Дуйто письмо андо Каринфо 3:1-18
3 Трэбуй амэнди инке еқвар тэ росԥэнас, ко амэ сам? Или можэт амэнди, сар дэсавэ манушэнди, трэбуй, кай варико лашэ алавэса тэ пистрой тумэнди письмо? Или када тумэ трэбуй тэ пистрон пала амэндэ кацаво письмо?
2 Тумэ амаро письмо, саво пистромэ амэндэ по ди, и кадэва письмо ӷанэн и адинон всаворэ мануша.
3 И всаворэ диқэн, кай тумэ — лэ Христоско письмо, саво пистросардям амэ, лэ Дэвлэстирэ помошникоря. Кадэва письмо пистромэ най ла черниласа, ай лэ жундэ Дэвлэстирэ зорэса. И када пистромэ най пэ бара, ай пэ тумаро ди.
4 Амэ анда вся ди патяс, кай тумэ ашэн тэ терэн лэ Дэвлэстири дила, и можэм тэ ԥэнас када англа Дэл. Када возможно кати через о Христос.
5 Амэ на ԥэнас, кай пэстирэ зорэса можэм тэ стерас кадэя дила, но амэнди дэл зор о Дэл.
6 Када во дя амэнди возможность тэ авас помошникоря важ и нэви солах. Кадэя дила амэ терас най важ о законо, саво пистромэ, ай важ о свынто зор. О законо, саво пистромэ, сындой лэ манушэс пэ смэрть, ай о свынто зор дэл жызня.
7 О законо, саво сындой лэ манушэс пэ смэрть, сас вишындо по бар. Кадэва законо сас дино фартэ ашунглэс, кай и израильтяноря нащи сас тэ диқэн пэ лэ Маисеёско муй, кай во фартэ светияспэ, но кадэва шукаримос трэбуй сас тэ прожал.
8 Важ када, хэба на трэбуй о свынто зор тэ авэл дино инке май ашунглэс?
9 Если о законо, саво сындой лэ манушэс пэ смэрть, сас ашунгло, тоди кода, со анэн каринг и правильно дила, авэла пэбутэстэ май ашунгло!
10 Саво дэ ашунгло о законо тэ на авэл, во нисар на сыстояпэ кодэлэса, пэскати дэ ашунгло о нэво законо.
11 И чаче, если о законо, саво будэр на авэла, сас дино фартэ шукарнэс, тоди пэскати май ашунгло кода, со ашэлпэ!
12 Важ кода кай амэ надеисавас пэ када, амэ дас дума смило
13 и на терас сар о Маисеё. Во заушаравэлас о муй кирпаса, кай и израильтяноря тэ на диқэн, пэскати дэ ашунгло о законо, саво трэбуй сас будэр тэ на авэл.
14 Но лэнго гиндо змарделя. И жы каринг кадэва дес лэнго гиндо заушарадо, кала вонэ адинон о пурано законо. Тэ злэн и кирпа, сави заушаравэл лэн, можно кати лэ Христостирэ зорэса.
15 Идоси лэнго ди заушарадо кирпаса, кала вонэ адинон о законо, саво пистросардя о Маисеё.
16 Но кадэя кирпа злэлпэ, если о мануш взвийпэ каринг о Иегова.
17 О Иегова на дицол*, ай котэ, кай лэ Иеговаско свынто зор, и мануша свободни.
18 Всаворэ амэ злям па амарэ муя и кирпы, савэ ушаравэнас лэн, и амэндар, сар юнглиндэндар, марэл лэ Иеговастири стэма. Амэ парудювас, кай тэ шаспэ по Дэл, и амэндар инке май фартэ лэл тэ марэл лэстири стэма. Вся када терэлпэ, сар камэл о Иегова, саво на дицол.
Сноски
^ Или «на дицол и во жувэл по нэбо». Ворта «сыно духо».
