэнди када трэбуй.
25 Во стердя када, кай и тила тэ на розделийпэ, но кай латирэ части тэ заботинпэ ек пала еқэстэ.
26 Если варисо дуқал, тоди дуқал вся и тила. Если ек ла тилатири часть ашэл ашунгли, ласа лошавэл вся и тила.
27 Тумэ — лэ Христостири тила, ай кажно андар тумэндэ — кадэла тилатирэ части.
28 Кажнонэсти андо ӷурто о Дэл отделисардя пэско ҭан: пэрво — лэ апосталонэнди, дуйто — пэстирэ особонэ манушэнди, трито — лэ учителёнэнди, потом кодэлэнди, ко терэл чудеса, потом кодэлэнди, касти випэля бах тэ исцэлий, кодэлэнди, ко поможый аврэнди, ко можэт тэ лэлпэ хуласа, ко дэл дума пэ авэр шыба.
29 Всаворэ вонэ апосталоря? Всаворэ вонэ лэ Дэвлэстирэ особи мануша? Всаворэ вонэ учителёря? Всаворэ вонэ терэн чудеса?
30 Всаворэ вонэ исцэлин аврэн? Всаворэ вонэ ӷанэн тэ дэн дума пэ авэр шыба? Всаворэ вонэ ӷанэн тэ пэрэандярэн па авэр шыба?
31 Важ када старыинпэ анда вся зор, кай тумэнди тэ випэрэл со май бари бах. Ай мэ сыкавава тумэнди со май лашо дром.
Сноски
^ Или «лэ Дэвлэстирэ зорэсти».
