Лэ Иудаско письмо 1:1-25
1 Мэ, о Иуда, лэ Иисусос Христоско рабо, лэ Иаковоско ԥрал, пистросарав кодэлэнди, кас витидя* о Дэл, амаро Дад. Во любий и фэрий тумэн, кай тумэ тэ авэн лэ Иисусос Христоса.
2 Мэк о Дэл инке май фартэ и анда ди жалуий и любий тумэн и мэк во дэл тумэнди инке май бут мирно жызня.
3 Кучутнэ ԥрала, спэрва мэ фартэ камавас тэ пистросарав тумэнди пала амари спасения, но потом мэ закамлэм андэ пэско письмо тэ шав сама пэ кода, кай тумэ анда вся зор тэ боринпэ важ пэстири вера, сави еқвар и пэ вся и время сас пэрэдини лэ свынтонэнди.
4 Важ кода кай каринг тумэндэ чоралэс зажылэ и мануша, савэнди инке дэлмут через и пророкоря* сас виандярдо о приӷоворо. Кадэла мануша на даран лэ Дэвлэстар, вонэ пэрэбандярэн лэско баро лашымос, кай тэ виболдэнпэ анда кода, кай бисовисно* пэс андярэн. Пэ дила вонэ сыкавэн, кай отԥэндён амарэ еқэ хуластар и Ӷосподиностар, лэ Иисусос Христостар.
5 Камав, кай тумэ тэ на бистрэн, — хоть тумэ и кадя вся када ӷанэн, — кай о Иегова, посли кода сар спасысардя пэстирэ народос анда Египто, умардя кодэлэн, кастэ на сас вера.
6 И во шутя вечни цэпоря пэ анӷелоря, савэ на цэнинас пэстири служэния и ашадэ пэско ҭан по нэбо. Во ритярэл лэн андэ бари тэмнота важ о сындо по особо дес.
7 Точно кадя жэ о Садо́мо, и Гамо́ра и авэр фороря паша лэндэ потасылэ андо баро розврато* и дажэ терэнас чоровано розврато*. О Дэл спушля лэндар, кала бишалдя яг пэ кадэла фороря, и навечно стрисардя лэн. Када важ амэндэ примеро, кай амэ тэ авас осторожни.
8 И всаек кадэлэ манушэндэ, савэ чоралэс зажылэ андэ собрания, тожэ по гиндо ек о найлашымос. Вонэ маӷрин пэстири тила, бипативалэс обжанпэ кодэлэнца, кастэ исин власть, и абисо дэн дума пала кодэла, ко ашэля ашунгло лэ Дэвлэстирэ зорэса.
9 Дажэ о ӷлавно анӷело* о Михаило, кала спорисайля лэ Бэнгэса пала лэ Маисеёстири тила, на ля тэ сындой лэс и абисо тэ дэл дума пала лэстэ, но ԥэндя: «Мэк о Иегова сындой тут».
10 Но кадэла мануша абисо дэн дума пала вся, со па чачимастэ на полэн. Ай со лэндэ дожал нэосознано, сар кай дилэ жывотни, кода вонэ и терэн, и кадя ашэн инке май розвратни.
11 Бида кадэлэ манушэнди, важ кода кай вонэ линэ тэ терэн па лэ Каиноско примеро, витидэ тэ жан па лэ Валамоско нэправильно дром, кай тэ барвадён, и цырдэ бида пэ пэско шэро, кала пэрэлинэ лэ Кареёстири дума, саво жыля против кодэла, кастэ сас власть.
12 Кадэла мануша бэшэн тумэнца пала ек столо и хан и пэн пэ тумарэ мисяйли, но вонэ — опасни плая тала паи, пастухоря, савэ на лажан тэ замарэн пэсти пор. Вонэ — бипаестирэ тучи, савэн андярэл и балвал, витки, пэ савэ каринг и восэнь нисо на вибарёл и савэ зашукэ* и вишындэ ку корнё.
13 Вонэ — дыки волны андэ моря, савэ марэн и пена пэстиря найлащя* дилатар, заблудимэ звёзды, савэн аштярэл вечно бари тэмнота.
14 Кадяжэ о пророко Ено́хо, саво сас 7 мануш лэ Адамостар, ԥэнэнас пала лэндэ лэ Дэвлэстар: «О Иегова авеля фартэ бутэ* свынтонэ анӷелонэнца,
15 кай тэ сындой всаворэ манушэн и тэ спушэл кодэлэндар, ко на дарал лэ Дэвлэстар, важ лэндири найлащи дила, сави вонэ стердэ, и важ всаворэ бисовисни алава, савэнца кадэла ӷрешникоря абисо дэнас дума пала лэстэ».
16 Вонэ — нэдовольни мануша, савэ ровэнпэ пэ пэстири жызня и терэн кода, каринг со лэн цырдэл лэнго ди. Вонэ путён и на ӷанэн пэсти мера андэ када и важ пэстири выӷода вималин* аврэн.
17 Ай тумэ, кучутнэ ԥрала, на́ бистрэн и алава, савэ ԥэндэ и апосталоря амарэ Ӷосподиностирэ лэ Иисусос Христостирэ.
18 Вонэ ԥэнэнас тумэнди: «Андэ послиднё время авэна и мануша, савэ лэна тэ приасанпэ и тэ терэн кода, каринг со лэн цырдэл лэнго ӷрешно ди».
19 Кацавэ мануша роздилин и собрания, андярэн пэс сар жывотни и лэндэ нинай лэ Дэвлэско свынто духо.
20 Но тумэ, кучутнэ ԥрала, ашэн май састэ через тумари свынто вера и мангэнпэ кадя, сар андярэл о свынто духо.
21 Кадя тумэндэ вижала тэ на хасарэн лэ Дэвлэстири любовь*, пока тумэ аштярэн, кала амаро Ӷосподино о Иисус Христос анда ди жалуия тумэн и тумэнди дэна вечно жызня.
22 Ай инке, на́ парашэн анда ди тэ жалуин кодэлэн, кастэ слабо вера*.
23 Вихутилэн лэн анда яг, кай тэ спасын. На́ парашэн анда ди тэ жалуин и аврэн, но мэк тумэндэ авэл дар, кай тэ вэрыцын дажэ ӥда, сави вимақли андо бэзэх.
24 Амаро ашунгло* Дэл можэт тэ фэрий тумэн, кай тумэ тэ на дэнпэдап, и тэ поможый тумэнди тэ тердён вужэ англа лэстэ и тэ радуинпэ анда вся ди.
25 Во ек Дэл па вся и люма, саво спасый амэн через о Иисус Христос, амаро Ӷосподино и мэк во авэл ашунгло*, пативало*, зорало и правий вся и вечность — дэлмут, акана и англэ. Амин.
Сноски
^ Или «ақардя».
^ Или «Лила; Писания».
^ Или «бипативалэс». Пэ греческо асе́лгия.
^ Греческо алав, саво катэ тердёл, фартэ пашэ лэ алавэсти парнэ́я.
^ Или «билажавардимос всаворэса подряд».
^ Дословно «арханӷело».
^ Дословно «дувар стернелэ».
^ Или «бисовиснона; билажавардя».
^ Дословно «мирядонэнца». Ек миряда — 10 000.
^ Или «ԥарон тэ вихвалин».
^ Или «тэ ашэнпэ андэ лэ Дэвлэстири любовь; тэ авэн достойни, кай о Дэл тэ любий тумэн».
^ Или «ко на допатял».
^ Или «стэмошно; бахтало».
^ Или «стэмошно; бахтало».
^ Или «особено».
