1 Фесалоники 3:1-13
3 Амэ фартэ скучисарасас пала тумэндэ, важ када амэ полям, кай авэла фэдэр, если амэ ашасапэ андэ Афи́ны екжэнэ
2 и бишаласа каринг тумэндэ лэ Тимафеёс, амарэ ԥралэс и лэ Дэвлэстирэ манушэс*, саво росԥэнэн и лащи новость пала Христос. Амэ бишалдям лэс тэ подритярэл тумэн* и тэ стерэл тумэнди по ди май вушэро, кай кадя тумэ инке май фартэ тэ патян.
3 Тоди нико андар тумэндэ на змардёла* через кадэя бида. Тумэ екжэнэ ӷанэн, кай амэ не можэм латар тэ фэрисавас.
4 Важ кода кай кала амэ самас тумэнца, амэ най еқвар ԥэнасас, кай амэндэ авэла ԥари время, и тумэ ӷанэн, кай вся кадя и тердяпэ.
5 Мандэ будэр на сас зор тэ аштярав, и важ када мэ бишалдэм каринг тумэндэ лэ Тимафеёс. Мэ камлэм точно тэ уӷанав, кай тумэ на парашэн тэ кандэн лэ Дэвлэс и кай лэ Бэнгэстэ на вижыля тэ подмарэл тумэн каринг о бэзэх, важ кода кай тоди вижылоп, кай амэ евья пристодям скати зор.
6 И акэ о Тимафеё кати найдэлмут рисайля тумэндар и росԥэндя лашэ новости пала тумэндэ, кай тумэ на парашэн тэ кандэн и тэ любин. Во росԥэндя, кай тумэ вся и время дэн дума пала амэндэ лашэ алавэса и фартэ камэн тэ диқэнпэ амэнца, кадя жэ сар и амэ — тумэнца.
7 Ԥрала, кала амэ уӷанглям, кай тумэ на парашэн тэ кандэн, амэнди андэ ԥари* время и андэ бида ашэля май вушэро по ди.
8 И амэ лям зор*, кала уӷанглям, кай тумэ ашэнпэ састэ андэ ԥари время, сар лэ Барэ Хуластирэ ученикоря.
9 Сар амэ можэм тэ сыкавас, кай блаӷодарни лэ Дэвлэсти пала тумэндэ, пала бари лош, сави амэндэ исин, кала амэ диқас пэр тумэндэ?
10 О дес и рят амэ мангаспэ всаворэ́ одеса, кай тэ диқаспэ тумэнца и тэ дас тумэнди помощь, сави трэбуй, кай тумэ май фартэ тэ патян.
11 Мэк амаро Дэл и Дад и амаро Баро Хулай о Исусо поможын амэнди тэ дожас каринг тумэндэ.
12 Амэ кадяжэ камас, кай о Баро Хулай тэ поможый тумэнди инке май фартэ тэ любин ек еқэс и всаворэн аврэн. Чаче, старыинпэ тэ любин инке май састэс — кадя жэ, сар амэ любисарас тумэн.
13 Тоди тумэ* авэна састэ, бидошатирэ и свынти англа амаро Дэл и Дад, кала рияпэ амаро Баро Хулай о Исусо вместе всаворэ́ пэстирэ свынтонэнца.
Сноски
^ Или, можэт, «амалэс».
^ Или «тэ поможый тумэнди тэ ашэн май састэ».
^ Или «на ашэла би зорэско».
^ Ворта «чоры».
^ Ворта «амэ жувас».
^ Ворта «тумарэ одя».
