2 Фесалоники 1:1-12
1 Мэ, о Павло, ай кадяжэ о Силуа́но и о Тимафеё, пистросарас лэ ӷуртости андэ Фесало́ники, савэстэ ек гиндо лэ Дэвлэса, амарэ Дадэса, и лэ Барэ Хуласа лэ Исусоса лэ Христоса.
2 Мэк о Дэл, амаро Дад, и о Баро Хулай о Исусо Христос, здиқэн пэр тумэндэ па пэско баро ковло ди и дэн мирно жызня.
3 Ԥрала, амэ трэбуй вся и время тэ блаӷодарисарас пала тумэндэ лэ Дэвлэс. И када правильно, важ кода кай тумэ лэн май састэс тэ патян и май фартэ тэ любин ек еқэс.
4 Кочай амэ абуримаса росԥэнас пала тумэндэ андэ лэ Дэвлэстирэ ӷурторя, пала кода, кай тумэ ашэнпэ састэ и на парашэн тэ патян, кала тумэн ӷонин и кала терэлпэ бида.
5 Вся када доԥэнэн, кай о Дэл справедливо и кай тумэ ашэна достойни тэ авэн андэ лэ Дэвлэско Царство, важ саво тумэ и пэрэандярэн бида.
6 О Дэл справедливо, важ када во спушэла кодэлэндар, ко терэл тумэнди вэрыто.
7 Ай тумэн, ко пэрэандярэл и ԥари время, во спасыя вместе амэнца, кала о Баро Хулай о Исусо сыкадёла па небо пэстирэ зоралэ анӷелонэнца.
8 Во сыкадёла андэ яг, сави марэл половняса, и рия кодэлэнди, ко на ӷанэн лэ Дэвлэс, и кодэлэнди, ко на приашундёл каринг и лащи новость пала амаро Баро Хулай о Исусо.
9 Лэнди виандярэна о сындо, и лэн будэр никала на авэла. О Баро Хулай одбандёла лэндар, и вонэ будэр на диқэна лэско баро зор.
10 Кала во авэла, кай тэ ашэл ашунгло пэстирэ свынтонэнца, всаворэ, ко патяя андэр лэстэ, лэна тэ диқэн пэр лэстэ ԥэрнадэ муеса. И тумэ авэна машкар лэндэ, важ кода кай тумэ патяе кодэлэсти, со амэ росԥэндям.
11 Важ када амэ вся и время мангаспэ пала тумэндэ и мангас, кай важ амаро Дэл тумэ тэ ашэн достойни тэ андярэн и жызня, важ сави во витидя тумэн. Кадяжэ амэ мангас, кай во пэстирэ зорэса тэ стерэл вся о лашымос, саво лэсти уӷодно, и тэ блаӷословий тумэн андэ дила, сави тумэ терэн через кода, кай патян.
12 Тоди амарэ Барэ Хуласко лэ Исусоско алав ашэла ашунгло через тумэндэ и тумэ ашэна ашунглэ. Кадя авэла через кода, кай тумэндэ ек гиндо лэса и важ кода, кай амаро Дэл и амаро Баро Хулай о Исусо Христос здиқлэ пэр тумэндэ па пэско баро ковло ди.
