2 Каринфо 5:1-21
5 Амэ ӷанас, кай, если амаро цэр пэ ԥув, кадэя катуна, росԥадёла, амэндэ авэла цэр лэ Дэвлэстар. Кадэва цэр стердо най лэ манушэндирэ вастэнца, во вечно и тердёл по небо.
2 Андэ амаро цэр пэ ԥув амэ мучисавас и анда вся ди камас тэ попэрас по небо, ԥэнэса тэ лас пэр пэстэ кадэва цэр,
3 и, кала ласа лэс пэр пэстэ, амэ на аваса нангэ.
4 Пока амэ находисавас андэ кадэя катуна амэ стоӷнисарас и мучисавас, но най важ кода, кай амэ камас тэ сшас ла пар пэстэ, ай важ кода, кай камас тэ лас пэр пэстэ авэр, кай и вечно жызня тэ парувэл кода, со хындёл.
5 О Дэл поможысардя амэнди тэ авас ӷотови каринг кацави жызня. Во дя амэнди пэско зор сар завдатко кодэлэсти, со трэбуй тэ авэл.
6 Важ када амэ вся и время ашаспэ смили и ӷанас, кай, пока амэ жувас андэ кадэя тила, амэ дур лэ Барэ Хуластар.
7 Амэ жувас кодэлэса, андэр со патяс, ай най кодэлэса, со диқас.
8 Амэ вся и время ашаспэ смили и камас тэ жувас лэ Барэ Хуласа, ай най тэ авас андэ кадэя тила.
9 И кочай, паша лэстэ амэ или дур лэстар, амэ камас тэ авас уӷодни лэсти.
10 Важ кода кай всаворэ амэ тердюваса англа Христос по сындо и кажно затерэла лэстар па лэстири дила, пока сас андэ тила, лащи када дила чи вэрыто.
11 Ни акэ, амэ ӷанас, со када и пативали дар англа Дэл, важ када амэ поможысарас лэ мирости тэ патял амэнди. О Дэл драго амэн ӷанэн. Мэ надеисавав, кай и тумэ драго амэн ӷанэн.
12 Амэ на камас упалэ тэ абуросарас англа тумэндэ, но амэ дас тумэнди возможность тэ абурон амэнца. Кадя тумэндэ авэла со тэ ԥэнэн лэ манушэсти, саво абурой кодэлэса, со дицол упрал, ай най кодэлэса, со андо ди.
13 Если амэ зжылям па годятэ, тоди када важ о Дэл, ай если амэ састэ по шэро, тоди када важ тумэндэ.
14 Амаро ди цырдэлпэ через кода, кай о Христос любий амэн, и амэ полям: ек муля пала всаворэ и када трэбуй сас, важ кода кай всаворэ мануша мулинэ.
15 Во муля пала всаворэ, кай кодэла, ко жувэл, тэ жувэн ужэ най важ пэстэ, ай важ кодэва, ко муля пала лэндэ и жунделя.
16 Важ када амэ будэр ни пэр кастэ на диқас кадя, сар диқэн и мануша. Дажэ если варикала амэ кадя диқасас по Христос, то акана амэндэ паруделя о гиндо.
17 Кочай кодэва, кастэ ек гиндо лэ Христоса, — ашэл нэвэ манушэса. О пурано оджыля, ай о нэво авеля.
18 Но вся када лэ Дэвлэстар, саво примирисайля амэнца через о Христос и бишалдя тэ поможысарас аврэнди тэ примиринпэ лэса.
19 Аврэ алавэнца, о Дэл через о Христос примирисайля лэ мироса, и во на дошалярэл лэ манушэн важ лэндири дила, ай амэнди о Дэл дя тэ росԥэнас пала кода, кай камэл тэ примирийпэ лэ мироса.
20 Важ када амэ — лэ Дэвлэстирэ мануша*, савэн бишалдэ лэ Христостирэ алавэстар. Через амэндэ о Дэл взвийпэ каринг и мануша. Лэ Христостирэ алавэстар амэ мангас лэ мирос: «Примиринпэ лэ Дэвлэса».
21 О Христос ни еқвар на шылисайля, и о Дэл отдя лэс сар жэртва пала амаро бэзэх, кай через лэстэ амэ тэ ашас уӷодни* англа Дэл.
