Письмо андо Римо 8:1-39
8 Важ када кодэлэнди, кастэ ек гиндо лэ Христоса лэ Исусоса, о Дэл на виандярэл смэртно приӷоворо.
2 Лэ свынтонэ зорэско законо дэл жызня кодэлэнди, ко жал лэ Христостирэ лэ Исусосостирэ дромэса*. Через кадэва законо тумэ ашэлэ свободни лэ бэзэхэстирэ и ла смэртятирэ законостар.
3 Кай лэ Маисеёско законо на вижыля тэ освободий лэ манушэн, савэ бэзэхэстирэ и нэидеальни. Но када стердя о Дэл, кала бишалдя пэ ԥув пэстирэ Шавэс, дя лэсти тила, сави шолпэ пэ манушыкани бэзэхэстири тила, кай тэ улэл о бэзэх. Кадя во виандярдя сындо лэ бэзэхэсти, саво андэ мануша.
4 И акана амэ можэм правильно тэ зритярас о законо, если амэ кандас, кала андярэл о свынто зор, ай най амари бэзэхэстири тила.
5 Ко цырдэлпэ пала пэстири бэзэхэстири тила, лэндэ о шэро замардо кати кодэлэса, каринг со подмарэл о бэзэх. Ай ко цырдэлпэ пала свынто зор, вонэ гиндон пала кода, каринг со подмарэл о свынто зор.
6 Кастэ о шэро замардо кодэлэса, каринг со подмарэл о бэзэх, вонэ мэрэна. Ай ко гиндой пала кода, каринг со подмарэл о свынто зор, вонэ лэна тэ жувэн и лэндэ авэла мирно жызня.
7 Важ кода кай кастэ о шэро замардо кодэлэса, каринг со подмарэл о бэзэх, вонэ ашэн лэ Дэвлэстирэ вороӷоря. Лэ бэзэхэстири тила на камэл и нэ можэт тэ цырдэлпэ каринг лэ Дэвлэско законо.
8 Вижал, кодэла, ко жувэл кадя, сар камэл лэ бэзэхэстири тила, нэ моӷут тэ уӷодин лэ Дэвлэсти.
9 Но тумэ на жувэн кадя, сар камэл лэ бэзэхэстири тила. Если тумэндэ исин лэ Дэвлэско зор, тоди тумэ жувэн кадя, сар цырдэл тумэн о свынто зор. Ай если варикастэ нинай лэ Христостири хватка, тоди во най лэско.
10 Но если тумэндэ ек гиндо лэ Христоса, тумэ, хоть тумари тила найжунди через о бэзэх, ашэн жундэ через о свынто зор, важ кода кай о Дэл прижангля тумэн найдошалэнца.
11 О Дэл пэстирэ зорэса жундярдя лэ Исусос. Если тумэндэ исин кадэва зор, тоди о Дэл, саво жундярдя лэ Христос лэ Исусос, жундярэла и тумари тила, сави стернёл. Во стерэла када пэстирэ зорэса, саво андэр тумэндэ.
12 Важ када, ԥрала, амэ на трэбуй тэ терас кадя, сар камэл лэ бэзэхэстири тила.
13 Тумэ мэрэна, если терэн кадя, сар камэл лэ бэзэхэстири тила. Но тумэ лэна тэ жувэн, если домэкэна, кай о свынто зор тэ поможый тумэнди тэ парашэн тэ терэн и дила, каринг сави цырдэл о бэзэх.
14 Всаворэ, кас андярэл о свынто зор, — лэ Дэвлэстирэ шавэ.
15 Лэ Дэвлэско зор на заставий амэн тэ ашас раборя и тэ жувас андэ дар. Через лэстэ амэ ашас лэ Дэвлэстирэ шавэ и камас тэ взвисавас: «А́ва, Дадэ!»
16 Кадэва зор ворта дэл тэ полас, кай амэ — лэ Дэвлэстирэ бэяцэ.
17 Ай если амэ лэстирэ бэяцэ, тоди амэнди дорэсэлапэ дэсо лэ Дэвлэстар. Амэнди дорэсэлапэ кода жэ, со и лэ Христости. Кати спэрва амэ трэбуй тэ пэрэандярас кодэя жэ бида и о ԥаримос, саво во пэрэандярдя. Тоди амэ аваса кацавэ жэ ашунглэ, сар и во.
18 Мэ патяв, кай вся, со амэ пэрэандярас акана, — када нисо на ашэл, если тэ сыстосарас кодэлэса, савэ ашунглэ амэ аваса англэ.
19 Всаворэ, кас создал о Дэл, нащи доаштярдён, кала о Дэл сыкавэла пэстирэ шавэн*.
20 Важ кода кай всаворэ, кас создал о Дэл, линэ тэ жувэн евья и ужэ на аштярэнас англэ нисо лашо. Во домэкля када, хоть вонэ екжэнэ на камэнас кацави жызня. Но, кала о Дэл виандярдя о сындо, во дя лэнди пэр со тэ надеинпэ.
21 О Дэл ӷанэнас, кай кодэла, кас во создал, ашэна свободни лэ бэзэхэстар и ла смэртятар и во прижанэна лэн пэстирэ бэятонэнца, и лэндэ авэла райкани жызня, важ кода кай вонэ будэр на авэна раборя.
22 Амэ ӷанас, кай всаворэ, кас создал о Дэл, идоси стоӷнин и мучинпэ.
23 Но акана амэндэ исин о свынто зор, саво сыкавэл, со амэн аштярэл англэ. Амэ стоӷнисарас андэ пэско ди, важ кода кай всаворэ́ одеса аштярас, кала о Дэл прижанэна амэн пэстирэ бэятонэнца. Андэ кодэя время амэ ашаса свободни пэстиря тилатар через кода, кай о Исусо витиндя амэн.
24 Кала о Дэл спасысардя амэн, амэ лям тэ надеисавасас. Но если ужэ ашэля кадя, сар о мануш надеияспэ, тоди лэсти най пэр со тэ надеийпэ. Кала кай о мануш исин кода, со во аштярэлас, трэбуй во идоси тэ надеийпэ?
25 Ай если амэндэ инке нинай кода, пэр со надеисавас, амэ на парашас тэ аштярас, сар бы ԥарэс тэ на авэл.
26 Кадяжэ, кала амэ вимардювас анда зор, амэн подритярэл лэ Дэвлэско зор. Можэт, амэ полас, кай трэбуй тэ мангаспэ Дэвлэс, но на ӷанас пала со. И о свынто зор екжэно мангэл важ амэндэ, кала амэ стоӷнисарас, но на ӷанас, со тэ ԥэнас.
27 О Дэл розуӷанэн, со амэндэ андо ди, и полэл, пала со мангэл о свынто зор, важ кода кай о свынто зор мангэл важ и свынти и када зжалпэ лэ Дэвлэстиря времяса.
28 О Дэл терэл вся пэстири дила, кай када тэ анэн лашымос кодэлэнди, ко лэс любий — кас во витидя важ пэско гиндо.
29 Во сразу ӷанэнас, кас витидэла, и май данглал приля ришэния, кай вонэ ашэна кацавэ жэ, сар лэско Шаво. Кадя лэско Шаво ашэла пэрво машкар пэстирэ ԥрала.
30 Тоди во ақардя кодэлэн, кас май данглал витидя. Кадяжэ во прижангля найдошалэнца кодэлэн, кас ақардя. И акэ, во стердя, кай тэ авэн ашунглэ кодэла, кас во прижангля найдошалэнца.
31 Со амэ можэм тэ ԥэнас пала када? Если о Дэл пэ амари риг, тоди ко авэла против амэндэ?
32 Лэсти на сас жалко тэ отдэл пэстирэ Шавэс, кай во тэ мэрэл пала амэндэ всаворэндэ. Важ када, вмести кадэлэса, хэба во па пэско баро ковло ди на дэла амэнди и вся авэр?
33 Ко можэт тэ дошалярэл кодэлэн, кас витидя о Дэл? Када жэ о Дэл прижанэн лэн найдошалэнца.
34 Ко можэт тэ виандярэл лэнди о сындо? О Христос Исусо муля важ лэндэ и сас жундярдо, во бэшэл справа лэ Дэвлэстар и мангэл важ амэндэ.
35 Исин хоть варисо, со можэт тэ одмарэл лэ Христос тэ любий амэн? Можэт о ԥаримос, или и бида, или кода, кай амэн ӷонин, или о боқалимос, или о чорымос, или кода, кай можэм тэ мэрас, или о маримос?
36 Андэ Свынти Лила пистромэ: «Через тутэ амэн умарэн кажно дес; важ о миро амэ сар бакрэ, савэн андярэн пэ шури».
37 Но кодэва, ко амэн любий, придэл амэнди зор и важ када амэндэ вижал тэ пэрэандярас* вся када.
38 Мэ патяв, кай нинай нисо, со можэт тэ одмарэл лэ Дэвлэс тэ любий амэн: ни и смэрть, ни и жызня, ни и анӷелоря, ни и барэ мануша, ни кода, со исин и со авэла, ни о зор,
39 ни кода, со упрэ и со тэлэ, нисо авэр, со исин андэ люма. Нинай нисо, со можэт тэ одмарэл лэ Дэвлэс тэ любий амэн, сар во када сыкавэл амэнди через о Христос Исусо, амаро Баро Хулай.
Сноски
^ Или «кастэ ек гиндо лэ Христоса лэ Иисусоса».
^ Или «сыкавэла, пэскати дэ ашунглэ лэстирэ шавэ».
^ Или «тэ победисарас».
