Свынто тайна 13:1-18
13 Во* тердёлас по чишай паша моря.
Мэ додиқлэм, сар анда моря виӷулел зверё, савэстэ сас 10 роӷоря и 7 шэрэ. Пэ роӷоря лэстэ сас 10 короны, ай пэ шэрэ сас пистромэ бипативалэ алава по Дэл.
2 Кадэва зверё шоласпэ по ляпардо, но и пэрнэ лэстэ сас сар кай о риш, ай о муй — сар кай о лево. И о драконо дя лэсти зор, троно и баро право тэ хулаий.
3 Тоди мэ додиқлэм, кай ек лэско шэро сас ԥарадо, и здэласпэ во на вижувэла, но о шэро зажудя, и всаворэ мануша пэ ԥув жылэ пала лэстэ ԥэрнадэ моса*.
4 И мануша тэлелэ лэ драконости, важ кода кай во дя зор лэ зверёсти, и тэлелэ кадэлэ зверёсти. Вонэ ԥэнэнас: «Нико на сыстояпэ кадэлэ зверёса и нико на вижала тэ марэлпэ лэса!»
5 Лэстэ сас право тэ ԥэнэн путярдэ, бипативалэ алава по Дэл и тэ терэл, со камэл, 42 шона.
6 Во ля тэ ԥэнэн бипативалэ алава по Дэл, пэ лэско алав, по ҭан, кай во жувэл, и пэ кодэла, ко жувэл по нэбо.
7 Лэсти сас домэкло тэ жал тэ марэлпэ лэ свынтонэнца и тэ вицэлэл лэн. И лэсти динэ право тэ хулаий пэ всаворэ породы, нацыи и народоря, савэ дэн дума пэ разни шыба.
8 Всаворэ, ко жувэл пэ ԥув, тэлёна лэсти. Кодэла времятар, сар появисайля о миро, лэндирэ алава на запистронпэ андэ ла жызняко лил кай о Бакроро, саво сас андо́ сар жэртва.
9 Внимательно ашунэн!
10 Кодэва, кас трэбуй тэ стон андо баруно, попэрэла андо баруно. Кодэва, ко зашынэла варикас шуряса, трэбуй тэ хындёл ла шурятар. Важ када и свынти трэбуй тэ ашэнпэ састэ андэ ԥари время и тэ на парашэн тэ патян.
11 Потом мэ додиқлэм аврэ зверёс. Во виӷулелас анда ԥув, и лэстэ сас 2 роӷоря, сар кай о бакроро, но дэлас дума во сар о драконо.
12 Кадэва зверё находийпэ англа пэрво зверё и лэстэ исин кацаво жэ право тэ хулаий, сар кай о пэрво зверё. Во заставий и ԥув и кодэлэн, ко жувэл пэр латэ, тэ тэлён лэ пэрвонэ зверёсти, каско шэро сас ԥарадо, кай здэласпэ во на вижувэла.
13 Во терэл ашунгли удивительно дила* англа мануша и дажэ бишалэл яг па нэбо пэ ԥув.
14 Через и удивительно дила, сави во можэт* тэ терэл англа зверё, во обдилярэл кодэлэн, ко жувэл пэ ԥув и заставий лэн тэ стерэн пэ ԥув лэ зверёстири статуя, саво сас шындо шуряса, но оджунделя.
15 Лэсти динэ право тэ дэл жызня лэ зверёстиря статуяти, кай кадэя статуя тэ дэл дума и кай па лако алав тэ умарэн всаворэн, ко отԥэндёл лати тэ тэлёл.
16 Во тасавэл пэ всаворэ мануша — пэ кодэла, ко про́сти и ашунглэ, ко барвалэ и чорорэ и ко свободни и ко раборя, — тэ прилэн о знако по право вас или по чикат,
17 кай нико ни тэ тинэл, ни тэ битинэл, если пэр лэстэ на авэла о знако — лэ зверёско алав или лэстирэ алавэско число.
18 Пэ када трэбуй годи: мэк кодэва, ко драго росполэл, уӷанэн, со сыкавэл лэ зверёско число, важ кода кай када манушыкано число. Кадэва число — 666.
