Письмо лэ евреёнэнди 7:1-28
7 Кадэва Мелхиседэ́ко, лэ Салимоско царё, лэ Барэ ДэвлэскоЕк рашай, диқляпэ лэ Авраамоса, саво рияспэ посли кода, сар победисардя лэ царёнэн, и блаӷословисардя лэс,
2 и о Авраамо дя лэсти анда вся десято часть. Лэско алав сыкавэл «справедливо царё», ай инке во лэ Салимоско царё, со сыкавэл «мирно царё».
3 Амэ на ӷанас, ко лэско дад и лэсти дэй, анда саво во колено, кала во арақаделя и кала муля. Андэ када во шолпэ пэ лэ Дэвлэско Шаво и вечно ашэлпэ рашаса.
4 Погиндон, пэскати дэ баро сас кадэва мануш — кодэва, касти о Авраамо, лэ ереско хулай, дя и десято часть анда со май лащи добись.
5 Кодэла лэ Левиёстирэ шавэ, савэ сас стодэ рашанца, трэбуй сас, сар ԥэнэнпэ андо законо, тэ стидэн и десято часть па народо — па пэстирэ ԥрала, — хоть вонэ кадяжэ лэ Авраамостирэ бэяцэ.
6 Но кадэва мануш на сас анда лэ Левиёско колено, но во всаек ля и десято часть лэ Авраамостар и блаӷословисардя кодэлэс, касти о Дэл най еқвар дя алав.
7 Амэ ӷанас, кай о май баро блаӷословий лэ май цыкнэс.
8 И андэ ек ситуацыя и десято часть лэн и мануша, савэ мэрэн, ай андэ авэр — кодэва, пала кастэ андэ Свынти Лила пистромэ, кай во жундо.
9 Можно тэ ԥэнас, кай дажэ о Ле́виё, савэсти дорэсэлпэ и десято часть, екжэно потиндя и десято часть через о Авраамо,
10 важ кода кай, кала диқлэпэ о Авраамо и о Мелхиседэ́ко, о Ле́виё инке на арақаделя сар лэ Авраамоско бэято.
11 Ни акэ, тэ ашэлоп о мануш би бэзэхэско через лэ рашандири дила, сави терэн и мануша анда лэ Левиёско колено (важ кода кай и рашаицко дила ужалас андо законо, саво сас дино лэ народости), тоди состэ трэбуй сас авэр рашай, пала саво ԥэндо, кай во сар о Мелхиседэ́ко, ай най сар о Аро́но?
12 Ай если парудёл и рашаицко дила, тоди трэбуй тэ парудёл и о законо.
13 Важ кода кай кодэва, пала кастэ жал и дума, сас анда авэр колено, анда саво нико на терэлас дила паша жэртвенико.
14 Амэ ӷанас, кай амаро Баро Хулай анда лэ Иудаско колено, но о Маисеё на ԥэнэнас, кай анда кадэва колено авэна рашая.
15 Вся када амэ полям инке май драго, кала появисайля авэр рашай — кацаво, сар о Мелхиседэ́ко.
16 Во ашэля рашаса най важ кода, кай арақаделя андо колено, андэ саво трэбуй сас па законо, ай важ кода, кай лэстэ исин зор важ и жызня, сави нико лэстар на одлэла.
17 Пала лэстэ ԥэндо: «Ту — вечно рашай, кацаво, сар о Мелхиседэ́ко».
18 Ни акэ, о пурано законо оджыля, важ кода кай во би зорэско и лэстар нинай толко.
19 О законо на трэбуй сас, кай тэ улэл вся о бэзэх, но важ када о Дэл дя амэнди май лащи надия, через сави амэ можэм тэ ашас май пашэ каринг лэстэ.
20 И о Дэл стердя када солахаса,
21 (исин мануша, савэ ашэлэ рашанца би солахако, но во ашэля рашаса, кала солахадя кодэва, ко ԥэндя лэсти: «О Иегова солахадя и на парувэла о гиндо: „Ту — вечно рашай“»),
22 важ кода кай стодя лэ Исусос рашаса важ и май лащи солах.
23 Тай инке, и рашая нэ моӷли вечно тэ терэн пэстири дила, важ када авэнас авэр рашая и терэнас кадэя дила посли лэндэ.
24 Но о Исусо жувэл вечно, важ када во никала на парашэла тэ авэл рашай
25 и во можэт тэ спасый кодэлэн, ко через лэстэ ашэл май пашэ каринг о Дэл. Важ кода кай во вся и время жундо, кай тэ мангэл важ лэндэ лэ Дэвлэс.
26 Амэнди и трэбуй кацаво ӷлавно рашай, саво отдя пэско ди важ амэндэ, ритярдёл дур лэ найлашымастар, на маӷрисайля лэ бэзэхэстар, отделимэ кодэлэндар, ко терэл нэправильно, и вазгло май вучес, чем о нэбо.
27 И лэсти на трэбуй, сар аврэ рашанди, кажно дес тэ анэн жэртвы — спэрва важ пэско бэзэх, ай потом важ лэ народоско бэзэх. Во стердя када еқвар, кала андя андэ жэртва корко пэс.
28 И ӷлавни рашая, савэн витидэн па законо, бэзэхэстирэ. Но посли кода сар о Дэл дя о законо, во солахадя, кай стола рашаса пэстирэ Шавэс, саво ашэля идеально пэ вся и вечность.
