Лэ Иоаноско дуйто письмо 1:1-13
1 Мэ, ԥуро мануш*, пистросарав ла ԥьяти, савя витидя о Дэл, и латирэ бэятонэнди. Мэ тумэн анда ди любисарав, и най кати мэ, но и всаворэ, ко ӷанэн о чачимос.
2 Амэ любисарас тумэн, важ кода кай андо ди амэндэ о чачимос, и во авэла амэнца вечно.
3 О Дэл, амаро небесно Дад, и лэско Шаво, о Иисус Христос, на парашэна тэ дэн амэнди пэско баро лашымос и мирно жызня и анда ди тэ жалуин амэн, ай кадяжэ тэ поможын тэ полас о чачимос и тэ любисарас.
4 Мэ сымас фартэ лошало тэ уӷанав, кай дэсавэ анда тирэ бэяцэ андярэн лэ Дэвлэстири время*, сар и приԥэндя амэнди о Дад.
5 И акана мэ мангав тут, ԥэй, сар пистромэ андо законо: любин ек еқэс. (Мэ на дав тумэнди нэво законо, ай ԥэнав пала кодэва законо, саво амэ уӷанглям лэ Христостар.)
6 Ай тэ любин — када тэ андярэн лэ Дэвлэстири время. Важ када, сар тумэ ашундэ лэ Христостар, вся и время ритярэн о законо, кай тэ любин ек еқэс.
7 Акана андэ люма фартэ бут хохавнэ мануша, савэ на патян, кай о Иисус Христос авеля пэ ԥув сар мануш*. Всаворэ вонэ хохавнэ и лэ Христостирэ вороӷоря.
8 Авэн осторожни, кай тэ на хасарэн кода, со амэ домарделям, и тоди тумэ получина вся и наӷрада лэ Дэвлэстар.
9 Кодэва, ко на ритярэл лэ Дэвлэско законо и сытярэл корко пэстар, на уӷодий лэсти. Ай кодэва, ко ритярэл кадэва законо, уӷодий и лэ Дадэсти, и лэ Шавэсти.
10 Если варико авэл каринг тумэндэ и сытярэл най кодэлэсти, сости сытярэлас о Христос, на́ мэкэн лэс андэ пэско цэр и на́ ԥэнэн лэсти доров.
11 Ай ко прилэл лэс пэстэ и здоровкыийпэ лэса, ашэл дошало вмести лэса андэ лэстири найлащи дила.
12 Мэ камлоп тумэнди инке бут со тэ ԥэнав, но на камав тэ пистросарав пала када андо письмо. Можэт, мандэ вижала тэ авав каринг тумэндэ и тэ подав дума тумэнца, кай тумэндэ тэ авэл бари радость.
13 И бэяцэ тиря ԥьятирэ, савя витидя о Дэл, пэрэдэн тути поклоно.
