2 Каринфо 1:1-24
1 Када мэ, о Павло, лэ Христоско лэ Исусоско апостало, сар када сас уӷодно лэ Дэвлэсти, и амаро ԥрал о Тимафеё. Мэ пистросарав лэ христианонэнди андо форо Кари́нфо и лэ свынтонэнди па вся область Аха́я.
2 Мэк о Дэл, амаро Дад, и о Баро Хулай о Исусо Христос здиқэн пэр тумэндэ па пэско баро ковло ди и дэн мирно жызня.
3 Тэ ашундёл амарэ Барэ Хуласко лэ Исусоско лэ Христоско Дэл и Дад, саво глаба пала амэндэ и саво жалуий амэн анда вся ди и вся и время терэл амэнди май вушэро по ди.
4 Во терэл амэнди май вушэро по ди андэ вся амари бида и ԥаримос. Кала о Дэл кадя обжалпэ амэнца, тоди и амэ можэм тэ терас аврэнди май вушэро по ди, сави бида лэндэ тэ на авэл.
5 Амэ пэрэандярас бут ԥаримос важ кода, кай андярас лэ Христостири время, но кадяжэ через о Христос амэндэ по ди вся и время вушэро.
6 Амэ виритярас разно бида, кай тумэнди тэ ашэл май вушэро и кай тумэ тэ спасынпэ. И амэнди терэн май вушэро по ди, кай тэ ашэл май вушэро тумэнди, и кадя тумэндэ исин зор тэ пэрэандярэн о ԥаримос, саво исин и амэндэ.
7 Амэ анда вся ди патяс тумэнди, важ кода кай ӷанас: если тумэнди ԥарэс кадя жэ, сар и амэнди, тоди и по ди тумэндэ авэла вушэро кадя жэ, сар и амэндэ.
8 Ԥрала, камас, кай тумэ тэ ӷанэн, со тердяпэ амэнца андэ Азия. Амэнди сас кадя ԥарэс, кай пэстирэ зорэса амэ на виритярдоп. И амэ на ӷанасас, вижуваса чи най.
9 По ди амэндэ сас, ԥэнэса амэ аштярас, кай амэн тэ казнин. Вся када тердяпэ, кай амэ тэ надеисавас най пэр пэстэ, ай по Дэл, саво жундярэл лэ мулэн.
10 Во фэрисардя амэн ла смэртятар, и амэ патяс, кай во на парашэла амэн тэ фэрий.
11 Тумэ кадяжэ можэте амэнди тэ поможын, если лэна анда ди тэ мангэнпэ пала амэндэ, и тоди бут миро лэла тэ блаӷодарий лэ Дэвлэс важ и помощь, сави амэндэ исин через бутэ манушэндирэ молитвы.
12 Амэ абуросарас, кай вужэ одеса можэм тэ ԥэнас: машкар о миро андэ кадэя люма, и, май ӥто всаворэстар, машкар тумэндэ, амэ андярас вужи жызня и на хохавас, сар сытярэл о Дэл. И амэ на жувас кадя, сар годявэрнэс важ кадэя люма, но жувас кадя, сар о Дэл здиқля пар мэндэ па пэско баро ковло ди.
13 Па чачимастэ амэ пистросарас кати кода, со тумэ можэте тэ проадинон и тэ полэн. И мэ патяв, кай тумэндэ вижала вся када тэ полэн.
14 Дэсавэ андар тумэндэ ужэ полинэ, кай тумэ можэте тэ абурон амэнца, сар и амэ ласа тэ абуросарас тумэнца, кала авэла лэ Исусоско дес, амарэ Барэ Хуласко.
15 Мэ всаворэ́ одеса патявас андэ када, кочай камлэм до дуйто тэ авав каринг тумэндэ, кай тумэ упалэ тэ авэн лошалэ.
16 Мэ камлэм тэ зажав тумэндэ па дром андэ Македо́ния, потом анда Македо́ния упалэ тэ авав каринг тумэндэ, ай тоди тумэ набут тэ проандярэн ман андэ Иуде́я.
17 Кала мэ ԥэндэм пала када, важ мандэ када на сас ԥэряс. Мэ на камавас тэ терав кадя, сар терэл о миро, кай спэрва ԥэнэн «да», ай потом «най».
18 Но кадя жэ, сар амэ можэм тэ патяс лэ Дэвлэсти, тумэ можэте тэ патян и амэнди. Амэ на ԥэнас тумэнди «да» и сразу «най».
19 Важ кода кай лэ Дэвлэско Шаво, о Исусо Христос, пала саво амэ — мэ, о Силуа́но и о Тимафеё — росԥэнасас тумэнди, на ԥэнэн «да» и сразу «най», но, если во ԥэнэн «да», тоди лэстэ вся и время вижал «да».
20 И сар дэ бут обещании тэ на дэл о Дэл, через лэстэ вся ашэля «да». Важ када и «аминь» андэ молитва амэ ԥэнас через лэстэ, кай тэ авэл о Дэл ашунгло.
21 Екжэно о Дэл дэл тэ патяс, кай амэ лэ Христостирэ, и во витидя амэн.
22 Во кадяжэ стодя пар мэндэ пэстири печать и стодя амэнди андо ди пэско зор, сар завдатко кодэлэсти, со трэбуй тэ авэл.
23 Мангав Дэвлэс тэ потвердий: мэ идоси на авелэм андо Кари́нфо, важ кода кай жалуисаравас тумэн.
24 Мэ на камав тэ ԥэнав, кай амэ хулаисарас пэр тумэндэ*. Амэ просто тумарэ амала, савэ поможысарас тумэнди тэ авэн лошалэ, важ кода кай тумэ састэс патян*.
