Лэ Петроско пэрво письмо 4:1-19
4 О Христос, кала сас мануш, пэрэандярдя о ԥаримос, кочай и тумэ старыинпэ тэ пэрэлэн лэско гиндо*. Важ кода кай кодэва, ко пэрэандярдя о ԥаримос, парашэля тэ терэл бэзэх.
2 Тоди кодэя время, сави лэсти ашэляпэ пэ ԥув, во тэ жувэл ужэ най важ кода, кай тэ терэл кадя, сар камэл лэ манушэско ди, ай важ кода, кай тэ андярэл лэ Дэвлэстири время.
3 Варикала тумэндэ жыля бут время, кай тумэ тэ терэн сар мануша андэ кадэя люма: андярэнас пэс бисовисно*, ԥаронас тэ терэн кода, со нэправильно, упэнаспэ сар матимаря, ԥирэнас пэ шумни вечеринки и пьянки* и гряцаливо тэлёнас лэ идалонэнди.
4 И акана кадэла мануша нащи полэн, васо тумэ будэр на камэн вмести лэнца тэ жан найлашэ дромэса, и важ када вонэ абисо дэн дума пала тумэндэ.
5 Но лэндар спушэла кодэва, ко ӥто лэла тэ сындой лэ жундэн и лэ мулэн.
6 Важ када и лащи новость сас росԥэнди и лэ мулэнди, кай англа Дэл вонэ тэ андярэн дэвликуни жызня*, хоть лэн и сындон кадя, сар сындон всаворэ манушэн.
7 Ӥто вся парашэла тэ авэл*. Важ када мэк тумэндэ авэл твэрэзо годи и никала на бистрэн, пэскати дэ важно и молитва*.
8 Со май важно, анда ди любин ек еқэс, важ кода кай, если тумэндэ исин любовь, тумэ лэна тэ простин аврэн.
9 Авэн ӷотови тэ прилэн пэстэ ек еқэс*, но на́ ровэнпэ кадэлэстар.
10 О Дэл па пэско баро лашымос, саво во сыкавэл по разному, дя кажнонэсти андар тумэндэ таланто, и тумэ, сар идиальни служытеля, трэбуй тэ используете пэско таланто, кала служын ек еқэсти.
11 Кодэва, ко дэл дума, трэбуй тэ дэл дума кадя, кай важ всаворэ када тэ авэл алав лэ Дэвлэстар. Кодэва, ко служый аврэнди, трэбуй тэ надеийпэ пэ лэ Дэвлэско зор. И тоди о Дэл андэ вся ашэла ашунгло через о Иисус Христос. Лэсти прижал тэ авэл ашунгло и зорало вся и вечность. Амин.
12 Кучутнэ ԥрала, на́ удивинпэ, кай тумэнди прижалпэ тэ виритярэн баро ԥаримос*, — када най варисо нэво.
13 Наоборот, радуинпэ, кай тумэндэ кацаво жэ ԥаримос, сар кай о Христос. Тоди тумэ лэна тэ радуинпэ и андэ кодэя время, кала дицола, пэскати во ашунгло.
14 Если важ лэ Христоско алав пала тумэндэ абисо дэн дума, тумэ бахталэ, и када сыкавэл, кай пэр тумэндэ исин лэ Дэвлэско свынто духо, через саво тумэ ашэн ашунглэ.
15 Но мэ на камав, кай варико андар тумэндэ тэ пэрэандярэл бида сар убийца, или сар чор, или сар кодэва, ко терэл найлашымос, или сар кодэва, ко ӷулел най андэ пэстири дила.
16 Ай если варико пэрэандярэла бида сар христианино, мэк на́ лажал кадэлэстар, но мэк и май дур на́ парашэл тэ жувэл сар лэ Христоско рабо, и кадя тэ хвалий лэ Дэвлэс.
17 Важ кода кай пашэля и время важ о сындо, и спэрва во авэла пэ кодэла, ко анда лэ Дэвлэско цэр. Если жэ спэрва сындона амэн, тоди со авэла кодэлэнца, ко на приашундёл каринг лэ Дэвлэстири лащи новость?
18 «И если кодэлэсти, ко ритярэл лэ Дэвлэско законо, найвушэро тэ спасыйпэ, тоди со авэла лэ найлашэ манушэса и лэ ӷрешникоса?»
19 Ай кодэла, кастэ ԥаримос, кай андярэн лэ Дэвлэстири время, мэк на́ парашэн тэ надеинпэ по Создателё, саво затердя амаро патяимос, и мэк на́ парашэн тэ терэн лашымос.
Сноски
^ Или «тэ ашэн смили, сар во».
^ Или «андярэнас пэс бипативалэс». Пэ греческо асе́лгия во мн. ч.
^ Или «ӷульбы; ӷульбушки».
^ Или «тэ жувэн кадя, сар андярэл о свынто духо».
^ Или «всаворэсти авэла конец».
^ Или «авэн внимательни каринг и молитва».
^ Или «тэ терэн лашымос ек еқэсти».
^ Или «ԥаримос, саво шолпэ пэ яг».
