Дуйто письмо андэ Фесалоники 2:1-17
2 Ԥрала, если тэ дас дума пала кодэя время, кала рияпэ амаро Баро Хулай о Исусо Христос, и пала кода, кай амэн стидэна вмести лэса, тоди амэ мангас тумэн:
2 если варико авэла тэ ԥэнэн, кай лэ Иеговаско дес ужэ авеля, старыинпэ здраво* тэ гиндон и нэ пэрэжывайте, дажэ если тумэнди ԥэнэна, кай када ԥэндо лэ Дэвлэстар или кай кадя пистромэ андо письмо, ԥэнэса амэндар.
3 На́ дэн никасти тэ опхохавэл тумэн, важ кода кай кадэва дес авэла кати посли кода, сар лэна тэ оджан лэ чачимастар и всаворэнди дицола* лэ бэзэхэско мануш — о пропащо мануш.
4 Кадэва вороӷо стола пэс май вучес, чем вся, пэр со и мануша ԥэнэн дэвла и сости вонэ тэлён. Во бэшэла андэ лэ Дэвлэстири қандири и лэла тэ вистол пэс сар дэл.
5 Хэба тумэ на сэрэн, кай мэ ԥэнавас тумэнди пала када, кала инке сымас тумэндэ?
6 Акана тумэ ӷанэн, ко лэс зритярэл и на дэл лэсти тэ розжалпэ май данглал, чем трэбуй.
7 Да, лэстири бэзэхэстири дила, пала сави инке на ӷанэн, ужэ жал. Но пала кодэя дила на уӷанэна, пока на ужала кодэва, ко ла щяс зритярэл.
8 И тоди кадэва бэзэхэско мануш лэла тэ терэл и дила англа всаворэ. Но о Баро Хулай о Исусо умарэла лэс пэстирэ зоралэ алавэнца и стерэла када тоди, кала всаворэнди сыкадёла.
9 Лэ бэзэхэско мануш лэ Сатанастирэ зорэса терэл удивительно дила и хохавнэ чудеса,
10 ай кадяжэ хытрияса обдилярэл. Вся када змарэл лэ манушэн, савэ трэбуй тэ хындён. Лэндар спушэн важ кода, кай вонэ на приашунделэ каринг о чачимос, саво спасысардоп лэн, и на цэнинас лэс.
11 Важ када о Дэл домэкэл, кай вонэ тэ авэн обдилярдэ и тэ патян андо хохаимос.
12 Тоди лэнди виандярэна о сындо, кай вонэ на патянас андо чачимос, ай любинас и вэрыто дила.
13 Ԥрала, кас любий о Иегова, амэ трэбуй вся и время тэ блаӷодарисарас пала тумэндэ лэ Дэвлэс, важ кода кай во сразу витидя тумэн, кай тэ спасый. О Дэл свынцосардя тумэн пэстирэ свынтонэ зорэса, важ кода кай тумэ патяе андо чачимос.
14 Во ақардя тумэн тэ спасынпэ через и лащи новость, сави амэ росԥэнас, кай тумэ тэ ашэн ашунглэ, сар и амаро Баро Хулай о Исусо Христос.
15 Важ када, ԥрала, ашэнпэ састэ и приритярдён кодэлэсти, со тумэнди пэрэдинэ* алавэса или через и письморя.
16 Амаро Баро Хулай о Исусо Христос и о Дэл, амаро Дад, саво полюбисардя амэн и через кода, кай здиқля пар мэндэ па пэско баро ковло ди, терэл амэнди май вушэро по ди пэ вся и вечность и дэл тэ надеисавас по лашымос.
17 Мэк вонэ стерэн тумэнди по ди май вушэро и дэн тумэнди зор*, кай тумэ тэ терэн лащи дила и тэ ԥэнэн лашэ алава.
Сноски
^ Или «твэрэзо».
^ Или «сыкавэла пэс».
^ Или «сости тумэн сытярдэ».
^ Или «поможын тумэнди тэ ашэн май састэ».
