Письмо лэ Титости 3:1-15
3 Най еқвар ԥэн лэнди, кай вонэ тэ приашундён и тэ кандэн лэ правителёнэн и лэ барэдэрэн, ай кадяжэ тэ авэн ӷотови тэ терэн любо лащи дила,
2 ни пала кастэ тэ на дэн дума абисо, тэ на скандалин, тэ авэн устожливи* и тэ обжанпэ всаворэнца ковлэс.
3 Важ кода кай и амэ варикала самас найгодявэрнэ и найкандинэ, о миро амэн опхохавэлас, пар мэндэ хулаияс кода, каринг со цырдэласпэ амаро ди и амари тила, терасас вэрыто дила и завидуисарасас, амэндар сас гряца, амэ вэрыцысарасас ек еқэс.
4 Но о Дэл, саво спасый амэн, сыкадя, кай драго обжалпэ амэнца и любий.
5 Во стердя кадя, най важ кода, кай амэ терасас вся правильно, ай важ кода, кай во одяло каринг амэндэ, и через када амэ спасысайлям. Во спасысардя амэн, кала вихаладя и жундярдя амэн, и через пэско свынто зор стердя, кай амэндэ тэ авэл нэво характеро*.
6 Через о Исусо Христос, саво спасый амэн, во дя амэнди бут свынто зор.
7 О Дэл стердя када, кай па пэско баро ковло ди тэ прижанэн амэн найдошалэнца и кай кадя амэнди, кодэлэнди, ко надеийпэ пэ вечно жызня, тэ дорэсэлпэ и блаӷословения, пала сави во дя алав.
8 Кадэлэ алавэнди исин патяимос. И мэ мангав тут вся и время тэ дэс дума пала када, кай кодэла, ко патяя андо Дэл, вся и время тэ терэн ек и лащи дила. Вся када драго и анэн лашымос.
9 На́ ӷуль, кала розлэнпэ андо дилимос и виадинон, ко касти сар дожал, дурюв кодэлэстар, кала споринпэ и скандалин через о законо, важ кода кай када евутни дума, савятар нинай нисаво толко.
10 Ритярдюв май дур кодэлэстар, ко на парашэл тэ сытярэл лэ хохаимасти посли кода, сар лэса ворта подинэ дума* еқвар и потом до дуйто,
11 важ кода кай кацаво мануш змарделя па правильно дром и терэл бэзэх, во корко пэсти виандярдя сындо.
12 Кала мэ бишалава каринг тутэ лэ Артемасос или лэ Тихикос, ав каринг мандэ андо Ни́капалё, важ када кай мэ закамлэм котэ тэ винтярав о ӥвэн.
13 Поможысар лэ Зенасости, саво драго ӷанэн о законо, и лэ Апалосости тэ стидэнпэ андо дром и позаботисав, кай лэндэ тэ авэл вся, со трэбуй.
14 Мэк амарэ ԥрала тожэ сытён тэ терэн лащи дила и тэ поможын кодэлэнди, касти срочно трэбуй помощь, кай лэндири дила тэ анэн лашымос.
15 Всаворэ, ко манца, пэрэдэн тумэнди поклоно. Пэрэдэ мандар поклоно всаворэ ԥралэнди па амари вера, савэ любин амэн.
Мэк о Дэл здиқэл пэр тумэндэ па пэско баро ковло ди.
