Письмо лэ евреёнэнди 12:1-29
12 Ни акэ, машкар амэндэ, сар бари туча, исин кацаво баро круӷо мануша, савэ росԥэнэн пала кода, со диқлэ и ашундэ*. Важ када сшам пар пэстэ вся, состар ашэл май ԥарэс, ай кадяжэ о бэзэх, саво кадя вушэро можэт тэ сԥандэл амэн, и на ласа тэ здаспэ и прастам па дром, саво англа амэндэ.
2 Амэ трэбуй тэ диқас кати по Исусо — пэ амаро Барэдэр и Помошнико, саво дэл амэнди зор тэ лас тэ патяс и поможый тэ патяс инке май фартэ. Во ӷанэнас, кай англэ лэс аштярэл о лашымос, важ када во на дарайля лэ лажаимастар и састэс виритярдя и бида, кала лэс казнисардэ по столбо, и посли када бэшля справа лэ Дэвлэстар.
3 Да, кай тумэ тэ на вимардён анда зор и тэ здэнпэ*, погиндон пала примеро кодэлэско, ко ашэляпэ састо, кала пала лэстэ абисо дэнас дума и бэзэхэстирэ мануша, савэ кацавэ алавэнца сындосардэ корко пэс.
4 Тумэ боринпэ лэ бэзэхэса, но тумэ инке на марэнаспэ жы ратэстэ.
5 Тай инке тумэ совсем бистэрдэ, со тумэнди, сар пэстирэ шавэнди, потԥэндя о Дэл: «Мэрно шаво, на́ одбандюв, кала сытярэл о Иегова, и на́ умэк и вас, кала во дэл тути годи,
6 важ кода кай о Иегова просытярэл кодэлэс, кас любий. Во дажэ спушэл кажнонэстар, кас прилэл сар шавэс».
7 Састэс пэрэандярэн и ԥари время, важ кода кадя о Дэл сытярэл тумэн. Во обжалпэ тумэнца сар пэстирэ шавэнца, ай любо дад сытярэл пэстирэ шавэс.
8 Но если о Дэл тумэн на сытярэл, вижал, тумэ най шавэ, ай нэзакони бэяцэ.
9 Амарэ дада просытярэнас амэн, и амэ стасас пэр лэндэ патив. Тоди на трэбуй амэ инке май фартэ тэ кандас лэ Дадэс, саво дэл амэнди жызня через пэско свынто зор, кай амэ тэ жувас?
10 Вонэ сытярэнас амэн набут время и терэнас када кадя, сар па лэндирятэ сас правильно, но во сытярэл амэн важ амари блаӷополучия, кай амэ тэ авас свынти, сар во.
11 Да, кала амэн просытярэн, када на радуий, ай терэл ԥарэс, но, если амэ приашундювас, када анэн амэнди лашымос — амэ жувас мирно и андярас правильно жызня.
12 Важ када придэн зор кодэлэнди, кастэ умэклэпэ и вас и затиносайлэ и пэрнэ,
13 и жан ворта па дром, кай о лангано пэрно тэ на зжал па ҭан, ай тэ ашэл зорало.
14 Старыинпэ тэ ладин всаворэнца, ай кадяжэ тэ ашэн свынти, важ кода кай би кадэлэско нико на диқэла лэ Барэ Хулас.
15 Мэк кажно андар тумэндэ фэрийпэ, кай о Дэл тэ на парашэл тэ здиқэл пэр лэстэ па пэско баро ковло ди. Ай кадяжэ диқэн, кай машкар тумэндэ тэ на пробарёл о ядовито корнё, саво тердоп тумэнди вэрыто и маӷрисардоп бутэн.
16 Инке диқэн, кай машкар тумэндэ тэ на авэн мануша, савэ цырдэнпэ тэ терэн билажавардимос, или тэ на авэн кодэла, ко на цэний кода, со свынто, сар о Иса́во, саво важ о чаро юшка* отԥэнделя кодэлэстар, пэр со лэстэ сас право сар барэдэрэ шавэстэ.
17 Тумэ ӷанэн, кай ӷэт май интя, кала во закамля тэ лэл и блаӷословения, во сас отшуто. Хоть во ясвэнца мангэлас лэ дадэстар тэ парувэл пэско алав, када на поможысардя.
18 Тумэ пашэлэ най каринг о плай, саво дицол, най каринг и яг, сави ԥабол, най каринг и туча, най каринг и бари тэмнота, най каринг и бари балвал,
19 най каринг о звуко ла трубатар и най каринг о ӷолосо, саво проԥэнэн и алава. Кала и мануша ашундэ кадэва ӷолосо, вонэ линэ ясвэнца тэ мангэн, кай во будэр нисо лэнди тэ на ԥэнэн.
20 Важ кода кай вонэ пэрэдарайлэ, кала ашундэ: «Если дажэ о жывотно уштавэла по плай, лэс трэбуй тэ помарэн барэнца».
21 Кадэлэстар лэн кадя шолас андэ дар, кай о Маисеё ԥэндя: «Мэ дарав и тиносавав».
22 Но тумэ пашэлэ каринг о плай Сио́но, и каринг лэ жундэ Дэвлэско форо — каринг о небесно Иерусалимо, ай кадяжэ каринг и бут тысячи анӷелоря,
23 савэ стидэ́пэ ӷуртом, и каринг лэ барэдэрэ шавэнго ӷурто, кастирэ алава запистромэ по нэбо, и каринг о Дэл — каринг о всаворэнго Сындомари, и каринг и мануша, па савэ злинэ и дош и савэ через о свынто зор андярэн правильно жызня,
24 и каринг о Исусо, через саво о Дэл до дуйто дя о вас, и каринг о рат, савэса опшон и саво дэл дума фэдэр, чем лэ Авелёско рат.
25 На́ отԥэндён тэ ашунэн кодэлэс, ко дэл дума. Кодэла, ко отԥэнделя тэ ашунэл лэ Дэвлэстирэ алава, савэ ашундёнас пэ ԥув, на спасысайлэ, и тоди точно на спасысаваса амэ, если одбандюваса кодэлэстар, ко дэл дума по нэбо.
26 Тоди лэстирэ ӷолосостар пэрэтиносайлясас и ԥув, ай акана во дэл алав: «Мэ инке еқвар пэрэтиносарава най кати и ԥув, но и о нэбо».
27 О алав «инке еқвар» сыкавэл, кай о Дэл улэла кода, со тинойпэ, — со стердо най лэстирэ вастэнца, — кай тэ ашэлпэ кода, со састэс тердёл.
28 Амэ ӷанас, кай амэнди дорэсэлапэ о Царство, саво састэс тердёл, важ када давайте тэ авас достойни, кай о Дэл тэ здиқэл пар мэндэ па пэско баро ковло ди, через со амэ можэм тэ терас лэ Дэвлэстири дила кадя, сар лэсти уӷодно, дараса и пативаса.
29 Важ кода кай амаро Дэл сар яг, савятар ашэлпэ ек о пепло.
