Письмо лэ евреёнэнди 11:1-40
11 Тэ патяс — када састэс тэ аштярэс, кай вся ашэла кадя, сар надеиспэ, и драго тэ доԥэнэс, кай исин кода, со на дицол.
2 Кала кадя патянас и мануша, савэ жувэнас андэ дэлмутни время, о Дэл сыкадя лэнди, кай вонэ уӷодни лэсти.
3 Амэ патяс и через када полас, кай вся по нэбо и пэ ԥув сас стердо кадя, сар ԥэндя о Дэл. Через кода, со на дицол, о Дэл стердя кода, со амэ можэм тэ диқас.
4 О А́велё патялас и через када андя лэ Дэвлэсти май кучутни жэртва, чем о Ка́ино. Во патялас и через када о Дэл сыкадя лэсти, кай во вся терэл правильно англа лэстэ, важ кода кай о Дэл приля кода, со во андя. Во патялас и через када во идоси дэл дума, хоть и муля.
5 О Ено́хо патялас и через када сас пэрэандярдо, кай тэ на диқэл и смэрть, и лэс нико нэ моӷ тэ виарақэл, важ кода кай о Дэл заля лэс. Но англа кода сар во сас пэрэандярдо, о Дэл сыкадя лэсти, кай во уӷодно лэсти.
6 Ай если на патяс, амэндэ на вижала тэ уӷодисарас лэ Дэвлэсти. Кодэва, ко камэл тэ ашэл май пашэ каринг о Дэл, трэбуй тэ патял, кай о Дэл исин и кай во блаӷословий кодэлэн, ко старыийпэ тэ андярэл лэстири время*.
7 О Ноё патялас и через када кангля лэ Дэвлэс, кала о Дэл май данглал ԥэндя лэсти пала кода, со инке на дицолас, и построисардя о ковчеӷо, кай тэ спасыйпэ лэско ери. Кала патяя, во сыкадя, кай и люма затердя о сындо, и важ кода кай во патяя, о Дэл прижангля лэс найдошалэса.
8 О Авраамо патялас и через када кангля лэ Дэвлэс, кала о Дэл ԥэндя лэсти тэ жал пэ кодэва краё, саво лэ Авраамости трэбуй сас тэ дорэсэлпэ. Во жыля, хоть и на ӷанэнас, каринг жал.
9 Во патялас и через када жувэлас пэ кодэва краё, пала саво лэсти сас дино алав, сар по чужо краё. Во жувэлас андэ катуны лэ Исакоса и лэ Иаковоса, савэнди о Дэл тожэ дя алав тэ дэл кодэва краё.
10 Важ кода кай во аштярэлас о форо, саво састэс тердёл, — лэс стердя и строисардя о Дэл.
11 И Са́рра патялас и через када ля тэ аштярэл тэ анэн бэятос*, хоть ужэ сас ԥури. Вой патялас, кай кодэва, ко дя алав, зритярэла лэс.
12 Важ када еқэ манушэстар, лэ Авраамостар, саво, можно тэ ԥэнас, сас муло, арақаделэ бут бэяцэ — кадя бут, сар и черӷая по нэбо и сар о чишай по бэрэӷо.
13 Всаворэ вонэ мулинэ, но на парашэлэ тэ патян, хоть лэнди и на дорэсляпэ кода, пала со сас дино алав. Но вонэ диқэнас здурал кода, пала со сас дино алав, лошавэнас и ԥэнэнас, кай вонэ чужи и жувэн пэ кодэва краё найпэдолӷонэстэ.
14 Кодэла, ко кадя дэл дума, сыкавэн, кай камэн тэ попэрэн андэ кодэва ҭан, саво ашэла лэнго цэр.
15 Ай тэ гиндосардоп вонэ вся и время пала ҭан, саво ашадэ, тоди виарақлоп возможность тэ ринпэ.
16 Но вонэ цырдэнпэ каринг о май лашо — каринг кода, со прижал лэ нэбости. Важ када лэ Дэвлэсти най лажаво, кай вонэ прижанэн лэс сар пэстирэ Дэвлэс, во дажэ стодя важ лэндэ форо.
17 О Авраамо патялас и через када, во, можно тэ ԥэнас, андя сар жэртва лэ Исакос, кала о Дэл закамля тэ диқэл, сар во андярэла пэс. Да, кодэва, ко лошавэлас, кай лэсти солахадя о Дэл, сас ӷотово тэ анэн андэ жэртва пэстирэ еқэ шавэс.
18 Во жыля пэ када, хоть о Дэл ԥэндя лэсти: «О ери*, пала саво мэ тути дэм алав, арақадёла через о Иса́ко».
19 Но о Авраамо патялас, кай о Дэл можэт тэ жундярэл лэстирэ шавэс, и во, ԥэнэса сас рисардо важ лэстэ анда мулэ, и када сыкадя, со авэла англэ.
20 О Иса́ко патялас и через када дя блаӷословения лэ Иаковости и лэ Исавости, кала росԥэндя лэнди пала время, сави авэла англэ.
21 О Иа́ково патялас и через када во англа смэрть дя блаӷословения кажнонэ лэ Иосифостирэ шавэсти и тэлеля лэ Дэвлэсти, кала ритярдёлас пала рувли.
22 О Ио́сифо патялас и через када, кала поджыля лэстири время, во ԥэндя, кай и израильтяноря вижана анда Египто, и приԥэндя лэнди, сар лэс тэ притидэн*.
23 Лэ Маисеёстирэ родителя патянас и через када, кала во арақаделя, гаравэнас лэс трин шон, важ кода кай диқлэ, кай о бэято шукарно, и на дарайлэ лэ царёстирэ законостар.
24 О Маисеё патялас и через када, кала вибареля, во отԥэнделя тэ авэл лэ египицконэ царёско внуко.
25 Во на витидя тэ лошавэл лэ бэзэхэсти набут время, ай витидя тэ мучийпэ лэ Дэвлэстирэ народоса.
26 О лажаимос, саво во пэрэандярэлас сар о особено*, во цэнияс май фартэ, чем о египецко барвалимос, важ кода кай цырдэласпэ пала блаӷословения*.
27 Во патялас и через када ашадя о Египто и на дарайля лэ царёстиря холятар. Во ашэласпэ састо андэ ԥари время, ԥэнэса диқэлас Кодэлэс, кас на дицол.
28 Во патялас и через када справисардя и Патради и опшутя ратэса и косякоря пэ двэри, кай лэ Дэвлэско анӷело тэ на умарэл лэ израильтянонэндирэ барэдэрэ шавэн.
29 И израильтяноря патянас и через када пэрэжылэ и Лоли моря, сар па шуки ԥув, ай и египтяноря, кала камлэ тэ стерэн кадя жэ, потасылэ.
30 И израильтяноря патянас и через када пэлинэ и стины андо Ерихоно, посли кода сар вонэ обжанас лэн всаворэ семь деса.
31 И шоварка Раа́в патялас и через када на хынделя кодэлэнца, ко на кангля лэ Дэвлэс, важ кода кай вой драго шутя сама кодэлэн, ко авеля тэ розуӷанэн пала кодэва краё.
32 Со инке тэ ԥэнав? Манди на хутилэла время, кай тэ росԥэнав пала Гедео́но, пала Вара́ко, пала Самсо́но, пала Ефа́ё, пала Давидо, ай кадяжэ пала Самуи́ло и пала авэр лэ Дэвлэстирэ особи мануша*.
33 Вонэ патянас и через када побединас лэ царёнэн, зашонаспэ пала правильно дила, лэнди солаханас, вонэ ԥандавэнас и муя лэ левонэнди,
34 на сԥабонас андэ яг, спасынаспэ ла шурятар, анда би зорэстирэ ашэнас зоралэ, би дарако марэнаспэ, ӷонинас лэ вороӷонэн.
35 Лэ жувлянди ринас лэндирэ чачен, савэ сас жундярдэ. Ай аврэн фартэ мучинас, важ кода кай вонэ на соӷласисайлэ тэ отԥэндён лэ Дэвлэстар. Вонэ аштярэнас, кай лэн тэ жундярэн каринг и май лащи жызня.
36 Варико пэрэандярдя авэр ԥаримос — лэндар приасанаспэ, лэн зашындярэнас чукняса и дажэ шонас пэр лэндэ цэпоря и стонас андо баруно.
37 Лэн помарэнас барэнца, пэр лэндэ тасавэнас, лэн роспилинас, вонэ хындёнас ла шурятар, ԥиравэнас бакрани и бузняни мурцы, жувэнас чорорэс, пэрэандярэнас и бида и виритярэнас, кала лэнца жэстоко обжанаспэ.
38 И люма лэн на ашэлас. Вонэ жувэнас андэ пустыни и андэ плая, гарадёнас па пещеры и па ԥарадэ плая.
39 И хоть вонэ патянас и через када о Дэл сыкадя лэнди, кай вонэ уӷодни лэсти, нико андар лэндэ на диқля, сар вся ашэля кадя, пала со о Дэл дя алав.
40 Кадя о Дэл загиндосардя важ амэндэ варисо май лашо, кай вонэ тэ на спасынпэ лэ бэзэхэстар би амаро.
Сноски
^ Или «родэл лэс».
^ Или «заԥирдя».
^ Или «и бэяцэ».
^ Или «тэ виандярэн котар лэстирэ кокаля».
^ Или «избрано».
^ Или «наӷрада».
^ Или «авэр мануша, савэ пэрэдэнас и дэвликунэ алава».
