Письмо лэ Филимоности 1:1-25
1 Када мэ, о Павло, савэс бэшардэ через и вера андо Христос Иисус, и амаро ԥрал о Тимафеё. Амэ пистросарас письмо тути, Филимо́но, амаро кучутно ԥрал,
2 ай кадяжэ амаря ԥьяти, ла Апфияти, лэ Архипости, саво сар воино служый вмести амэнца, и ла собранияти, сави стидэлпэ андэ тиро цэр.
3 Тэ авэл тумэндэ баро лашымос и мирно жызня лэ Дэвлэстар, амарэ Дадэстар, и лэ Иисусос Христостар, амарэ Ӷосподиностар.
4 Мэ вся и время блаӷодарисарав мэрнэ Дэвлэс, кала ԥэнав пала тутэ андэ пэстирэ молитвы,
5 важ кода кай мэ ашунав пала тири вера и любовь каринг о Ӷосподино Иисусо и каринг всаворэ свынти.
6 Мэ мангавпэ, кай тири вера, сави исин и кай авэр христианоря, тэ поможый тути тэ полэс, сар дэ бут лашымос исин амэндэ через о Христос.
7 Кала мэ ашундэм, сар ту любис лэ ԥралэн, мэ фартэ залошайлэм и лэм зор, важ кода кай ту, ԥрал, подритярдян лэ свынтонэн, и через када лэнди по ди ашэля май драго.
8 Сар лэ Христоско апостало, мэ моӷ тэ приԥэнав тути тэ стерэс кода, со трэбуй.
9 Но всаек мэ, о Павло, ԥуро мануш, савэс акана инке и бэшардэ через и вера андо Христос Иисус, камав коесо тэ мангав тутар, важ кода кай ӷанав, сави тутэ исин любовь.
10 Мангав тут пала мэрно шаво, о Ани́симо, важ саво мэ ашэлэм сар дад, кала ман бэшардэ*.
11 Варикала тути лэстар* на сас нисаво толко, ай акана во трэбуй и тути, и манди.
12 Мэ рисарав лэс тути, да, лэс, кодэлэс, ко ашэля манди* кадя куч.
13 Пока мэ бэшав андо баруно через и лащи новость*, мэ камлоп, кай во тэ ашэлпэ катэ манца и вместо тутэ тэ служый манди.
14 Но мэ нисо на камав тэ терав, пока ту на дэса пэстири соӷласия, кай ту тэ терэс и лащи дила най через оди, ай кай екжэно камэс када.
15 Можэт, важ када во и ашадя тут найпэдолӷонэстэ, кай тэ рийпэ каринг тутэ пэ вся и время
16 и тэ авэл ужэ най сар рабо, но май бут чем рабо — сар кучутно ԥрал. Во фартэ куч манди, пэскати май куч во авэла тути — и сар рабо, и сар христианско ԥрал.
17 Важ када, если ту полэс ман сар друӷос, анда ди прилэ лэс пэстэ, сар прилиноп ман.
18 Ай если во андэ варисостэ дошало или вужылэ тути, мэ пала када потинава.
19 Мэ, о Павло, пистросарав пэстирэ вастэса: мэ пала вся потинава*. Мэ ужэ на дав дума пала кода, кай ту обязано манди пэстиря жызняса.
20 Кочай, ԥрал, стер када важ мандэ, важ кода кай амэ вмести служысарас лэ Ӷосподиности. Сар лэ Христоско ученико, стер, кай манди тэ авэл драго по ди.
21 Пистросарав тути, важ кода кай патяв: ту стерэса, сар мэ мангав, и стерэса важ мандэ дажэ май бут.
22 Кадяжэ виарак манди ҭан, кай тэ жував. Мэ надеисавав, кай тумарэ молитвэнца мэ рисавава каринг тумэндэ*.
23 Пэрэдэл тути поклоно о Епафра́со, саво, сар и мэ, бэшэл андо баруно через и вера андо Христос Иисус,
24 ай кадяжэ мэрнэ амала о Марко, о Ариста́рхо, о Дима́со и о Лука́.
25 Мэк амаро Ӷосподино о Иисус Христос блаӷословий тумэн пэстирэ барэ лашымаса важ тумаро лашо ди.
Сноски
^ Или «кала пэр мандэ шутэ цэпоря».
^ Или «лэстар, сар тирэ рабостар».
^ Или «мэрнэ одести».
^ Или «важ кода, кай росԥэнавас и лащи новость».
^ Или «отдава вся лэско вужылимос».
^ Или «ман одмэкэна важ тумэндэ».
