Письмо андэ Галатия 3:1-29
3 Найгодявэрнэ галаторя! Ко опхохадя тумэн? Тумэнди драго динэ тэ полэн, состэ о Исусо Христос муля по столбо.
2 Пала ек камав тэ пушав тумэндар. Васо тумэнди сас дино о свынто зор: кай ритярэн о законо или кай патяе андэ кода, со ашундэ?
3 Тумэ чаче кацавэ найгодявэрнэ? Линэ тэ терэн вся па лэ Дэвлэстирятэ, ай акана доандярэн и дила, сар када терэн лэ бэзэхэстирэ мануша?
4 Тумэ чаче евья пэрэандярдэ скати ԥаримос? Нэ можэт вся када тэ авэл евья!
5 Васо кодэва, ко дэл тумэнди о зор и сыкавэл машкар тумэндэ чудеса, терэл вся када? Важ кода, кай тумэ ритярэн о законо, или важ кода, кай патяе андэ кода, со ашундэ?
6 Погиндон пала Авраамо, саво «патяя лэ Иеговасти, и во прижангля лэс найдошалэса».
7 Тумэ точно ӷанэн, кай лэ Авраамостирэ шавэ — када кодэла, ко патял.
8 О Дэл май данглал ԥэндя через и Свынти Лила, кай прижанэна найдошалэнца лэ манушэн анда авэр народоря, если вонэ патян. И инке жы каринг када во ԥэндя кадэя лащи новость лэ Авраамости: «Через тутэ блаӷословинапэ всаворэ народоря».
9 Кочай кодэлэн, ко патял, блаӷословина кадя жэ, сар и лэ Авраамос, саво патяя.
10 Пэ всаворэ, ко надеийпэ по законо, можэт тэ дэл и бида, важ кода кай пистромэ: «Тэ дэл и бида пэ кодэва, ко на ритярэл вся, со пистромэ андо законо».
11 Тай инке, драго дицол, кай никас на прижанэна найдошалэса англа Дэл через о законо, важ кода кай «кодэва, ко андярэл пэс правильно, лэла тэ жувэл, если на парашэл тэ патял».
12 Ай важ о законо на трэбуй, кай о мануш тэ патял, но «кодэва, ко лэс ритярэл, лэла тэ жувэл через лэстэ».
13 О Христос витиндя амэн и спасысардя кодэлэстар, кай пар мэндэ тэ на дэл и бида через о законо. Када пэр лэстэ вместо амэндэ дя и бида, важ кода кай пистромэ: «Бибахтало кодэва, ко амбладёл по столбо».
14 Вся када трэбуй сас, кай через о Христос Исусо лэ Авраамостири блаӷословения тэ пэрэжал и пэ авэр народоря. Тоди через кода, кай амэ патяс, амэнди тэ авэл дино о зор, пала саво сас ԥэндо.
15 Ԥрала, призындярава ек примеро анда жызня: если варико варикаса доԥэнделя и посли када сас дино солах и динэ о вас, қанч дажэ если лэ манушэса, тоди када нико нэ можэт тэ пэрэмарэл или кадэлэстар тэ отԥэндёл.
16 Ни акэ, о Дэл дя алав лэ Авраамости и лэстирэ бэятости. Андэ Свынти Лила на ԥэнэнпэ: «И тирэ бэятонэнди*», со сыкадоп пэ бутэндэ. Но котэ ԥэндо пала еқэстэ: «И тирэ бэятости», — када о Христос.
17 Но кода, кай о Дэл через 430 бэрш дя о законо, на сыкадя, кай во на приритярдёл пэстиря солахати и о алав, саво во дя, на хасардя пэско зор.
18 Важ кода кай если и блаӷословения дорэсэлпэ через о законо, тоди када ритярдёл най по алав, саво дя о Дэл. Но о Дэл, кай лэстэ баро ковло ди, дя алав лэ Авраамости, кай лэсти тэ дорэсэлпэ и блаӷословения.
19 Ай состэ тоди о законо? Ӷэт май интя о Дэл дя амэнди о законо, кай через лэстэ тэ дицол и вэрыто дила. Кадэва законо трэбуй сас, пока анда лэ Авраамоско колено на авеля о бэято, савэсти сас дино алав. О Дэл дя кадэва законо лэ анӷелонэнди, савэ пэрэдинэ лэс через о помошнико.
20 Но кала и солах жал еқа ригатар, тоди ужэ на трэбуй кодэва, через кастэ дэлпэ о вас*. Ай о Дэл вся стердя екжэно.
21 Вижал со, чаче о законо на зжалпэ кодэлэса, пала со о Дэл дя алав? Най! Важ кода кай тэ авелоп кай и мануша о законо, саво дэл и жызня, тоди лэн прижанглоп найдошалэнца через о законо.
22 Но через и Свынти Лила амэ ӷанас, кай пэ всаворэ ля тэ хулаий о бэзэх. Кочай, кодэлэндэ, ко патял андо Исусо Христос, авэла блаӷословения, пала сави о Дэл дя лэнди алав.
23 Но жы каринг кода, сар амэ тэ патяс андо Христос, амэн фэрияс о законо, и во хулаияс пар мэндэ, пока амэ аштярасас и время, андэ сави о Дэл дэла пала када тэ ӷанас.
24 Кадя, о законо ля тэ диқэл пала амэндэ сар пала бэяцэ, кай тэ андярэл каринг о Христос. Тоди амэн моӷут тэ прижанэн найдошалэнца через кода, кай патяс.
25 Но акана, кала амэ патяям андо Христос, о законо парашэля тэ диқэл пала амэндэ сар пала бэяцэ.
26 Всаворэ тумэ лэ Дэвлэстирэ шавэ, важ кода кай патян андо Христос Исусо.
27 Всаворэ тумэ, ко болделя, кай тэ авэл лэ Христоско, ашэлэ кацавэ жэ, сар о Христос.
28 Нэважно, ко ту — евреё или греко, рабо или свободно, мурш или жувли, важ кода кай всаворэ тумэ ек вмести лэ Христоса лэ Исусоса.
29 И если тумэ прижан лэ Христости, тоди тумэ бэяцэ анда лэ Авраамоско колено, и тумэнди дорэсэлапэ о лашымос, пала саво о Дэл дя алав.
