1 Тимафеё 2:1-15
2 Со май пэрво ԥэнав всаворэнди тэ взвинпэ каринг о Дэл, кай тэ мангэн, тэ рудин*, тэ мангэнпэ и тэ блаӷодарин важ бут разни мануша,
2 ай кадяжэ пала царёря и пала всаворэ, кастэ исин право тэ хулаий. Тоди амэ можэм тэ жувас тихо и спокойно, ай кадяжэ андэ вся тэ стас бари патив по Дэл и тэ андярас пэс достойно.
3 Када драго и правильно важ амаро Дэл, саво спасый амэн.
4 Во камэл, кай бут разни мануша тэ уӷанэн о чачимос и тэ спасынпэ.
5 Исин кати ек Дэл и кати ек мануш о Христос Исусо, саво пашарэл лэ мирос каринг о Дэл.
6 Во отдя пэстири жызня и потиндя и цэмин, сави трэбуй сас, кай тэ освободий всаворэн. И пала када авэла росԥэндо, кала поджала и время.
7 Важ када ман и стодэ ходакоса важ лэ Дэвлэстири дила и апосталоса, кай тэ сытярав лэ манушэн анда авэр народоря и тэ поможысарав лэнди тэ патян и тэ ӷанэн о чачимос. Ԥэнав сар исин, на хохавав.
8 Ни акэ, мэк андэ кажно ҭан, кай тумэ стидэнпэ, и мурш, савэ отдинэ пэско ди важ о Дэл, мангэнпэ лэсти и терэн када би холяко и би спороско.
9 Кадяжэ мэк и жувля утидэнпэ стэмошно*, сэжо и годяса. Кай тэ вурядён, лэнди на трэбуй фартэ сложно тэ заплетин и бал, тэ стон пэр пэстэ бут сомнак и жэмчуӷо или тэ лэн фартэ кучутни ӥда.
10 Но, кай тэ авэн шукарнэ, мэк вонэ терэн лащи дила, сар прижал лэ жувлянди, савэ стон бари патив по Дэл.
11 Мэк и жувля, кала сытён, ашэн мулком и мэк кандэн.
12 Мэ на домэкав лэ жувлянди тэ сытярэн и тэ хулаин пэ мурша. Лэнди трэбуй тэ ашэн мулком.
13 Важ кода кай пэрво сас создано о Адамо, ай потом и Ева.
14 И най о Адамо сас обдилярдо, ай и жувли. Када вой сас обдилярди и стердя бэзэх.
15 Но ла жувля лэла тэ фэрий, кала латэ арақадёна бэяцэ, если вой на парашэл тэ патял и тэ любий, ай кадяжэ ашэлпэ свынто и годявэрни*.
