1, 2. Со терэлпэ амэндэ андо ди, кала амэнца найдраго обжанпэ?

 О ИСУСО росԥэндя примеро важ ек ԥивли. Варико ласа найдраго обжыляпэ и вой мангэлас помощь кай о сындомари. Андэ кодэя время лэ простонэ манушэнца часто найдраго обжанаспэ, важ када лэ Исусостирэ ученикоря драго моӷли тэ полэн кадэла манушня (Лука 18:1—5). И амэ тожэ можэм драго тэ полас кадэла ԥивля, важ кода кай кацаво исин и адес.

² Андэ амари время ашэля нормально, кай и мануша лэн сразу тэ патян кодэлэсти, со ашундэ пала авэр, обжанпэ разнонэ манушэнца най еқэндар и на дэн жызня аврэнди. Важ када, амэ на удивисавас, кала андэ кадэя люма амэнца найдраго обжанпэ (Эккл. 5:8). Ай кала кацаво терэлпэ андо ӷурто, када можэт фартэ тэ дуқавэл амаро ди. Канешно, и ԥрала и ԥэя амэнди най вороӷоря. Если вонэ и холярэн амэн, вонэ терэн када най нарошно, ай важ кода кай най идеальни. Но кадэлэстар амэнди на ашэл май вушэро. Со поможыя амэнди андэ кацави ситуацыя? Лэ Исусоско примеро. Амэ роздиқаса, сар во пэс андярэлас, кала лэса найдраго обжанаспэ лэстирэ вороӷоря. Если и христианоря трэбуй тэ пристон зор, кай тэ любин кодэлэн, ко вэрыто лэнца обжалпэ, то пэскати жэ май фартэ вонэ трэбуй тэ любин лэ ԥралэн и лэ ԥэян. Со кай о Иегова по ди, кала амэнца обжанпэ несправедливо амарэ ԥрала и ԥэя или авэр мануша? Полэл во амэн?

 3. Катар амэ ӷанас, кай лэ Иеговасти най всаек, сар амэнца обжанпэ?

³ О Дэл диқэл вся, со терэлпэ андэ амари жызня. И лэсти най всаек, сар амэнца обжанпэ. «О Иегова любий справедливость» (Пс. 37:28). О Исусо ԥэндя, кай, кала поджала и время, о Дэл «ӥто виандярэла... справедливо сындо» (Лука  18:7, 8). Ӥто о Иегова стерэла кадя, кай вся амари бида будэр на авэла. Во никала на домэкэла, кай амэнца тэ обжанпэ найдраго (Пс. 72:1, 2).

 4. Сар о Иегова поможый амэнди, кала амэнца обжанпэ найдраго?

⁴ Канешно, амэнди инке трэбуй тэ доаштярдювас лащи время лэ Иеговастар (2 Пёт. 3:13). Но во поможый амэнди ужэ акана. О Дэл сытярэл амэн правильно пэс тэ андярас, кай амэ тэ на стерас инке май хужэ. Важ када во бишалдя пэ ԥув пэстирэ Шавэс. О Исусо сыкадя амэнди идеально примеро, сар тэ андярас пэс, кала амэнца обжанпэ найдраго. Ай инке о Дэл дэл амэнди лашэ советоря, савэ моӷут тэ поможын амэнди андэ ԥари время.

АВ ОСТОРОЖНО, КАЙ ТЭ НА СТЕРЭС МАЙ ХУЖЭ

 5. Васо амэнди трэбуй тэ фэрисавас, кала амэнца обжанпэ найдраго?

⁵ Кала амэнца обжанпэ несправедливо, када можэт фартэ тэ дуқавэл амаро ди и дажэ можэт совсем тэ вимарэл анда зор (Эккл. 7:7). Кацаво жэ по ди сас и кай авэр лэ Дэвлэстирэ кандинэ мануша, например, кай о Иово и кай о Аввакумо (Иов 6:2, 3; Авв. 1:1—3). Кала амэ пала када пережываем — када нормально. Но амэнди трэбуй тэ фэрисавас. Если амэ ласа тэ терас кадя, сар цырдэл амэн амаро ди, тоди амэ можэм тэ андярас пэс найгодявэрнэс и тэ стерас кати май хужэ.

 6. Сости амэн сытярэл кода, со сас лэ Авесаломоса? (Кадяжэ диқэн и картинка)

⁶ Со можэт тэ авэл, кала амэнца или кодэлэнца, кас амэ любисарас, найдраго обжанпэ? Амэнди можэт тэ закамэлпэ тэ лас вся андэ пэстирэ вас и тэ рисарас кодэлэ манушэсти. Но кадэлэса амэ можэм тэ терас инке май хужэ. Давайте погиндосараса, со тердясаспэ андо ери кай о царё Давидо. Лэско шаво о Авесаломо задиляйля, важ кода кай о Амноно тердя нахальство лэстиря ԥьяса ла Фамаряса. Па лэ Маисеёско законо лэ Амнонос важ када трэбуй сас тэ умарэн (Лев. 20:17). Хоть амэ и можэм тэ полас, васо о Авесаломо кадя росхоляйля, лэстэ на сас право екжэно тэ сындой лэ Амнонос (2 Сам. 13:20—23, 28, 29).

 7. Сар и несправедливость повлияла по псалмопевцо?

⁷ Если амэнди здэлпэ, кай кодэлэсти, ко амэн холярдя, вся зжалпэ па вас, тоди амэ можэм тэ гиндосарас, сости амэнди тэ андярас пэс правильно. Точно кадя гиндояс и о псалмопевцо, саво пистросардя 73-то  Псалмо. Во пэстирэ яқэнца диқэлас, сар и вэрыти мануша обжанаспэ несправедливо кодэлэнца, ко када на затердя, и вижанас шукэ анда паи (Пс. 73:12). Во кадя умэкля и вас, кай ужэ на диқэлас нисаво лашымос андэ лэ Дэвлэстири дила. Во ԥэндя: «Мэ камавас тэ полав вся када, и када манди на дэлас покоё» (Пс. 73:14, 16). Кадяжэ во прижанделя: «Мэ чуть на пэлэм, мэ чуть на змарделэм дромэстар» (Пс. 73:2). Кацаво жэ тердясаспэ и амарэ ԥралэса. Ԥэнаса, лэс ақарэн Альбе́рто.

 8. Со тердяпэ еқэ ԥралэса, кала лэса найдраго обжылэпэ?

⁸ По Альберто андярдэ евутни дума, кай во чордя лэ ӷуртостирэ ловэ. Через када во парашэля тэ авэл барэдэр ԥрал и хасардя и патив машкар ԥрала и ԥэя. О ԥрал вспоминает: «Андэр мандэ вся тирёлас холятар». Лэсти сас кадя ԥарэс по ди, кай через када во на ԥирэлас пэ собрании панч бэрш. Вся када сыкавэл, со можэт тэ терэлпэ, если амэ ритярас андэр пэстэ холи, кала амэнца обжанпэ найдраго.

САР АНДЯРЭЛАС ПЭС О ИСУСО, КАЛА ЛЭСА НЕСПРАВЕДЛИВО ОБЖАНАСПЭ

 9. Сар обжанаспэ лэ Исусоса? (Кадяжэ диқэн и картинка)

⁹ О Исусо ашадя амэнди райкано примеро, сар тэ андярас пэс, кала амэнца обжанпэ  несправедливо. Лэстирэ чаче гиндонас, кай во зжыля па годятэ. Авэр мануша евья лэс дошалярэнас. И барэдэра андэ иудейско вера ԥэнэнас, кай во терэл ек дила лэ бэнгэнца. Ай и римски халавдэ асанаспэ лэстар и издевались, ай потом умардэ лэс (Мар. 3:21, 22; 14:55; 15:16—20, 35—37). О Исусо на камэлас тэ рий лэнди важ вся када, ай састэс вся виритярдя. Сости амэн када сытярэл?

10. Сар андярэлас пэс о Исусо, кала лэса несправедливо обжанаспэ? (1 Пёт. 2:21—23).

¹⁰ Проадинон 1 Пётро 2:21—23 a. Кала амэнца найдраго обжанпэ, амэ можэм тэ терас кадяжэ, сар о Исусо. Во ӷанэнас, кала тэ дэл дума, ай кала тэ ашэл мулком (Матф. 26:62—64). О Исусо на старыияспэ тэ вивортой кажно алав, саво жалас против лэстэ (Матф. 11:19). О Исусо на даравэлас лэн кодэлэса, кай рия лэнди, ай дэлас дума лэнца пативалэс. Со дэлас помощь лэ Исусости тэ андярэл пэс правильно? Во «отдэлас вся кодэлэсти, ко сындой справедливо». О Исусо ӷанэнас, кай о Иегова диқэл, через со во прожал, и кай авэла время, кала лэско небесно Дад вся исправия.

11. Пала со амэ трэбуй тэ сэрас, кала витидас: тэ ашас мулком или тэ дас дума? (Кадяжэ диқэн и картинка.)

¹¹ Сар амэ можэм тэ терас, сар о Исусо, кала амэнца обжанпэ несправедливо? Амэнди трэбуй тэ следисарас, со амэ дас дума. Если варисо тердяпэ найсерьёзно, амэ можэм просто тэ ԥандавас пэ када и яқа или тэ проашас мулком, кай пэстирэ алавэнца тэ на стерас инке май хужэ (Эккл. 3:7; Иак. 1:19, 20). Ай бывает, наоборот, амэ трэбуй тэ дас дума. Например, кай тэ зашаспэ пала варикастэ или пала чачимос (Дила 6:1, 2). Но  важно тэ андярас пэс спокойно и пативалэс (1 Пёт. 3:15) b.

12. Со значит тэ отдэс вся «кодэлэсти, ко сындой справедливо»?

¹² Кала терас сар о Исусо, амэ можэм тэ отдас вся «кодэлэсти, ко сындой справедливо». Если варико найдраго амэнца обжалпэ или найдраго гиндой пала амэндэ, амэ надеисавас по Иегова. Амэ полас, кай во ӷанэн важ амэндэ вся. Амэ точно ӷанас, кай авэла время, кала во вся ростола пэ пэстирэ ҭана. Када поможый амэнди тэ пэрэандярас, кала амэнца найдраго обжанпэ. Кала амэ патяс лэ Иеговасти и отдас вся андэ лэстирэ вас, амэ на домэкаса, кай андо амаро ди, сар ӷноё, тэ стидэлпэ холи и ненависть. Ай если амэ на зритярас и холи, то можэм тэ шылисавас, и када можэт тэ одлэл амэндар и радость и тэ римой амари дружба лэ Иеговаса (Пс. 37:8).

13. Со поможыя амэнди састэс тэ пэрэандярас, кала амэнца обжанпэ найдраго?

¹³ Пока амэндэ на вижал андэ вся тэ авас кацавэ жэ, сар о Исусо. Дэкала амэ можэм тэ шылисавас андэ дума или андэ дила (Иак. 3:2). Ай дэкала кодэлэстар, кай амэнца обжанпэ найдраго, можэт кадя тэ авэл ԥарэс по ди, кай кадэя дук на прожала, пока на парашэла тэ авэл кадэя найлащи люма. Если кацаво терэлпэ андэ тири жызня, ту можэш тэ патяс: о Иегова ӷанэн, со тути прижалпэ тэ пэрэандярэс. И лэско Шаво драго полэл, со тутэ по ди, важ кода кай лэса тожэ обжанаспэ несправедливо (Евр. 4:15, 16). О Иегова най кати дя амэнди тэ уӷанас лэ Исусоско идеально примеро, но и запистросардя андэ Библия лашэ советоря, савэ поможын тэ ашаспэ састэ андэ ԥари время. Роздиқам дуй кацавэ советоря анда Письмо андо Римо.

«ДОМЭКЭН ЛЭ ДЭВЛЭСТИ ТЭ СЫКАВЭЛ ПЭСТИРИ ХОЛИ»

14. Со сыкавэн и алава «Домэкэн лэ Дэвлэсти тэ сыкавэл пэстири холи»? (Римо 12:19).

¹⁴ Проадинон Римо 12:19. О апостало Павло ԥэндя лэ христианонэнди: «Домэкэн лэ Дэвлэсти тэ сыкавэл пэстири холи». Сар када тэ полас? Анда стихо драго дицол, кай када лэ Иеговастири дила — тэ сыкавэл и холи. Амэ домэкас лэ Иеговасти, екжэно вся тэ ришый, кала и сар во када камэл. Акэ со ԥэнэн о Джоно, савэса обжылэпэ найдраго: «Кала ман ля и холи, манди прижыляпэ тэ пристав бут зор, кай тэ на лав вся андэ пэстирэ вас. И алава анда Римо 12:19 поможысардэ манди тэ аштярав лэ Иеговас».

15. Васо годявэрнэс тэ домэкас лэ Иеговасти тэ ришый амари проблема?

¹⁵ Кала амэ лас вся андэ пэстирэ вас, амэ хас пэс зорэстар и лас май бут тэ нервичисарас. Но кала амэ домэкас, кай вся тэ ришый о Иегова, амэ терас кати май фэдэр, важ кода кай амэ ашаспэ спокойни и по ди амэнди ашэл драго. О Иегова камэл амэнди тэ поможый. Во кабута ԥэнэн: «Поаштяр набут. Ашав када манди и мэ кадэлэса розлавапэ». О Иегова дэл алав «Мэ спушава». Если амэ патяс кадэлэ алавэнди, тоди амэ можэм тэ на загрыжосавас, важ кода кай ӷанас, кай о Дэл со май фэдэр ришыя амаро вопросо. Кадя и терэлас о Джоно. Во ԥэндя: «Мэ доаштярдювава, кала о Иегова розлэлапэ андэ мэрни проблема, важ кода кай лэстэ вижала када тэ стерэл май фэдэр чем мандэ».

«НА ПАРАШ ТЭ ТЕРЭС ЛАЩИ ДИЛА, КАЙ ТЭ ПОБЕДИС О НАЙЛАШЫМОС»

16, 17. Сар и молитва поможый амэнди тэ победисарас о найлашымос? (Римо 12:21).

¹⁶ Проадинон Римо 12:21. О Павло кадяжэ ԥэндя лэ христианонэнди, тэ на парашэн тэ терэн лащи дила, кай тэ победин о найлашымос.  Андэ пэстири ашунгли дума по плай о Исусо ԥэндя: «Любин пэстирэ вороӷонэн и мангэнпэ пала кодэла, ко тумэн ӷоний» (Матф. 5:44). И о Исусо кадя и жувэлас. Погиндон, сар дэ ԥарэс лэсти сас, кала и римски халавдэ примардэ лэс каринг о столбо. Амэнди дажэ ԥарэс тэ полас, сар во мучияспэ и сар дэ найпативалэс лэса обжылэпэ.

¹⁷ Но дажэ андэ фартэ ԥари время о Исусо на парашэля тэ любий аврэн. Во на ритярэлас холи пэ кодэла халавдэ и на дэлас лэн амрая, ай вместо када, во мангэласпэ: «Дадэ, простисар лэн, важ кода кай вонэ на сэрэн, со терэн» (Лука 23:34). Кала амэ мангаспэ пала кодэла, ко найдраго амэнца обжалпэ, када поможыя амэнди тэ авас май спокойни и тэ на ритярас бари холи пэр лэндэ. Амэ можэм дажэ тэ лас па аврятэ тэ диқас пэ кодэла, ко амэн холярдя.

18. Сар и молитва поможысардя лэ Альбертости и лэ Джоности?

¹⁸ И молитва поможысардя дуе ԥралэнди, пала савэ ԥэнэнаспэ андэ кадэя статья. О Альберто росԥэнэн: «Мэ мангаваспэ пала ԥрала, савэ найдраго манца обжылэпэ, и най еқвар мангавас лэ Иеговас тэ поможый манди тэ одмэкав и холи и тэ бистрав вся, со сас». Щас о Альберто упалэ анда ди терэл лэ Иеговастири дила. Ай акэ со ԥэнэн о Джоно: «Мэ най еқвар мангаваспэ важ о ԥрал, саво фартэ найдраго манца обжыляпэ. Када поможысардя манди тэ диқав пэр лэстэ па аврятэ и тэ парашав тэ сындосарав лэс. Кадэлэстар манди ашэля май спокойно по ди».

19. Со амэнди трэбуй тэ терас, пока амэ жувас андэ кадэя люма? (1 Пёт. 3:8, 9).

¹⁹ Пока амэ инке жувас андэ кадэя люма, амэнди прижалапэ тэ пэрэандярас и несправедливость. Но со бы тэ на авэл, давайте тэ на парашас тэ мангас лэ Иеговастар помощь. Кадяжэ амэ трэбуй тэ лас примеро лэ Исусостар, сар тэ андярас пэс, кала амэнца обжанпэ найдраго. Ай со инке май важно — када и май дур тэ жувас па понятии, савэ запистромэ андэ Библия. И тоди о Иегова блаӷословия амэн. (Проадинон 1 Пётро 3:8, 9.)