Свынто тайна 18:1-24
18 Посли када мэ додиқлэм, сар авэр анӷело змэкэласпэ па нэбо. Лэстэ сас баро право тэ хулаий, и пэ ԥув аж ашэля свитло лэстиря бахтатар.
2 Во фартэ зацыписайля: «О Ашунгло Вавило́но пэля! И ашунгли шоварка ашэля цэрэса, кай жувэн и найлашэ анӷелоря, и ҭанэса, кай ратярэн и найвужэ и всаворэ мэлалэ* и гряцаливи птицы!
3 Вой паярдя всаворэ́ народонэн лэ билажавардэ виноса, через саво лэндэ ԥарол* и цыпа пала билажаварди дила. Ла ԥувьятирэ царёря шалыинаспэ* ласа, и ла ԥувьятирэ торӷовцоря марэнас лащи бажын кодэлэстар, кай вой цырдэлпэ пала барвали жызня».
4 И мэ ашундэм, сар варико авэр ԥэндя па нэбо: «Мэрно народо, ашав ла, кай тэ на авэс дошало андэ латирэ бэзэха и кай пэр тутэ тэ на пэрэл и бида, сави ла аштярэл.
5 Важ кода кай вой стердя кадя бут найлашымос, кай када ашэля сар плай, саво дорэсэл жы каринг о нэбо, и о Дэл лэла тэ сындой ла важ латири вэрыто дила.
6 Обжанпэ ласа кадя жэ, сар вой обжаласпэ аврэнца, рин лати дувар май бут важ кода, со вой стердя. Андо стакано, андэ саво вой терэлас вино, стерэн лэс важ латэ дувар май бут.
7 Сар вой завдэласпэ и жувэлас барвалэс, кадя и рин лати бидаса и ԥаримаса. Вой ԥэнэн пэсти: „Мэ царица, мэ най ԥивли и пэр мандэ никала на дэла о чорымос“.
8 Акэ васо андэ ек дес пэр латэ дэла чорымос: боқалимос, бида и смэрть, и ла сԥабарэна, важ кода кай ла сындосардя о Дэл о Иегова, саво зорало.
9 Ла ԥувьятирэ царёря, савэ шалыинаспэ* ласа и вмести ласа жувэнас барвалэс, лэна фартэ тэ ӷолосын и тэ ровэн пала латэ, кала диқэна по ҭув ла ягатар, андэ сави вой ԥабол.
10 Вонэ лэна тэ тердён май дур и тэ даран, кай лэнца терэлапэ кацаво жэ, и лэна тэ ԥэнэн: „Бида, со за бида! Ашунгло форо, зорало Вавило́но! Сар дэ ӥто тути сас виандярдо о сындо!“
11 И ла ԥувьятирэ торӷовцоря лэна тэ ровэн и тэ умардён, важ кода кай будэр найко тэ тинэл лэндар о товаро:
12 сомнак, руп, кучутнэ бара, жэмчуӷо, сано лёно, шолко, фиалетаво и тэмно лоли материя, кода, со стердо анда араматно витка, анда слоново кокали, анда кучутно каш, анда харкум, анда састри и анда мрамаро,
13 ай кадяжэ карица, индийско приправа, араматно смесь, араматно вулей, ладано, вино, аливкаво вулей, вужо яро, пшэница и инке гурувэн, бакрэн, грастэн, вурдона, рабонэн и аврэ манушэн.
14 Будэр нинай о мищимос, саво сас тути фартэ куч, ту хасардян вся, со само лашо и барвало, и тутэ будэр никала када на авэла.
15 И торӷовцоря, савэ вся када битинэнас и савэ пэ када розбарваделэ, лэна тэ тердён май дур и тэ даран, кай лэнца терэлапэ кацаво жэ. Вонэ лэна тэ ровэн и тэ умардён
16 и тэ ԥэнэн: „Бида, со за бида! О ашунгло форо, саво утидо андо сано лёно и андэ фиалетаво и тэмно лоли ӥда и пэ саво исин сомнак, кучутнэ бара и жэмчуӷо!
17 Сар дэ ӥто нисо на ашэляпэ лэстирэ барвалимастар!“
Всаворэ, ко терэл бути пэ лодки и пэ кораблёря*, тердёнас май дур,
18 диқэнас по ҭув ла ягатар, андэ сави во ԥабол, и ԥэнэнас: „Саво форо сыстояпэ кадэлэ ашунглэ фороса?“
19 Вонэ шонас о прахо пэсти по шэро, ровэнас, умардёнас и цыпинас: „Бида, со за бида! О ашунгло форо, через саво розбарваделэ всаворэ лэ кораблёнэндирэ хула́я! Сар дэ ӥто во ашэля розмардо!“
20 Лошав, нэбо! Лошавэн, свынти, апосталоря и кодэла, ко пэрэдэл и дэвликунэ алава, важ кода кай важ тумэндэ о Дэл виандярдя лэсти о сындо!»
21 О зорало анӷело ля о бар, саво шоласпэ по бар, кай тэ мэлин о зэрно, шутя лэс андэ моря и ԥэндя: «Кадя жэ дэ ӥто авэла сшуто о ашунгло форо Вавило́но, и лэс на ашэла.
22 Андо Вавило́но будэр на ашундёла, сар анда муй дилабэн кодэла, ко дилабэл пэ арфа, сар дилабэн пэ флейта, пэ труба и пэ авэр инструменторя. Котэ будэр на ашэлапэ ни ек мастеро и на ашундёла о шумо, сар мэлин о зэрно.
23 Кадяжэ котэ на ԥабола и лампа и ужэ на ашундёла лэ тэрнэс и ла тэрня. Тирэ торӷовцоря сас барэ мануша, и через тиро драбатяримос сас опхохадэ всаворэ народоря.
24 Кадэва форо дошало, кай хынделэ кодэла, ко пэрэдэл и дэвликунэ алава, и свынти и всаворэ, ко сас умардо пэ ԥув».
Сноски
^ Или «найвужэ».
^ Или «холявэл».
^ Или «терэнас билажавардимос».
^ Или «терэнас билажавардимос».
^ Или «морякоря, капитаноря, матросоря и всаворэ, ко затерэл андэ моря».
