1 Фесалоники 4:1-18
4 Ԥрала, амэ сыкадям тумэнди, сар тумэ трэбуй тэ андярэн пэс, кай тэ уӷодин лэ Дэвлэсти, и тумэ кадя и терэн. Акана амэ мангас и дажэ ясвэнца рудисарас тумэн лэ Барэ Хуластирэ лэ Исусостирэ алавэстар: на́ парашэн кадя тэ терэн и пристон важ када инке май бут зор.
2 Важ кода кай тумэ ӷанэн, саво законо амэ пэрэдям тумэнди лэ Барэ Хуластар лэ Исусостар.
3 О Дэл камэл, кай тумэ тэ авэн свынти и тэ фэринпэ лэ билажавардимастар.
4 Кажно андар тумэндэ трэбуй тэ ӷанэн, сар тэ хулаий пэстиря тиласа, и тэ терэл вся, кай вой тэ авэл свынто и тэ ашэлпэ пативали.
5 Тумэ на трэбуй тэ помэкэнпэ кодэлэсти, пала со здрал и цыпа, кай дажэ нащи тердярэн корко пэс и нащи чалён кадэлэстар. Кадя терэн и мануша, савэ на ӷанэн лэ Дэвлэс.
6 На́ андярэн пэс найпрепи и на́ терэн вэрыто пэстирэ ԥралэсти, кала тумэн цырдэл каринг кацави дила. О Иегова* спушэл важ вся када, сар амэ ужэ ԥэнасас тумэнди и пэр со най еқвар шасас сама.
7 Важ кода кай о Дэл витидя амэн, кай амэ тэ авас свынти, ай най мэлалэ.
8 Кочай кодэва, ко на приашундёл каринг кадэла алава, отшол най лэ манушэс, ай лэ Дэвлэс, саво дэл тумэнди пэско свынто зор.
9 Ай пала кода, кай тумэ тэ авэн глаба ек пала ек*, сар ԥрала, манди на трэбуй тэ пистросарав, важ кода кай екжэно о Дэл сытярдя тумэн тэ любин ек еқэс.
10 Тумэ ужэ любин всаворэ́ ԥралэн андэ Македо́ния. Но амэ ԥэнас тумэнди, ԥрала, тэ любин инке май фартэ.
11 Кай тэ жувэн тихо и спокойно, старыинпэ тэ на ӷулен най андэ пэстири дила и тэ затерэн пэ жызня пэстирэ вастэнца, сар амэ тумэнди ԥэндям.
12 Тоди тумэ лэна тэ андярэн пэс кадя, кай затерэна патив лэ миростар, и тумэнди вся лэла тэ хутилэл.
13 Ԥрала, амэ камас, кай тумэ тэ ӷанэн, со аштярэл лэ мулэн, и тэ на помардён бидаса, сар када терэн авэр мануша, савэндэ нинай надия.
14 Важ кода кай если амэ патяс, кай о Исусо муля и жунделя, тоди амэ кадяжэ патяс, кай о Дэл жундярэла и лэ Исусостирэ учениконэн, савэ мулинэ, кай вонэ тэ авэн лэса.
15 Амэ патяс, кай о Иегова дя алав, и важ када ԥэнас тумэнди: кодэла андар мэндэ, ко авэла жундо, кала рияпэ о Баро Хулай, на авэна май пэрви кодэлэндар, ко муля.
16 Важ кода кай екжэно о Баро Хулай змэкэлапэ па небо и ритярэла андэ вас лэ Дэвлэстири труба. Ашундёла, сар во анда вся ӷолосо ақарэл — ақарэл сар ӷлавно анӷело*. Тоди кодэла, ко андярэлас лэ Христостири время и муля, жундёна пэрви.
17 Потом кодэла андар мэндэ, ко инке авэла жундо, ваздэнапэ каринг лэстэ андэ тучи, кай тэ диқэнпэ лэ Барэ Хуласа по небо. И амэ вся и время аваса лэ Барэ Хуласа.
18 Ԥэнэн кадэла алава ек еқэсти, кай тумэнди тэ ашэл по ди май вушэро.
