Письмо андэ Галатия 1:1-24
1 Када о Павло, савэс стодэ тэ авэл апостало най и мануша, ай о Исусо Христос и о Дэл, амаро Дад, саво лэс жундярдя,
2 ай кадяжэ всаворэ ԥрала, савэ манца, — амэ пистросарас лэ христианонэнди* па вся область Гала́тия.
3 Мэк о Дэл, амаро Дад, и о Исусо Христос, амаро Баро Хулай, здиқэн пэр тумэндэ па пэско баро ковло ди, и дэн тумэнди мирно жызня.
4 О Христос отдя пэстири жызня пала амаро бэзэх, кай тэ спасый амэн кадэла найлащя люматар. Када сас уӷодно амарэ Дэвлэсти и Дадэсти.
5 Тэ авэл во ашунгло о вико вечно. Аминь.
6 Ман удивий, кай тумэ кадя ӥто одбандён кодэлэстар, ко пашардя* тумэн каринг пэстэ через о Христос, савэстэ баро ковло ди, и ашунэн авэр лащи новость.
7 Ай амэ ӷанас, кай нинай авэр лащи новость, исин кати и мануша, савэ терэн тумэнди ԥаримос и камэн тэ пэрэбандярэн и лащи новость пала Христос.
8 Но дажэ тэ росԥэндоп тумэнди варико андар мэндэ или о анӷело па нэбо най кодэя лащи новость, сави росԥэндям амэ, мэк дэл пэр лэстэ и бида.
9 Ԥэнава инке еқвар кода, со ужэ ԥэндэмас: ко росԥэнэн тумэнди най кодэя лащи новость, каринг сави тумэ приашунделэ*, мэк дэл пэр лэстэ и бида.
10 Англа кастэ мэ щяс камав тэ затерав лашо алав: англа миро или англа Дэл? Старысавав мэ тэ уӷодисарав лэ мирости? Тэ старысайлоп мэ идоси тэ уӷодисарав лэ мирости, тоди мэ на авелоп лэ Христоско рабо.
11 Камав тэ доандярав тумэнди, ԥрала, кай и лащи новость, сави мэ росԥэндэм тумэнди, жал най лэ манушэндар.
12 Мэ уӷанглэм ла най лэ миростар и най и мануша ман сытярдэ — пала латэ манди дя тэ ӷанав о Исусо Христос.
13 Тумэ точно ашундэ, сар мэ пэс андяравас, кала сымас андэ иудейско вера: мэ баря холяса ӷонисаравас лэ Дэвлэско ӷурто, важ кода кай камлэм тэ стрисарав лэс па ԥув.
14 Мэ домарделэм андэ иудейско вера май бут, чем када вижыля кай авэр* ровэсникоря анда мэрно народо, важ кода кай мэ баря хваткаса ритяравас лэ ԥурэнго законо*.
15 О Дэл, саво мэкля ман пэ люма и ақардя па пэско баро ковло ди, закамля
16 через мандэ тэ поможый аврэ народонэнди тэ уӷанэн пала лэско Шаво, кай мэ тэ росԥэнав лэнди и лащи новость пала лэстэ. Кала мэ уӷанглэм пала када, мэ на лэм сразу жэ тэ пушавпэ кай и мануша.
17 И мэ на жылэм андо Иерусалимо кодэлэндэ, ко ашэлэ апосталоря жы каринг мандэ. Мэ жылэм андэ Ара́вия и посли када рисайлэм андо Дама́ско.
18 Потом, через трин бэрш, мэ жылэм андо Иерусалимо тэ диқав лэ Кифас* и сымас лэса 15 деса.
19 Мэ на диқлэм будэр никас анда апосталоря, кати лэ Иаковос, лэ Христостирэ* ԥралэс.
20 О Дэл потвердий: вся, со мэ пистросарав тумэнди, — чачимос.
21 Тоди мэ жылэм андэ Си́рия и андэ Килики́я.
22 Но лэ Христостирэ ӷурторя* андэ Иуде́я на ӷанэнас ман па муй.
23 Вонэ кати ашундэсас аврэндар: «Кодэва, ко ӷонияс амэн и старыияспэ тэ стрий па ԥув кадэя вера, акана росԥэнэн и лащи новость».
24 И вонэ линэ драго тэ дэн дума пала Дэл, кала уӷанглэ пала мандэ.
Сноски
^ Или «андэ ӷурторя; андэ собрании».
^ Или «ақардя».
^ Или «андэ сави тумэ патяе».
^ Или «бут авэр».
^ Или «лэ ԥурэндирэ традицыи».
^ Кадяжэ лэс ӷанэн тала алав Пётро.
^ Или «лэ Барэ Хуластирэ».
^ Или «и христианоря».
