Письмо андэ Филипы 1:1-30
1 Када о Павло и о Тимафе́ё, лэ Христостирэ лэ Исусостирэ раборя. Амэ пистросарас всаворэ свынтонэнди, савэ андо форо Фили́пы, и кадяжэ лэ барэдэрэ ԥралэнди и лэ помошниконэнди андо ӷурто.
2 Мэк о Дэл, амаро Дад, и о Баро Хулай о Исусо Христос здиқэн пэр тумэндэ па пэско баро ковло ди и дэн мирно жызня.
3 Мэ вся и время блаӷодарисарав мэрнэ Дэвлэс, кала ԥэнав* пала тумэндэ
4 андэ пэстирэ одялэ молитвы. Кажно разо мэ мангавпэ пала тумэндэ баря лошаса,
5 важ кода кай тумэ пристон бут зор, кай тэ ашундёл и лащи новость жы анда кодэя время, сар тумэ уӷанглэ пала лэстэ.
6 Мэ патяв, кай о Дэл, саво поможый тумэнди тэ парудён, доандярэла кадэя дила жы каринг лэ Христоско лэ Исусоско дес.
7 Мэ всаворэ́ одеса патяв андэ када и моӷу кадя тэ гиндосарав, важ кода кай тумэ мандэ андо ди. Тумэ подритярэн ман андо баруно, ай кадяжэ поможын манди тэ зашавпэ пала лащи новость и тэ домардював, кай мандэ па законо тэ авэл право ла тэ росԥэнав. Кадя и мэ, и тумэ полас, кай о Дэл здиқэл пар мэндэ па пэско баро ковло ди.
8 О Дэл диқэл, сар дэ фартэ мэ скучисарав пала всаворэндэ тумэндэ и мэ глаба пала тумэндэ кадя жэ, сар и о Христос Исусо.
9 Мэ на парашав тэ мангавпэ, кай тумэ со май фартэ тэ любин, май бут тэ уӷанэн о чачимос и май драго тэ полэн лэ Дэвлэстири время.
10 И мэ мангавпэ, кай тумэ вся и время тэ витидэн, со па чачимастэ важно. И тоди жы кай лэ Христоско дес тумэндэ вижала тэ ашэнпэ бидошатирэ и никас тэ на змарэн па правильно дром.
11 Инке мэ мангав Дэвлэс, кай через о Исусо Христос тумэ тэ терэн бут лашымос, и кадя о Дэл тэ авэл ашунгло и тэ жал пэр лэстэ лашо алав.
12 Ԥрала, камав, кай тумэ тэ ӷанэн: кода, со тердяпэ андэ мэрни жызня, поможысардя, кай инке май фартэ тэ ашундёл и лащи новость.
13 Всаворэ халавдэ анда лэ правителёско особо войско и всаворэ авэр уӷанглэ, васо мэ попэлэм андо баруно — важ кода кай патяв андо Христос.
14 И бутэ ԥралэнди, лэ Барэ Хуластирэ помошниконэнди, придя зор, кала ашунделя, кай мэ попэлэм андо баруно, и вонэ линэ тэ росԥэнэн о алав лэ Дэвлэстар инке май смило и би дарако.
15 Чаче тэ ԥэнав, дэсавэ росԥэнэн пала Христос важ кода, кай завидуин и сыстонпэ аврэнца, ай авэр терэн када вужэ одеса.
16 Вонэ, важ кода кай любин, дэн дума пала Христос и ӷанэн, кай манди дино тэ зашавпэ пала лащи новость.
17 Ай и пэрви терэн када най вужэ одеса. Лэнди чалёл тэ споринпэ и вонэ камэн тэ стерэн манди инке май ԥарэс, пока мэ андо баруно.
18 И со вижал? Нэважно, васо вонэ росԥэнэн, мэ лошало, кай пала Христос уӷанэн май бут. И мэ на парашава тэ лошавав,
19 важ кода кай ӷанав, кай через када, ай кадяжэ через тумарэ одялэ молитвы и через лэ Исусоско лэ Христоско зор мэ спасысавава.
20 Мэ фартэ аштярав и надеисавав, кай манди нисостар на ашэла лажаво и кай мандэ вижала тэ на парашав смило тэ дав дума. Кадя мэ смоӷу тэ терав, кай о Христос тэ авэл ашунгло, сар мэ теравас када вся и время. И мэ лава тэ терав, кай во тэ ашундёл, жундо мэ чи най.
21 Если мэ жував, тоди мэ жував важ о Христос, и, если мэрава, важ мандэ када авэла драго.
22 Если мэ лава тэ жував андэ кадэя тила, тоди мэрни дила анэна инке май бут лашымос. Но мэ на ԥэнава, со мэ витидоп.
23 Мэ росшындював пэдондэ, важ кода кай камав тэ освободисавав кадэла тилатар и тэ авав лэ Христоса, ай када пэ бутэстэ фэдэр.
24 Но важ тумэндэ фэдэр, кай мэ тэ ашавпэ андэ кадэя тила.
25 Мэ драго када полав и важ када ӷанав, кай ашавапэ всаворэнца тумэнца. Тоди тумэ лэна тэ барён и авэна лошалэ через кода, кай патян.
26 И кала мэ упалэ авава каринг тумэндэ, тумэ сар лэ Христостирэ лэ Исусостирэ ученикоря, лэна тэ лошавэн инке май фартэ.
27 Кати андярэн пэс кадя, кай пативаса тэ ашундёл и лащи новость пала Христос, и тоди, авава мэ каринг тумэндэ чи най, мэ ашунава, кай тумэ ашэнпэ састэ, на хасарэн ек гиндо, ек паша ек боринпэ пала кода, кай тэ патян андэ лащи новость
28 и на дэн лэ вороӷонэнди тэ пэрэдаравэн тумэн. Вся када доԥэнэн, кай вонэ хындёна, ай тумэ спасынапэ, и када лэ Дэвлэстар.
29 Тумэнди випэля бах най кати тэ патян андо Христос, но и тэ мучинпэ важ лэстэ.
30 Важ кода кай тумэ пэрэандярэн кацаво жэ ԥаримос, саво мандэ сас варикала и, сар тумэ ӷанэн, исин идоси.
Сноски
^ Или «згиндосарав».
