2 Тимафеё 1:1-18
1 Мэ, о Павло, лэ Христоско лэ Исусоско апостало, сар када сас уӷодно лэ Дэвлэсти и сар во дя алав пала жызня, сави амэндэ можэт тэ авэл через о Христос Исусо.
2 Мэ пистросарав лэ Тимафеёсти, мэрнэ любимонэ шавэсти.
Мэк о Дэл, амаро Дад, и о Христос Исусо, амаро Баро Хулай, здиқэн пэр тутэ па пэско баро ковло ди, авэн одялэ каринг тутэ и дэн мирно жызня.
3 Мэ блаӷодарисарав лэ Дэвлэс, кастири дила мэ терав, сар мэрнэ ԥурэ, и терав кадэя дила вужэ одеса. Мэ вся и время, о дес и рят, ԥэнав пала тутэ, кала мангавпэ всаворэ́ одеса.
4 Мэ сэрав пала тирэ ясва и фартэ камав тэ диқав тут, кай тэ лошавав всаворэ́ одеса.
5 Мэ сэрав, сар па чачимастэ ту патясас. Спэрва кадя патялас тири баба и Лаи́да и тири дэй и Евни́ка, и мэ ӷанав, кай ту патяс кадя жэ.
6 Кочай инке еқвар шув сама: мэк на́ мудардёл сар яг кодэя бах, сави випэля тути лэ Дэвлэстар, кала мэ стодэм пэр тутэ и вас.
7 Важ кода кай о Дэл через пэско свынто зор на шол амэн андэ дар, ай дэл тэ авас зоралэ, тэ любисарас и здраво* тэ гиндосарас.
8 Ни акэ, на́ лажа тэ росԥэнэс пала амаро Баро Хулай, на́ лажа и мандар, кодэлэстар, ко бэшэл андо баруно важ лэстэ. Но надеисав пэ лэ Дэвлэско зор, кай тэ авэс ӷотово тэ пэрэандярэс о ԥаримос важ и лащи новость.
9 Во спасысардя амэн и витидя, кай амэ тэ авас свынти. Во витидя амэн най важ и лащи дила, ай па пэско баро гиндо и па пэско баро ковло ди. Во инке фартэ дэлмут закамля тэ здиқэл пар мэндэ па пэско баро ковло ди через о Христос Исусо.
10 Но акана инке май драго дицол, саво дэ баро ковло ди кай о Дэл, через кода, кай сыкаделя о Христос Исусо, саво спасый амэн. Во уля и смэрть и через и лащи новость дя тэ ӷанас, через со амэндэ можэт тэ авэл жызня и тэ дорэсэлпэ и тила, сави на стернёл.
11 И кай тэ росԥэнав кадэя новость, мэ сымас стодо сар ходако важ лэ Дэвлэстири дила, апостало и учителё.
12 Важ када мэ и пэрэандярав о ԥаримос, но мэ на лажав, важ кода кай мэ ӷанав кодэлэс, андэр кастэ патяем, и патяв, кай во сможэт тэ фэрий вся, со мэ отдэм лэсти, жы каринг о дес важ о сындо.
13 На́ оджа лэ примеростар важ и правильни* алава, савэ ту ашундян мандар. Старысав тэ патяс и тэ любис кадя, сар сытелян через кода, кай андярэс лэ Христостири лэ Исусостири время.
14 Тути сас дино кода, со куч, и драго фэрисар када через о свынто зор, саво исин амэндэ.
15 Ту ӷанэс, кай андэ Азия всаворэ одбанделэ мандар, например о Фиге́ло и о Гермаге́но.
16 Мэк о Баро Хулай авэл одяло каринг лэ Анисифороско ери, важ кода кай во най еқвар придэлас манди зор и на лажалас кодэлэстар, кай пэр мандэ шутэ и цэпоря.
17 Ай кала во сас андо Ри́мо, во всаворэ́ одеса родэлас ман, пока на виарақля.
18 Мэк о Баро Хулай о Иегова* авэл одяло каринг лэстэ, кала авэла о дес важ о сындо. Важ кода кай ту драго ӷанэс, сар дэ бут во стердя важ мандэ андо Ефе́со.
