Лэ Иоаноско пэрво письмо 1:1-10
1 Амэ пистросарас тумэнди пала кодэва, ко сас спэрва, кас амэ ашундям и кас амэ диқлям пэстирэ яқэнца, пала кастэ амэ слидисардям и кастэ лямаспэ вастэнца, — пала кодэва, ко росԥэнэн* о алав, саво дэл и жызня.
2 (Да, амэнди динэ тэ уӷанас и тэ полас и вечно жызня, сави жал лэ Дадэстар. Амэ диқлям ла, и акана, сар свидетеля, росԥэнас тумэнди пала латэ.)
3 Амэ росԥэнас тумэнди пала кода, со диқлям и ашундям, кай тумэндэ тэ авэл ек гиндо* амэнца, сар и амэндэ ек гиндо лэ Дадэса и лэстирэ шавэса лэ Иисусос Христоса.
4 И амэ пистросарас пала када, кай всаворэ амэ андэ вся тэ авас радосни.
5 Амэ росԥэнас тумэнди пала кода, со ашундям лэстар: о Дэл — када свето и андэр лэстэ нинай нисави тэмнота.
6 Если амэ ԥэнас, кай амэндэ лэса ек гиндо, ай екжэнэ ԥирас андэ тэмнота, тоди амэ хохавас и на андярас лэ Дэвлэстири время.
7 Но если амэ ԥирас андо свето, важ кода кай во жувэл андо свето, тоди амэндэ па чачимастэ лэса ек гиндо, и через лэ Иисусоско рат, лэстирэ Шавэско, амэ ашас вужэ любонэ бэзэхэстар.
8 Если амэ ԥэнас, кай андар мэндэ нинай бэзэх, тоди амэ дилярас корко пэс и дицол, кай амэ на полям лэ Дэвлэстири время.
9 Если амэ прижанас пэско бэзэх, о Дэл простия амэн, и лэстирэ зорэса амэ ашаса вужэ всаворя найлащя дилатар, важ кода кай во састо пэстирэ алавэсти и вся терэл правильно.
10 Если амэ ԥэнас, кай ни еқвар на стердям бэзэх, тоди амэ вистас лэс хохавнэса и на патяс лэстирэ алавэсти.
