Свынто тайна 20:1-15
20 Потом мэ додиқлэм, сар па нэбо змэкэлпэ о анӷело ла тияса па пропость и лэ барэ цэпоса андо вас.
2 Во хутилдя лэ драконос — лэ пэрвонэ сапэс — пэ саво ԥэнэн Бэнг и Сатана, и шутя пэр лэстэ цэпо пэ 1 000 бэрш.
3 Во шутя лэс андэ пропость, ԥандадя ла и стодя печать по входо, кай о драконо тэ на опхохавэл лэ народонэн, пока на прожана 1 000 бэрш. Посли када лэс одмэкэна найпэдолӷонэстэ.
4 Мэ додиқлэм троноря, и кодэлэнди, ко бэшэл пэр лэндэ, динэ право тэ авэн сындомаря. Мэ додиқлэм о рат кодэлэнго, кас казнисардэ важ кода, кай вонэ росԥэнэнас пала Исусо и дэнас дума пала Дэл. Вонэ на тэлелэ лэ зверёсти и лэстиря статуяти и на прилинэ о знако по чикат и по вас. Вонэ оджунделэ и прависардэ лэ Христоса 1 000 бэрш.
5 Када пэрви, ко сас жундярдэ. (Авэр мулэ на жунделэ, пока на прожылэ 1 000 бэрш.)
6 Бахталэ и свынти кодэла, ко рияпэ каринг и жызня, кала поджала и время лэ пэрвонэнди тэ жундён; и дуйто смэрть на хулаий пэр лэндэ. Вонэ авэна лэ Дэвлэстирэ и лэ Христостирэ рашанца и лэна тэ правин лэса 1 000 бэрш.
7 Кала прожана 1 000 бэрш, о Сатана авэла одмэкло анда баруно.
8 Во виӷулела, кай тэ опхохавэл лэ народонэн, пэ савэ ԥэнэн Го́го и Маго́го, и тэ стидэл лэн пэ война. Кадэла народоря стидэнапэ ла ԥувьятирэ штарэ краёнэндар; лэн авэла сар чишай андэ моря.
9 Вонэ вижылэ па вся и ԥув и окружысардэ лэ свынтонэнго тэрмино и о форо, саво куч лэ Дэвлэсти. Но па нэбо зжыля и яг и стрисардя лэн па ԥув.
10 Ай о Бэнг, саво опхохавэлас лэн, сас шуто андо ягано и фартэ росԥабардо возэри, кай ужэ сас о зверё и о хохавно, саво притерэласпэ лэ Дэвлэско. Котэ вонэ о дес и рят лэна тэ мучинпэ вся и вечность.
11 Мэ додиқлэм баро парно троно и кодэлэс, ко бэшэл пэр лэстэ. Лэстар унашлэ и ԥув и о нэбо, и будэр важ лэндэ на сас ҭан.
12 Мэ додиқлэм лэ мулэн, простонэн и ашунглэн, савэ тердёнас англа троно. Сас ԥэрнадэ и лила. Сас ԥэрнадо инке ек лил — ла жызняко лил. И лэ мулэнди лэндиря диласа сас сындо па кода, со пистромэ андэ лила.
13 И моря вишутя лэ мулэн, и смэрть, ай кадяжэ и моӷилка* вишутя лэ мулэн, и кажнонэсти андар лэндэ сас сындо па кода, сар вонэ жудэ.
14 Ай и смэрть и моӷилка сас шутэ андо ягано возэри. (О ягано возэри — када и дуйто смэрть.)
15 Кодэла, ко на сас запистромэ андэ лэ жызняко лил, тожэ сас шутэ андо ягано возэри.
Сноски
^ Греч. ха́дэс.
