2 Каринфо 10:1-18
10 Мэ, о Павло, взвисавав каринг тумэндэ ковлэ и лашэ алавэнца, сар када терэл о Христос. Кала мэ тумэнца, тумэнди здэлпэ, кай мэ обычно, просто мануш, ай кала най тумэнца, тумэнди здэлпэ, кай мэ смило и найдарано.
2 Мэ надеисавав, кай, кала мэ авава каринг тумэндэ, манди на прижалапэ строӷо тэ обжавпэ кодэлэнца, ко ԥэнэн, кай амэ терас па лэ манушэнго гиндо.
3 Важ кода кай хоть амэ и жувас сар авэр мануша, амэ мараспэ най кадя, сар вонэ.
4 Амэ мараспэ най кадя, сар марэнпэ и халавдэ. Но кодэлэса, со дя амэнди о Дэл, амэ можэм тэ розмарас вся, со тердёл састэс.
5 Важ кода кай амэ доԥэнас о чачимос, кала варико андярэл хохавни дума, и розмарас вся, со на дэл лэ мирости тэ уӷанэн лэ Дэвлэс. Амэ астарас всаворэ гиндоря, савэ ӷулен амэнди андо шэро, кай вонэ тэ авэн кандинэ лэ Христости.
6 И сар кати тумэ сыкавэна, кай андэ вся кандэн, амэ аваса ӷотови тэ спушас любонэстар, ко хоть андэ варисостэ на кандэл.
7 Тумэ вся полэн па кода, со диқэн пэстирэ яқэнца. Кодэва, ко патял, кай во лэ Христоско, мэк инке еқвар погиндой акэ пала со: сар во лэ Христоско, кадя и амэ лэ Христостирэ.
8 О Баро Хулай дя амэнди право тэ поможысарас тумэнди май фартэ тэ патян, ай най тэ терас тумэнди вэрыто, и дажэ если мэ линоп фартэ тэ абуросарав, кай мандэ исин кацаво право, манди на авелоп лажаво.
9 На́ гиндон, кай мэ камав тэ пэрэдаравав тумэн пэстиря думаса*.
10 Важ кода кай дэсавэ ԥэнэн: «Во пистрой драго и састэс, ай кала во катэ, лэстар на марэл бах и пэ лэстири дума можно дажэ тэ на шас сама».
11 Мэк кацавэ мануша ӷанэн: со амэ пистросарас андэ пэстирэ письморя, кода и ласа тэ терас, кала аваса.
12 Амэ дажэ на камас тэ шаспэ пэ мануша, савэ путён корко пэса, или тэ сыстосарас пэс лэнца. Кала вонэ сындон* пэс па пэско гиндо и сыстон пэс корко пэса, вонэ сыкавэн, пэскати вонэ дэ найгодявэрнэ.
13 Но амэ ласа тэ путювас, но най кодэлэса, пэр со амэнди на сас дино право. Амэ абуросараса кати кодэлэса, со амэндэ вижыля тэ домардювас андэ дила, сави о Дэл дя амэнди тэ терас. И кадяжэ андэ кадэя дила ужал, кай тэ сытярас тумэн.
14 Кала амэ авелям каринг тумэндэ, амэ на лям тэ терас кода, пэр со о Дэл на дя амэнди право, но амэ самас пэрви, ко росԥэндя тумэнди и лащи новость пала Христос.
15 Амэ на абуросарас аврэндиря диласа — кодэлэса, со домарделэ котэ, кай о Дэл на дя амэнди право тэ терас и дила. Но амэ надеисавас, кай, если тумэ лэн май фартэ тэ патян, тоди тумэндэ авэла инке май бут лашымос амаря дилатар. И када поможыя амэнди тэ стерас инке май бут,
16 важ кода кай амэ камас тэ росԥэнас и лащи новость и пэ кодэла краёря, савэ май дур тумэндар, кай тэ на абуросарас кодэлэса, со стердэ авэр.
17 «Но ко абурой, мэк абурой лэ Иеговаса*».
18 Важ кода кай лэ Иеговасти уӷодно най кодэва, ко абурой пэса, ай кодэва, каса во абурой.
