Письмо лэ Титости 2:1-15
2 Ай ту дэ дума кода, со на жал против о правильно* законо.
2 И ԥурэ мурша трэбуй андэ вся тэ ритярэн пэс андэ вас, тэ андярэн пэс пативалэс, лэндэ трэбуй тэ авэл здраво* годи, вонэ трэбуй тэ авэн састэ андэ вера и андэ ԥари время, ай кадяжэ тэ любин аврэн.
3 И ԥурэ жувля трэбуй тэ андярэн пэс сэжо, тэ на розындярэн и хохавни дума, тэ на опэнпэ, тэ сытярэн лэ лашымасти.
4 Мэк вонэ сытярэн лэ тэрнэ жувлян тэ любин пэстирэ хулас, тэ любин лэ бэятонэн,
5 здраво* тэ гиндон, тэ ритярдён май дур лэ билажавардимастар, тэ авэн хулаицки, тэ терэн лашымос, тэ кандэн пэстирэ хулас, кай нико тэ на дэл дума вэрыто пала алав лэ Дэвлэстар.
6 Поможысар лэ тэрнэ муршэнди здраво* тэ гиндон
7 и андэ вся подэ примеро лащя диласа. Сытяр кодэлэсти, со вужо, андяр пэс пативалэс,
8 мэк тири дума авэл лащи, кацави, важ сави тут нико на мустрия. И тоди и вороӷоря хана о муй лажаимастар, важ кода кай лэнди авэла найсо тэ дэн дума вэрыто пала амэндэ.
9 И раборя трэбуй вся и время тэ кандэн пэстирэ хулан, тэ старыинпэ лэнди тэ уӷодин, тэ на пэрэԥэнэн лэнди о алав,
10 тэ на чорэн, но мэк сыкавэн, кай вонэ андэ вся затердэ патяимос. Кадя через лэндэ инке май драго дицола, савэ шукарнэ законости амэн сытярэл о Дэл, саво спасый амэн.
11 Важ кода, кай о Дэл здиқля пар мэндэ па пэско баро ковло ди, моӷут тэ спасынпэ всаворэ мануша.
12 Кода, со стердя о Дэл, сытярэл амэн тэ дурювас лэ найлашымастар и кодэлэстар, каринг со цырдэлпэ кадэва миро, ай кадяжэ, кай тэ жувас андэ кадэя люма, здраво* тэ гиндосарас, тэ терас кода, со правильно, и тэ стас бари патив по Дэл,
13 пока амэ аштярас, кала ашэла вся кадя, сар амэ надеисавас, и аштярас и время, кала дицола, сави бах марэл лэ ашунглэ Дэвлэстар и лэ Исусостар лэ Христостар, саво спасый амэн.
14 О Христос отдя пэс пала амэндэ и кадя освободисардя амэн всаворя найлащя дилатар и стердя амэн вужэ, кай амэ тэ авас лэско народо, — лэско особо миро, — саво цырдэлпэ тэ терэл и лащи дила.
15 Дэ дума пала када, доԥэн и лажавар, сар тутэ исин пэ када право. Мэк ни ек мануш на́ обжалпэ туса найпативалэс.
