1 Каринфо 8:1-13
8 Акана камав тэ залав и дума пала хамос, саво сас андо́ сар жэртва лэ дэвлэнди*. Чаче, всаворэ амэ дэсо ӷанас пала кадэва маменто. Но если варико гиндой, кай бут ӷанэн, во лэл тэ завдэлпэ, ай если во любий аврэн, када састярэл*.
2 Если о мануш гиндой, кай вся ӷанэн, па чачимастэ во на полэл када кадя, сар трэбуй.
3 Но о Дэл ӷанэн кодэлэс, ко любий лэс.
4 Ни акэ, можно тэ хас кода, со сас андо́ сар жэртва лэ дэвлэнди? Амэ ӷанас, кай и статуэтка па чачимастэ най дэл и кай исин кати ек Дэл.
5 И мануша ԥэнэн, кай исин бут разни дэвла, сар по небо, кадя и пэ ԥув. Вижал, кай о миро исин бут «дэвла́» и бут «хула́я».
6 Важ амэндэ исин кати ек Дэл — о Дад. Всаворэ амэ жылям лэстар, и амэ жувас важ лэстэ. И важ амэндэ исин кати ек Баро Хулай, о Исусо Христос. Вся появисайля через лэстэ, и амэ жувас через лэстэ.
7 Но най всаворэ када полэн. Дэсавэ варикала тэлёнас лэ статуэткэнди. Важ када, кала вонэ хан кода, со сас андо́ сар жэртва ла статуэткати, важ лэндэ када всаек со тэ тэлён лати. Тоди лэн лэл тэ хал лэнго найсасто ди.
8 Но о хамос на пашарэл амэн каринг о Дэл. Если амэ на хас — нисо на хасарас, и если хас — амэнди нисо на пэрэла.
9 Кати фэринпэ, кай через кода, саво тумэндэ исин право тэ витидэн, тумэ нисар тэ на змарэн кодэлэн, ко би зорэско.
10 Дажэ если ту ӷанэс, кай и статуэтки нисо на ашэн, кодэва, ко би зорэско, можэт тэ додиқэл, сар ту хас андэ қандири, кай тэлён лэ статуэткэнди. Када можэт тэ подмарэл лэс тэ хал кода, со сас андо́ сар жэртва лэ статуэткэнди.
11 Дажэ если ту ӷанэс, кай можно тэ хас кацаво хамос, ту змарэс па правильно дром кодэлэс, ко би зорэско. На́ бистэр, кай во тиро ԥрал, пала саво муля о Христос.
12 Кала тумэ терэн кацаво бэзэх против пэстирэ ԥрала и шынэн кадэлэса лэндири би зорэстири совесть, тумэ терэн бэзэх против о Христос.
13 Акэ васо мэ будэр никала на хава мас, если кода, со мэ хав, змарэл мэрнэ ԥралэс па правильно дром. Мэ отԥэндював тэ терав вся, со можэт тэ одмарэл лэ Дэвлэстар мэрнэ ԥралэс.
