Письмо лэ евреёнэнди 3:1-19
3 Ни акэ, свынти ԥрала, савэн о Дэл ақардя тэ жан по нэбо, погиндон пала Исусо, савэс амэ прижанглям сар апосталос и ӷлавнонэ рашас.
2 Во кандэлас лэ Дэвлэс, саво дя лэсти тэ терэл кадэя дила, сар кандэлас и о Маисеё, кала терэлас дила андэ лэ Дэвлэско цэр.
3 Но о Исусо трэбуй тэ авэл май ашунгло, чем о Маисеё, важ кода кай кодэва, ко вазгля о цэр, затерэл май бари патив, чем о цэр.
4 Кажно цэр варико строисардя, ай кодэва, ко вся построисардя, — када о Дэл.
5 О Маисеё сас кандино слуӷо андэ лэ Дэвлэско цэр, и кодэя дила, сави во терэлас, сыкавэлас пэ кода, пала со трэбуй сас тэ росԥэнэн англэ.
6 Ай о Христос сас кандино шаво, саво сас стодо тэ диқэл пала лэ Дэвлэско цэр. Кадэва цэр — амэ, если кати никала на парашаса састэс тэ ритярдювас пала амари надия, савяса абуросарас, и на парашаса смило тэ дас дума.
7 Важ када через о свынто зор сас ԥэндо: «Кати тэ ашунглоп тумэ адес кодэлэс, ко дэл дума:
8 „На́ тердён пэ пэско, сар када стердэ тумарэ папоря. Вонэ фартэ холярдэ ман андэ кодэва дес андэ пустыня,
9 кала камлэ тэ виандярэн ман андар пэстэ, хоть вонэ 40 бэрш диқэнас мэрни дила.
10 Акэ васо кодэва миро ашэля манди гряца и мэ ԥэндэм: ‚Лэндэ найкандино ди, вонэ на ӷанэн мэрнэ дрома‘.
11 Кочай мэ анда холи солахадэм: ‚Мэ на домэкава лэнди тэ отцыён андэ ек ҭан манца‘“».
12 Ԥрала, диқэн, кай тумэ тэ на дурён лэ жундэ Дэвлэстар и кай через када тумаро ди тэ на ашэл вэрыто и тэ на парашэл тэ патял.
13 Но придэн зор ек еқэсти кажно дес, пока инке жал «адесутно дес», кай тумэ тэ на лэн тэ тердён пэ пэско через о бэзэх, саво можэт тумэн тэ опхохавэл.
14 Важ кода кай амэнди дорэсэлапэ кода жэ, со исин кай о Христос, кати тоди, если на парашаса тэ патяс, сар амэ патясас спэрва.
15 Пала када сас ԥэндо: «Кати тэ ашунглоп тумэ адес кодэлэс, ко дэл дума: „На́ тердён пэ пэско, сар када стердэ тумарэ папоря. Вонэ фартэ холярдэ ман».
16 Ко ашундя лэ Дэвлэс и всаек фартэ лэс холярдя? Хэба най всаворэ, кас о Маисеё виандярдя анда Египто?
17 Кастар лэ Дэвлэсти сас гряца 40 бэрш? Хэба най кодэлэндар, ко терэлас бэзэх и муля андэ пустыня?
18 И касти во солахадя, кай на домэкэла лэнди тэ отцыён андэ ек ҭан лэса? Хэба най кодэлэнди, ко на кандэлас?
19 Ни акэ, амэ диқас, кай вонэ на попэлинэ интя, важ кода кай на патяе.
