1 Каринфо 5:1-13
5 Акана мэ уӷанглэм, кай тумэндэ терэлпэ билажавардимос. И када кацаво билажавардимос, саво дажэ на ашунделя машкар авэр народоря. Манди ԥэндэ, кай ек андар тумэндэ жувэл пэстирэ дадэстиря хулаяса.
2 И тумэ кадэлэса абурон? Хэба тумэ на трэбуй через када тэ ровэн и тэ видаравэн кодэлэс, ко кадя терэл?
3 Хоть ман нинай паша тумэндэ, мэрно гиндо тумэнца. Мэ ужэ виандярдэм сындо кодэлэ манушэсти, саво стердя када, ԥэнэса мэ паша тумэндэ.
4 Кала тумэ стидэнапэ па амарэ Барэ Хуластири лэ Исусостири время, тоди ӷанэн, кай мэрно гиндо тумэнца, ай манца амарэ Барэ Хуласко лэ Исусоско зор.
5 Тумэнди трэбуй тэ отдэн кацавэ манушэс лэ Сатанасти, кай о бэзэх будэр тэ на римой аврэн и кай андо ӷурто всаворэ тэ на парашэн тэ лошавэн жы каринг кодэя время, кала авэла лэ Барэ Хуласко дес.
6 Найдраго, кай тумэ абурон кадэлэса. Хэба тумэ на ӷанэн, кай дажэ набут опара ваздэл вся о хумэр?
7 Вишон и пурани опара и ашэн нэво хумэр, кай андэр тумэндэ тэ на авэл нисо римомэ. Важ кода кай о Христос, амаро патрадяко бакроро, сас андо́ сар жэртва.
8 Кочай, кала справисарас и Патради, амэ на трэбуй тэ хас марно, саво стердо анда пурани опара и саво сыкавэл о бэзэх и о найлашымос. Но амэ трэбуй тэ хас кати пресно марно, саво сыкавэл о лашымос и о чачимос.
9 Андэ пэско письмо мэ пистросардэм тумэнди, кай тумэ тэ на сԥандён* лэ манушэнца, савэ андярэн и билажаварди жызня.
10 Но мэ на ԥэнавас пала мануша андэ кадэя люма, савэ терэн билажавардимос, чорымастирэ, вимарэн и ловэ или полэн лэ хохавнэ дэвлэн. Тэ авелоп када кадя, тумэнди прижылопэ тэ ашавэн кадэя люма.
11 Акана мэ пистросарав тумэнди, кай тумэ будэр тэ на сԥандён кодэлэса, пэр кастэ ԥэнэн ԥрал, но ко всаек терэл билажавардимос, ашэлпэ чорымаско, полэл лэ хохавнэ дэвлэн, вэрыто дэл дума пала авэр, упэлпэ или вимарэл и ловэ. Кацавэ манушэса дажэ на́ бэшэн* пала ек мисяйля.
12 Васо мэ трэбуй тэ сындосарав кодэлэн, ко най анда лэ Дэвлэско ӷурто? Важ кода кай амэ трэбуй тэ сындосарас кодэлэн, ко андярэл амари время,
13 ай кодэлэн, ко на андярэл амари время, сындой о Дэл. «Дурярэн* пэстар кодэлэс, ко терэл найлашымос».
