Лэ Петроско дуйто письмо 2:1-22
2 Но сар андо израильско народо сас хохавнэ пророкоря, кадя и тумэндэ авэна хохавнэ учителёря. Кадэла мануша лэна чоралэс тэ сытярэн лэ хохаимасти, через саво авэр ашэн слаби андэ вера, и дажэ отԥэндёна кодэлэстар, ко лэн витиндя и касти вонэ прижан, и важ када вонэ ӥто похындёна.
2 Бут мануша сытёна лэндар и кадя жэ, сар и вонэ, лэна бисовисно* тэ андярэн пэс, и через лэндэ о миро абисо дэла дума пала чачуни лэ Дэвлэстири время.
3 Вонэ авэна фартэ жадни и важ када лэна тэ обхохавэн тумэн важ пэстири выӷода. Но о сындо ужэ дэлмут виандярдя лэнди о приӷоворо, и во спушэла лэндар андо часо, саво стодо, и вонэ точно похындёна.
4 О Дэл на простисардя лэ анӷелонэн, савэ стердэ бэзэх, но шутя пэр лэн цэпоря* и потом шутя андо та́ртаро. Во лэла тэ ритярэл лэн андэ тэмнота, кай на дицол нисаво свето, пока о сындо на спушэла лэндар па приӷоворо, саво виандярдя.
5 О Дэл спушля лэ миростар андэ дэлмутни время, но спасысардя лэ Ноёс, саво росԥэнэнас пала лэско законо, и лэса инке 7 манушэн. Во стердя када, кала бишалдя о потопо пэ всаворэ найлашэ мануша, савэ сас пэ ԥув.
6 Во ашадя ек о пепло анда фороря Садо́мо и Гамо́ра, кала сындосардя лэн, и кадя сыкадя, со авэла лэ найлашэ манушэнца англэ.
7 Но о Дэл спасысардя лэ Лотос, саво ритярэлас лэско законо. Кадэлэ манушэсти сас ԥарэс лэ ӷрешнонэ миростар, саво бисовисно* пэс андярэлас.
8 Кадэва лашо мануш* дес десэстар мучияспэ через лэндири найлащи дила, кодэлэстар, со во диқэлас и ашунэлас, кала жувэлас машкар лэндэ.
9 Вижал, о Иегова ӷанэн, сар тэ фэрий лэ ԥаримастар кодэлэн, ко стол бари патив пэр лэстэ, и сар тэ ашавэл лэ ӷрешниконэн, кай тэ спушэл лэндар андо дес важ о сындо,
10 особено кодэлэн, ко старыийпэ тэ римой* аврэн и ко на стол патив пэ кодэла, кастэ исин власть.
Кадэла наӷли и путярдэ хохавнэ учителёря на лажан абисо тэ дэн дума пала кодэла, ко ашэля ашунгло лэ Дэвлэстирэ зорэса.
11 Но андэ кодэя жэ время и анӷелоря, савэ май састэ и май зоралэ, на дошалярэн и на дэн дума абисо пала кадэла хохавнэ учителёря, важ кода кай стон патив по Иегова.
12 Кацавэ мануша шонпэ пэ дилэ жывотни, савэ вся терэн нэосознано и арақадён, кай лэн тэ астарэн и тэ умарэн. Вонэ абисо дэн дума пала кода, со на полэн. Вонэ цырдэ бида пэ пэско шэро, кала жылэ па дром, саво андярэл каринг и смэрть,
13 и о Дэл спушэла лэндар важ лэндири вэрыто дила.
Лэнди чалёл дажэ десэ тэ терэн кадя, сар камэл и ӷрешно тила. Вонэ — сар пятноря пэ ӥда и сар шраморя по муй, лэнди цыл па ди тэ дэн дума пала хохаимос, савэсти вонэ сытярэн, кала бэшэн тумэнца пала ек мисяйля.
14 Лэн фартэ цырдэл тэ терэн билажавардимос, вонэ подэнпэ лэ бэзэхэсти и змарэн па правильно дром кодэлэн, ко слабо. Лэнго ди сыкло тэ авэл жадно. О Дэл дя лэн амрая.
15 Вонэ зжылэ па правильно дром и банделэ андэ риг. Вонэ жылэ па лэ Валамоско дром, лэ Бёростирэ шавэско, саво ԥаролас, кай лэсти тэ потинэн важ и найлащи дила,
16 но о Дэл сыкадя лэсти пэ лэско бэзэх. О жывотно, саво на ӷанэнас тэ дэл дума, задя дума сар мануш и тердярдя кадэлэ пророкос андэ лэско дилимос.
17 Вонэ — сар шущи хаинг и сар туча, сави даравэл и бари балвал. Лэн аштярэл фартэ бари тэмнота.
18 Вонэ путярдэс дэн дума, но андэ кода, со вонэ ԥэнэн, нинай нисаво толко. Вонэ подэнпэ кодэлэсти, со камэл лэндири ӷрешно тила, и бисовисно* пэс андярэн, и кадя змарэн па правильно дром кодэлэн, ко кати найдэлмут дуреля лэ манушэндар, савэ терэн найлашымос.
19 Кадэла хохавнэ учителёря дэн лэнди алав, кай вонэ ашэна свободни, но екжэнэ ашэнпэ лэ бэзэхэстирэ раборя, важ кода кай о мануш ашэл рабо кодэлэско, кастэ* исин власть пэр лэстэ.
20 Кадэла хохавнэ учителёря, кала уӷанглэ о чачимос пала Ӷосподино и Спасителё о Иисус Христос, ашадэ кадэла люматири маӷримэ дила, но потом вонэ упалэ рисайлэ каринг латэ и ашэлэ латирэ раборя. Вижал, акана лэнди инке май вэрыто, чем сас спэрва.
21 Важ лэндэ авелоп фэдэр тэ на ӷанэн лэ Дэвлэстири время, чем, посли кода сар уӷанглэ ла, тэ отԥэндён лэ свынтонэ законостар, саво лэнди сас ԥэндо.
22 Лэнца тердяпэ кадя, сар ԥэнэнпэ андэ ек пословица: «О риконо рийпэ каринг пэско шаглимос, и о вихаладо бало жал тэ тэвэлийпэ андэ чик».
Сноски
^ Или «бипативалэс». Пэ греческо асе́лгия во мн. ч.
^ Или, можэт, «шутя лэн андэ ямы».
^ Или «бипативалэс». Пэ греческо асе́лгия во мн. ч.
^ Или «мануш, саво ритярэлас лэ Дэвлэско законо».
^ Или «тэ маӷрий».
^ Или «бипативалэс». Пэ греческо асе́лгия во мн. ч.
^ Или «состэ».
