Письмо лэ евреёнэнди 8:1-13
8 И акэ со мэ камлэм тэ ԥэнав: амэндэ кацаво ӷлавно рашай; во бэшля справа лэ Барэ Дэвлэстар, саво бэшэл по троно,
2 и во терэл дила андэ ла чачуня катунако свынто ҭан, сави стодя о Иегова, ай най о мануш.
3 Кажно ӷлавно рашай трэбуй тэ анэн и тэ сԥабарэн и жэртвы, важ када и во трэбуй сас тэ анэн жэртва.
4 Тэ авелоп во пэ ԥув, во на ашэлоп рашай, важ кода кай катэ ужэ исин кодэла, ко па законо анэн и жэртвы.
5 Вонэ терэн и дила, сави, сар тень, шолпэ пэ кода, со исин по нэбо. Када дицол анда алава, савэ о Дэл ԥэндя лэ Маисеёсти англа кода, сар о Маисеё тэ лэл тэ терэл и катуна: «Стер вся точно кадя, сар сас сыкадо тути по плай».
6 Инке через о Исусо о Дэл дя о вас, и када разо вижыля май фэдэр, чем сас пэрво разо, кала о Дэл дя о вас. И во стердя када па законо, кала солахадя, кай дэла со май лашэ блаӷословении. Акэ васо о Исусо, сар рашай, терэл пэ бутэстэ май лащи дила.
7 Тэ авелоп вся драго, кала о Дэл дя о вас пэрво разо, тоди на прижылопэ лэсти тэ дэл о вас до дуйто.
8 Но во диқэл лэ народостири дош и важ када ԥэнэн: «Поджал и время, — ԥэнэн о Иегова, — кала мэ до дуйто дава о вас лэ Израилёсти и лэ Иудасти.
9 И пэ када разо, кала мэ дава о вас, вся авэла най кадя, сар мэ дэм о вас лэндирэ ԥурэнди андэ кодэва дес, кала виандярдэм* лэн анда Египто: „Кода разо мэ дэм о вас, ай вонэ ԥаглэ о алав, и важ када мэ парашэлэм тэ диқав пала лэндэ“, — ԥэнэн о Иегова.
10 „Мэ дава о вас лэ Израилёсти посли кодэя время, — ԥэнэн о Иегова. — Мэ става мэрно законо лэнди андэ годи и пистросарава лэс пэ лэнго ди. Мэ ашава лэндирэ Дэвлэса, ай вонэ ашэна мэрнэ народоса.
11 И вонэ будэр на лэна тэ сытярэн пэстирэ чачес и пэстирэ ԥралэс кацавэ алавэнца: ‚Уӷанэн лэ Иеговас!‘ Всаворэ вонэ лэна тэ ӷанэн ман — и о чороро, и о барвало.
12 Мэ простисарава лэндири нэправильно дила и манди по гиндо будэр на авэла лэнго бэзэх“».
13 Кала о Дэл ԥэнэн, кай «до дуйто дэл о вас», во сыкавэл, кай ужэ оджал кода, пала со во пэрво разо дя о вас. Ай кода, со оджал и ашэл пурано, ӥто парашэла тэ авэл.
Сноски
^ Или «вастэстар виандярдэм».
