2 Иоано 1:1-13
1 Мэ, ԥуро мануш*, пистросарав ла ԥьяти, савя витидя о Дэл, и латирэ бэятонэнди. Мэ тумэн анда ди любисарав, и най кати мэ, но и всаворэ, ко ӷанэн о чачимос.
2 Амэ любисарас тумэн, важ кода кай андо ди амэндэ о чачимос, и во авэла амэнца вечно.
3 О Дэл, амаро Дад, и лэско Шаво, о Исусо Христос, на парашэна тэ здиқэн пар мэндэ па пэско баро ковло ди, тэ авэн одялэ каринг амэндэ и тэ дэн мирно жызня, ай кадяжэ тэ поможын тэ полас о чачимос и тэ любисарас.
4 Мэ сымас фартэ лошало тэ уӷанав, кай дэсавэ анда тирэ бэяцэ андярэн лэ Дэвлэстири время*, сар и приԥэндя амэнди о Дад.
5 И акана мэ мангав тут, ԥэй, сар пистромэ андо законо: любин ек еқэс. (Мэ на дав тумэнди нэво законо, ай ԥэнав пала кодэва законо, саво амэ уӷанглям лэ Христостар.)
6 Ай тэ любин — када тэ андярэн лэ Дэвлэстири время. Важ када, сар тумэ ашундэ лэ Христостар, вся и время ритярэн о законо, кай тэ любин ек еқэс.
7 Акана андэ люма фартэ бут хохавнэ мануша, савэ на патян, кай о Исусо Христос авеля пэ ԥув сар мануш*. Всаворэ вонэ хохавнэ и лэ Христостирэ вороӷоря.
8 Авэн осторожни, кай тэ на хасарэн кода, со амэ домарделям, и тоди тумэнди дорэсэлапэ вся и блаӷословения лэ Дэвлэстар.
9 Кодэва, ко на ритярэл лэ Христоско законо и сытярэл корко пэстар, на уӷодий лэ Дэвлэсти. Ай кодэва, ко ритярэл кадэва законо, уӷодий и лэ Дадэсти, и лэ Шавэсти.
10 Если варико авэл каринг тумэндэ и сытярэл най кодэлэсти, сости сытярэлас о Христос, на́ мэкэн лэс андэ пэско цэр и на́ ԥэнэн лэсти доров.
11 Ай ко прилэл лэс пэстэ и здоровкиийпэ лэса, ашэл дошало вместе лэса андэ лэстири найлащи дила.
12 Мэ камлоп тумэнди инке бут со тэ ԥэнав, но на камав тэ пистросарав пала када андо письмо. Можэт, мандэ вижала тэ авав каринг тумэндэ и тэ подав дума тумэнца, кай тумэндэ тэ авэл бари лош.
13 И бэяцэ тиря ԥьятирэ, савя витидя о Дэл, пэрэдэн тути поклоно.
