Письмо андо Римо 13:1-14
13 Кажно мануш трэбуй тэ кандэл лэ барэ правителёнэн. Нико нэ можэт тэ правий, если када на домэкля о Дэл. Када во стодя кодэлэн, ко правий адес, пэ пэстирэ ҭана.
2 Если варико на кандэл кодэлэн, ко правий, тоди во жал против о Дэл и ԥагэл о законо*, саво во стодя. Кацавэ манушэстар спушэна пала када.
3 Лэ правителёнэндар трэбуй тэ даран най кодэла, ко терэл правильно, ай кодэла, ко терэл найлашымос. Камэс тэ на дарас лэ правителёнэндар? Тоди тер лащи дила, и вонэ драго дэна дума пала тутэ.
4 И правителя — када лэ Дэвлэстирэ слуӷоря важ тири блаӷополучия. Но если ту терэс найлашымос, тоди тути трэбуй тэ дарас, важ кода кай лэндэ исин право тэ спушэн кодэлэндар, ко терэл найлащи дила. Вонэ — лэ Дэвлэстирэ слуӷоря, савэ спушэн важ о найлашымос.
5 Вижал, тумэнди трэбуй тэ кандэн най кати через и дар, кай тумэндар моӷут тэ спушэн, но и важ кода, кай тумэндэ тэ авэл вужо ди*.
6 Акэ васо тумэ кадяжэ потинэн налоӷоря, важ кода кай и правителя — лэ Дэвлэстирэ слуӷоря, савэ заботинпэ, кай и мануша тэ жувэн драго.
7 Отдэн кажнонэсти кода, со лэсти прижал: потинэн любо налоӷо кодэлэсти, касти во прижал; даран кодэлэстар, ко ашэл када; стон патив пэ кодэла, ко затердя када.
8 Никасти на авэн вужылэ, но тумэ трэбуй тэ любин ек еқэс. Ко любий аврэ манушэн, во зритярдя о законо.
9 Важ кода кай вся, со пистромэ андо законо, например «на́ придэ лэ хулас или ла хулая*, на́ умар, на́ чор, на́ кам, со най тиро», можно тэ ԥэнас еқэ алавэса: «Любисар лэ манушэн, сар корко пэс».
10 Кодэва, ко любий, на терэл аврэнди вэрыто, важ када вижал, кай кацаво мануш ритярэл о законо.
11 Терэн кадя, важ кода кай тумэ ӷанэн, кай поджыля и время тумэнди тэ прошонпэ. Акана амэ инке май пашэ каринг кода, кай тэ спасысавас, чем тоди, кала амэ патяям.
12 И рят прожал, пашол о дес. Кочай мэкам и дила, сави терэлпэ андэ тэмнота, и утидампэ сар халавдо важ и свитло время.
13 Ласа тэ андярас пэс пативалэс, сар десэ. Амэ на трэбуй тэ вирисавас пэ ӷульбы, тэ опаспэ, тэ терас билажавардимос, бисовисно тэ андярас пэс, тэ скандалисарас и тэ завидусарас.
14 Старыинпэ тэ жувэн кадя жэ, сар о Баро Хулай о Исусо Христос и на́ обгиндон, сар тэ терэн кода, со камэл лэ бэзэхэстири тила.
