О Поло: Амэндэ пэрэхутилдя о фано! Сас ноябрё 1985 бэрш. Амэн кати бишалдэ андэ Либе́рия (Западно Африка) тэ росԥэнас важ о Дэл, и амэ лаглям интя. Амаро самолёто спэрва привуряйля андо Сенега́ло. Сэрав, сар и Эн ԥэндя: «Ужэ через часостэ амэ аваса андэ Либерия!» И почти сразу амэ ашундям: «Кодэла, ко вурял андэ Либерия, трэбуй тэ вижан анда самолёто. Котэ о миро звазгляпэ по правительство и амэ не сможэм тэ бэшарас интя о самолёто». Важ када амэнди прижыляпэ тэ заритярдювас пэ дэш деса кай амарэ ԥрала андо Сенега́ло. Пока амэ самас котэ, амэ ашунасас страшни новости анда Либерия пала ӷрузавикоря, савэ сас заԥэрдэ мулэ манушэнца, и кай котэ рострелинас кодэлэн, ко на ритярэл о каменданцко часо.

И Эн: Амэ най фартэ любисарас приключении. Пэр мандэ вобще жы цынёнятэ ԥэнэнас пэрэдарадёры. Ман тиной, дажэ кала мэ просто пэрэжав о дром. Но амэ всаек фартэ камасас тэ попэрас андэ Либерия.

О Поло: Мэ и Эн анда западно Англия и жувасас най дур ек еқэстар. Сразу посли школа амэ лэдуй ашэлям пианероря. Андэ када амэн фартэ подритярэнас мэрнэ родителя и ла Энати дэй. И вонэ сас фартэ ради, кала амэ витидям со май бут время тэ отдас важ лэ Дэвлэстири дила. Кала манди сас 19 бэрш, ман ақардэ андо Вефилё, ай и Эн попэля интя посли амаро ябьяв андо 1982 бэрш.

И Эн: Амэнди чалёлас андо Вефилё, но амэ всегда камасас интя, кай на хутилэл манушэн тэ росԥэнэн пала Дэл. Ай кала андо Вефилё амэ терасас бути кодэлэнца, ко варикала терэлас лэ Дэвлэстири дила андэ авэр страна, амаро ди цырдэласпэ каринг када инке май фартэ. И кажно вечеро трин бэрш подряд амэ мангасаспэ пала када лэ Иеговасти. И сави жэ када сас важ амэндэ бах, кала амэн ақардэ андэ Школа Галаадо! Амэ сытелям андо 79-то класо, и амэн бишалдэ андэ Либерия.

О Поло: Сар кати андэ Либерия линэ упалэ тэ вурян и самолёторя, амэ сразу вуряйлям интя. Котэ  сас фартэ найспокойно и андэ страна идоси сас о каменданцко часо. Даже если варикастэ тэ зарэвисардоп и машына, о миро затиносайлоп даратар! Кай амэндэ тэ авэл спокойно по ди, амэ кажно вечеро ла Энаса адиносарас Псалмы. Да, котэ сас найвушэро, но амэ па чачимастэ любисарасас амари дила. И Эн росԥэнэнас важ о Дэл лэ ӷуртоса, ай мэ теравас андо Вефилё. Манди випэля бах тэ терав ек дила лэ ԥралэса, савэс ақарэнас Джоно Чару́ко a. Во ужэ бут время жувэлас андэ Либерия и драго ӷанэнас, саво ԥаримос пэрэандярэнас катутнэ ԥрала и ԥэя. Мэ бут сости лэстар сытелэм.

И Эн: И Либерия сразу запэля амэнди андо ди кодэлэса, кай и ԥрала и ԥэя анда вся ди шутэ амэн сама. Вонэ сас фартэ одялэ, проандярэнас амэнца бут время и анда ди кандэнас лэ Дэвлэс. Амэ сразу приԥанделям каринг лэндэ, и вонэ ашэлэ важ амэндэ сар чаче. Вонэ вся и время подритярэнас амэн и дэнас бут лашэ советоря. Ай и мануша котэ ашунэнас важ о Дэл, сар андэ сказкатэ! Вонэ холявэнас най через кода, кай амэ лэндэ авасас, ай через кода, кай ужасастар, сар лэнди здэласпэ, фартэ ӥто. Ай инке сас кацаво: жас па вулица и ашунэс, сар и катутнэ мануша дэн дума пала Дэл. Амэнди ашэласпэ кати тэ поджас и тэ задас дума лэнца. Кадя бут мануша камэнас тэ уӷанэн пала Дэл, кай амэндэ дажэ на хутилэлас пэр лэндэ время. Всаворэнди бы кацавэ проблемы!

О Поло: Штар бэрш андэ Либерия сас чуть май спокойно, ай андо 1989 бэрш андэ страна заляпэ война. Андо дуйто июлё андо 1990 бэрш и халавдэ захутилдэ о раёно, кай сас о филиало. Трин шон амэндэ никаса на сас связь — ни амарэ родоса, ни лэ ԥралэнца анда ӷлавно баро цэр. Андэ страна о миро витерэлас биды, и сас боқалимос и жэстокость. Бутэ жувляндар асаепэ. И вся када цырдэласпэ 14 бэрш.

И Эн: И мануша анда разни ӷрупы умарэнас ек еқэс. И шындимаря, савэ сас замардэ мардянца, ԥирэнас па вулицы и опчорэнас кажно цэр. Важ дэсавэ тэ умарэс манушэс сас, сар тэ зашынэс каӷня. Пэ посторя (дэсавэ сас паша Вефилё) пачкэнца пашлёнас мулэ мануша, савэн рострелисардэ. Машкар лэндэ сас и амарэ ԥрала и ԥэя и дуй ԥрала, савэн бишалдэ кардэ анда Америка.

И чордэӷаря родэнас манушэн анда авэр ӷрупы, савэн вэрыцынас, и, кала виарақэнас, умарэнас лэн. Важ када бут свидетеля гаравэнас пэстэ лэ ԥралэн и лэ ԥэян. Андо Вефилё варикасти динэ ҭан по пэрво этажо, ай варикасти — андэ комнаты упрэ.  Например, амэ жувасас андэ комната лэ ереса, андо саво сас семь мануш.

О Поло: Кажно дес и мануша лэ мардянца авэнас тэ продиқэн, гаравас амэ варикас чи най. Важ када пала Вефилё слединас штар ԥрала: дуй тердёнас паша вороты и дуй диқэнас пала лэндэ анда фэлястра. Па кода, сар вонэ ритярэнас и вас, амэ поласас, со трэбуй тэ терас. Кала и вас кай и ԥрала сас англэ — значит, вся драго. Ай если вонэ ритярэнас лэн пала думэ — трэбуй сас май ӥто тэ гаравас лэ ԥралэн и лэ ԥэян.

И Эн: Прожылэ бут курте, и всаек и холинатирэ бандиторя лэ мардянца динэ андо Вефилё. Амэ еқа ԥьяса гараделям андэ вана и заԥандадям и двэри. Котэ тердёлас шкафо, ай тала лэстэ сас секретно ҭан. Сар кати и ԥэй заӷульдя интя, и бантироря холяса линэ тэ марэн андэ двэри. Вижал, вонэ слединас пала мандэ. Кай тэ поцырдэл и время, о Поло ԥэндя лэнди: «Мэрни хулаи андо туалето, щас вой вижала». Но полокорэс тэ заԥандавас и секретни двэри и май ӥто тэ пошас палпалэ и кирпы андо шкафо амэндэ на вижыля. Ман ля тэ тиной даратар. Сар мэ кацавэ пэрэдарадэ муеса ԥэрнавава и двэри? Вонэ жэ вся полэна! Мэ лэм тэ мангавпэ лэ Иеговасти. И кала мэ ԥэрнадэм и двэри, мэ старысайлэм тэ задав дума лэнца кадя, ԥэнэса нисо и на сас. Ек бандито отшутя ман, поджыля ворта каринг о шкафо и ля тэ рыийпэ андэ кирпы. Но во дя наздив, кай нисо на виарақля. Посли када и бандиторя обродэ авэр комнаты и о чердако, но упалэ нисо на виарақлэ.

О Поло: Дэсавэ шона амэндэ почти на сас тэ хас. Но амэндэ сас само ӷлавно — дэвликуно хамос. Дэкала андо Вефилё и утренё библейско проӷрама сас важ амэндэ сар завтрако, саво придэлас зор кажно дес.

Тэ кончисайлоп андо Вефилё о хамос и о паи, амэнди прижылопэ тэ жас тэ родас лэс и тэ ашавас екжэнэн лэ ԥралэн и лэ ԥэян, савэ амэндэ гарадёнас. Тоди лэн моӷли бы тэ умарэн. Но о Иегова всегда поможыяс амэнди и дажэ кадя, сар амэ не моӷли дажэ тэ згиндосарас! Во вся и время сас паша амэндэ и поможыяс тэ виритярас кадэя найвушэро время.

Хоть андэ страна ашэлас вся май страшно, лэ Дэвлэско чачимос на парашэлас тэ ԥабол. Лэ ԥралэнди и лэ ԥэянди най еқвар прижаласпэ тэ унашэн, кай тэ спасынпэ. Но вонэ вся виритярдэ и ашэлэпэ састэ андэ вера. Дэсавэ дажэ ԥэнэнас, кай кадэя война поможысардя лэнди тэ авэн ӷотови каринг и само бари бида. И смили барэдэр ԥрала и тэрнэ ԥрала на жалуинас пэс, кай тэ заботинпэ пала ӷурторя. Бутэнди анда свидетеля прижыляпэ тэ ашавэн пэстирэ цэра, но дажэ тоди вонэ на парашэлэ тэ росԥэнэн важ о Дэл и тэ стидэнпэ еқэҭанэ. Вонэ строинас совсем прости лэ Царствостирэ залоря анда кода, со виарақэнас андо вэш. И ӷурторя важ и ԥрала и ԥэя сас, ԥэнэса, сар шудро паи андо жарко дес. Ай и лащи новость, сави вонэ росԥэнэнас аврэнди, придэлас зор и лэнди. Кала амэ роздасас о хамос и ӥда, бут ко мангэлас най ӥда,  ай сумка важ лэ Дэвлэстири дила. Када кадя лэлас лэ одестар! Лэ манушэнди андэ Либерия сас кадя ԥарэс по ди, кай вонэ жадностяса ашунэнас и лащи новость. Вонэ дэнас наздив кодэлэстар, кай андо кацаво ԥаримос и бида, и свидетеля ашэнаспэ бахталэ и лошалэ. Вонэ сас сар свето андэ кадэя тэмно люма (Матф. 5:14—16). Через када дажэ кодэла, ко умарэлас лэ мирос, май интя ашэлэ лэ Иеговастирэ свидетеля.

О Поло: Най еқвар амэнди прижаласпэ тэ уладас анда Либерия. Тривар — найпэдолӷонэстэ и дувар — по цыло бэрш. Ек ԥэй, савя тожэ бишалдэ андэ авэр страна тэ терэл лэ Дэвлэстири дила, фартэ точно ԥэндя, со амэндэ сас по ди андэ кацавэ маменторя: «Сар амэн и сытярэнас андо Галаадо, амэ всаворэ́ одеса приԥанделям каринг и ԥрала и ԥэя котэ, кай амэ самас. Важ када, кала амэнди прижаласпэ тэ ашавас лэн андэ кацави ԥари время, амэндэ росшындёлас оди». Но драго, кай пока амэ самас андэ авэр страны, амэ всаек моӷли тэ заботисавас пала лэндэ.

И Эн: Андо маё андо 1996 бэрш амэ постидям андэ машына всаворэ важни лила пала лэ Дэвлэстири дила андэ Либерия и улаглям андо май спокойно ҭан, саво сас май дур лэ Вефилёстар пэ 16 километроря. Амэнца сас инке авэр дуй свидетеля. Но андо дром амэнди попэрделэ и бандиторя. Вонэ линэ тэ стрелин андо воздухо, тердярдэ амэн, вишутэ анда машына всаворэн, ай лэ Полос ашадэ, и улаглэ пэр латэ ко ӷан каринг. Амэ задиляйлям, но потом додиқлям, кай о Поло жал каринг амэндэ. Лэстэ питялас о рат па чикат. Амэ гиндосардям, кай лэсти стрелисардэ андо шэро! Андэ дар амэ дажэ на полям, кай тэ авелоп када кадя, во ужэ мулиноп. Вижыля кадя, кай ек анда бандито дясасдап лэс па шэрэстэ, кала вишолас анда машына. Драго, кай динэдап лэс най фартэ.

Потом амэ додиқлям о ӷрузавико, пэ саво и халавдэ ундярэнас май дур ла войнатар лэ катутнэ манушэн. Важ кода, кай о ӷрузавико сас фартэ замардо, амэ смоӷли тэ хутилдювас кати пала кузаво. Но о водителё кадя шынделя па ҭан, кай амэ чуть на умарделям. Амэ фартэ мангасас лэс тэ тердёл, но даратар во амэн дажэ на ашунэнас. На полэса сар, но амэндэ вижыля тэ уритярдювас, но, кала о ӷрузавико терделя, всаворэ амэ тиносавасас даратар.

О Поло: Амари ӥда сас фартэ мэлали и росшынди. Амэ диқасас ек пэ ек и вобще на поласас, сар амэ ашэлямпэ жундэ. Кода рят амэ проандярдям пэ мал. Ай по авэр дес по вертолёто, саво вся сас андэ дыркэндэ лэ пулендар, амэ авелям андо Сера-Лёнэ. И хоть амэ самас лошалэ, кай вижудям, амаро ди дуқалас пала ԥрала и ԥэя андэ Либерия.

И Эн: Амэ авелям андо Вефилё андо форо Фрита́уно. Котэ пала амэндэ фартэ драго заботинаспэ. Амэ попэлям андо тихо и спокойно ҭан, но мэ лэм тэ мучисавав, кала згиндосаравас пала кода, со амэ пэрэжудям андэ Либерия. Десэ ман на одмэкэлас и дар и манди сас найдраго, мэ сымас сар андэ сунэстэ. Ай и рят манди снинаспэ страшни сунэ, и мэ прошаваспэ вся андэ потостэ. Но инке манди терэласпэ наймишто, и мэ нащи ԥурдавас. Тоди о Поло лэлас ман вастэстар и вместе манца мангэласпэ. Амэ дилабасас амарэ диля, пока ман на парашэлас тэ тиной. Манди здэласпэ, кай мэ зжав па годятэ и будэр не смоӷу тэ терав лэ Дэвлэстири особо дила.

Мэ никала на бистрава, со сас посли када. Пэ кодэва жэ курко, кала вся када мандэ заляпэ, амэнди авелэ дуй журналоря. Ек андар лэндэ — када «Прошонпэ!» пала 8 июнё 1996 бэрш, андэ саво сас статья «Сар тэ бирос о приступо, кала резко шол андэ дар?». Акана мэ полэм, со манца най кадя. Ай о дуйто журнало — када «Сторожэво башня» пала 15 маё 1996 бэрш, котэ сас статья «Катар лэндэ лэлпэ зор?». Котэ ԥэнэнаспэ, кай и бабочка можэт тэ вурял, дажэ если латэ ԥагэ ԥақора. Точно кадя жэ и амэ лэ Иеговастирэ зорэса можэм тэ на парашас тэ терас варисо важ авэр, дажэ кала амэнди фартэ ԥарэс по ди. Када сас дэвликуно хамос, саво о Иегова дя амэнди, кала сас фартэ трэбуй (Матф. 24:45). Мэ дажэ стидэмас дэсавэ статьи пэ кадэя тема и пэрэадиносаравас лэн. Прожыля время, и кода, со манца терэласпэ через о стрэсо, ля тэ прожал.

О Поло: Каринг о 2004 бэрш прожылэ ужэ почти 20 бэрш, сар амэн бишалдэ андэ Либерия. Важ кадэя время амэ фартэ приԥанделям каринг латэ.  И война ужэ будэр на сас, андо филиало тидэнаспэ тэ терэн строительно бути, и андэ кадэва маменто амэнди ԥэндэ тэ пэрэладас андэ авэр страна.

Тэ ласпэ пала нэви дила сас фартэ найвушэро. Амэ кадя приԥанделям каринг и катутнэ ԥрала и ԥэя, кай ужэ нащи жувасас би лэнго. Еқвар амэ ужэ ашадямас амарэ чачен, кай тэ ладас андо Галадо. Тоди амэ отдямас пэс андэ лэ Иеговастирэ вас, и во анда ди блаӷословил амэн. Важ када амэ решыли тэ пэрэладас и очутисайлям андэ Га́на.

И Эн: Англа кода сар тэ уладас, амэ фартэ ровасас. И сар жэ амэ дям наздив, кала ек ԥуро ԥрал, савэс ақарэн Фрэ́нко, ԥэндя амэнди: «Тумэ трэбуй тэ бистрэн пала амэндэ!» Потом во ԥэндя: «Канешно, тумэ всегда лэна тэ сэрэн пала амэндэ, но тумэнди трэбуй авэла тэ пристон вся о зор андэ нэви дила. Када о Иегова тумэнди ла дя. И акана тумэнди трэбуй авэла тэ отдэн вся пэстири любовь лэ ԥралэнди и лэ ԥэянди андэ Гана». Кадэла алава динэ амэнди зор. И хоть андэ Гана мало ко амэн ӷанэнас и вся сас важ амэндэ нэво, сар амэ кати авелям интя, амэ сразу лям тэ виарақас пэсти друӷонэн.

О Поло: Трэбуй сас совсем набут время, кай амэ тэ полюбисарас амарэ нэвэ дэвликунэ ерес андэ Гана. Котэ сас кадя бут свидетеля! Вонэ анда вся ди кандэнас и патянас андо Иегова и кадэлэса сыкадэ амэнди лашо примеро. Амэ прожудям андэ Гана 13 бэрш, и акэ амэн упалэ манглэ тэ пэрэладас — пэ кадэва разо андэ восточноафриканско филиало андэ Ке́ния. И хоть амэ фартэ нудисарасас пала амарэ друӷоря, и ԥрала и ԥэя андэ Кения сразу ашэлэ важ амэндэ сар пэстирэ. Амэ попэлям андо филиало, саво диқэлас пала лэ Дэвлэстири дила пэ бари територия, и котэ сас кадя бут бути!

И Эн: Андэ амари жызня сас бут ԥаримос. Обычно, важ о зор када на прожал кадя. И лэ Дэвлэстирэ манушэн када на обжал. Сар кати мэ ашунав, кала варико стрелий или варисо взорвийпэ, ман лэл тэ тошний и лэн тэ мутон и вас. Но о Иегова вся и время можэт тэ дэл помощь и во кадяжэ терэл када через и ԥрала и ԥэя, и мэ полэм када пар пэстэ. Ай инке мэ полэм: кала жувэс па лашо дэвликуно ӷрафико, о Иегова дэла зор тэ стерэс любо дила.

О Поло: Амэн дэкала пушэн: «Ну сар котэ жал и дила? Тумэнди чалёл катэ?» Ӷанэн, важ амэндэ и страна най само ӷлавно. Мэк дажэ вой фартэ шукарни, и жызня котэ можэт тэ парудёл андо любо маменто. Па чачимастэ само важно важ амэндэ — када амарэ кучутнэ ԥрала и ԥэя. Хоть амэ всаворэ фартэ разни, амэн пашарэл ек каринг ек и любовь каринг о Иегова. И диқэн, сар дэ интересно вижыля: амэн ла Энаса бишалэнас андэ авэр страны, кай амэ котэ тэ подритярас лэ ԥралэн и лэ ԥэян, ай вижыля кадя, кай када вонэ подритярэнас амэн!

Кажно разо, кала амэ пэрэладасас, амэ диқасас, кай амаро дэвликуно ери — када чачуни чуда лэ Дэвлэстар. Кай бы амэ тэ на авас, пока амэ машкар кацавэ мануша, амэндэ всегда исин ери и цэр. И амэ точно ӷанас: кала амэ надеисавас по Иегова, во дэл амэнди зор андэ любо ситуацыя (Флп. 4:13).