О хулай и хулаи трэбуй тэ авэн, сар ек, и тэ терэн и дила вмести, сар о пэрво и о дуйто пилото. Дажэ кала исин о ԥаримос, кажнонэсти андар лэндэ трэбуй тэ гиндон «амэ», ай най «мэ».

БИБЛЕЙСКО ПРИНЦЫПО. «Лэн ужэ най дуй, ай вонэ ек тила» (Матфея 19:6).

«Кай андо ери тэ авэл вся драго, трэбуй кай о хулай и хулаи вмести тэ терэн и дила» (Кристоферо).

Кала андо ери, андэ саво о хулай и хулаи на ладин и на полэн ек еқэс, авэла ԥаримос, лэндэ на вижала тэ полэн, сар тэ улэн кадэя проблема. Вонэ лэна тэ ханпэ ек еқэса. И тоди анда кода, со можно сас тэ обжан, вонэ стерэна бари проблема.

«Андо брако фартэ важно, кай о хулай и хулаи тэ авэн, сар ек ери, а най сар и сосидоря. Тэ на авэл кадя, жувэн вмести андэ ек цэр, но кажно терэл па пэстирятэ» (Александра).

ПУШ ПЭСТАР

• Гиндосарав мэ, кай и ловэ, савэ затерав, када кати мэрнэ ловэ?

• Трэбуй манди, кай паша мандэ тэ на авэл мэрно хулай или хулаи, кай тэ отцыював?

• На камав мэ тэ дав дума чи тэ зажав кай лэ хуласко чи ла хулаяко родо, дажэ кала амэ лэнца ладисарас?

ПОДЭН ДУМА ЕК ЕҚЭСА

• Кала амэндэ вижал вмести тэ терас и дила сар ери?

• Андэр со амэндэ на вижал тэ терас вмести дила, сар ек ери?

• Со поможыя амэнди инке май фартэ тэ авас ек пала еқэстэ?

СОВЕТОРЯ

• Прецтавь пэсти иӷра тэнисо, андэ сави дуй мануша цэлэн па разни рига. Вместо кода, кай тэ авэн па разни рига, стерэн вся, кай тэ авэн пэ ек риг и тэ цэлэн, сар ек команда.

• Авелоп драго тэ гиндос «Сар амэ тэ вицэлас?», ай тэ на гиндос «Сар мэ тэ вицэлав?»

«На дошалярэн ек еқэс. Фэдэр тэ терэн вся, кай андо ери тэ авэл мирно» (Итано).

БИБЛЕЙСКО ПРИНЦЫПО. «Терэн драго най кати важ пэстэ, ай и важ авэр» (Филиппийцам 2:3, 4).