1, 2. Сави дила терэн и барэдэр ԥрала?

 ЕСЛИ ту помошнико андо ӷурто, тоди ту ужэ бут со стердян, кай тэ ашэс барэдэр ԥрал. Цырдэспэ ту каринг кадэя «лащи дила»? (1 Тим. 3:1).

² Ай со за када «дила»? И барэдэр ԥрала пристон бут зор, кай май бут тэ росԥэнэн важ о Дэл вмести лэ ӷуртоса. Вонэ терэн вся, кай тэ заботинпэ пала ԥрала и ԥэя и тэ сытярэн лэн. Инке вонэ сыкавэн лашо примеро пэстиря думаса и диласа и кадя придэн лэнди зор. Акана амэ полас, васо андэ Библия ԥэнэнпэ пэ барэдэр ԥрала «блаӷословения» (Еф. 4:8).

 3. Со трэбуй тэ терэл о ԥрал, кай тэ ашэл барэдэр ԥрал? (1 Тимафеё 3:1—7; Тито 1:5—9).

³ Кала лэ манушэс камэн тэ лэн пэ бути, лэстар аштярэн, кай во ӷанэн тэ терэл кадэя дила. Но кай тэ ашэс барэдэр ԥрал на хутила просто тэ ӷанэс драго тэ росԥэнэс важ о Дэл и тэ сытярэс аврэн. Тутэ трэбуй тэ авэл кацаво характеро, пала саво пистромэ андо 1 Тимафеё 3:1—7 и андо Тито 1:5—9 (проадинон). Када амэ и роздиқаса андэ кадэя статья. Амэ подаса дума, со трэбуй тэ терэл о ԥрал: 1) кай пала лэстэ тэ жал лашо алав, 2) кай во тэ диқэл пала пэско ери кадя, сар када камэл о Иегова и 3) кай во анда вся ди тэ поможый лэ ԥралэнди и лэ ԥэянди андо ӷурто.

ЗАТЕР ЛАШО АЛАВ

 4. Сар тэ полэс, кай пала тутэ тэ на авэл нисави дош?

⁴ Кай тэ ашэс барэдэр ԥрал, пала тутэ трэбуй тэ на авэл «нисави дош». Сар када тэ полэс? Ту трэбуй тэ авэс кацаво мануш, пала саво драго дэн дума и ԥрала и ԥэя и саво драго пэс андярэл. Кадяжэ «пала лэстэ драго дэн дума кодэла, ко  най анда амари вера». Канешно, кодэла, ко на андярэл лэ Иеговастири время, моӷут найдраго тэ дэн дума пала кода, андэр со ту патяс. Но лэндэ на трэбуй тэ авэл дажэ поводо тэ гиндон, кай ту андэ варисостэ хохавно и найлашо мануш (Дан. 6:4, 5). Пуш пэстар: «Со пала мандэ гиндон и ԥрала и ԥэя, ай кадяжэ кодэла, ко най Свидетеля?»

 5. Пар со дицол, кай ту любис лашымос?

⁵ Если ту «любис лашымос» тоди ту лэса тэ родэс варисо лашо андэ аврэ манушэско характеро и тэ хвалис лэс пала када. Кадяжэ ту лэса тэ терэс лащи дила важ авэр дажэ май бут, чем тутар аштярэн (1 Фес. 2:8; диқэн о каминтариё каринг о Тито 1:8, и алава «тэ любий о лашымос», андэ «Учебно Библия», англ.). Васо када важно важ и барэдэр ԥрала? Если о ԥрал любий лашымос, лэсти на авэла жалко тэ тратий бут время, кай тэ диқэл пала ԥрала и ԥэя и тэ терэл разно дила, сави лэсти дэн (1 Пёт. 5:1—3). Во можэт тэ тратий пэ када бут зор, но кала во поможый аврэнди, кадэлэстар во фартэ лошало (Дила 20:35).

 6. Сар ту можэш «тэ шос сама аврэн»? (Евреёря 13:2, 16; кадяжэ диқэн и картинка).

⁶ Инке ту трэбуй «тэ шос сама аврэн». Со сыкавэн кадэла алава? Тути трэбуй тэ терэс варисо лашо важ авэр и кадяжэ важ кодэла, ко най тиро пашутно друӷо (1 Пёт. 4:9). Андэ ек библейско справочнико пала кацаво мануш ԥэнэнпэ: «Лэско цэр и лэско ди ни важ кастэ най ԥандадо». Пуш пэстар: «Ӷанэн ман сар манушэс, саво анда ди шол сама всаворэн, ко авэл пэ собрания?» (Проадинон Евреёря 13:2, 16.) Машкар лэндэ моӷут тэ авэн кодэла, ко жувэл фартэ чорорэс, ай кадяжэ и ԥрала, савэ авелэ тэ ԥэнэн и речь, и раёни барэдэр ԥрала и авэр лэ Иеговастирэ мануша, савэ пристон бут зор, кай тэ подритярэн лэ ԥралэн и лэ ԥэян (Быт. 18:2—8; Прит. 3:27; Лука 14:13, 14; Дила 16:15; Римо 12:13).

 7. Сар о ԥрал тэ сыкавэл, кай «на здрал пала ловэ»?

⁷ «На здрал пала ловэ». Со када сыкавэл? Када сыкавэл, кай и ловэ най со май важно андэ тири жызня. Скати ту тэ на затерэс, стов лэ Дэвлэско Царство по пэрво ҭан (Матф. 6:33). Отдэ пэстири время, зор и ловэ, кай тэ поможыс андэ лэ Иеговастири дила и тэ заботиспэ пала пэско ери и пала ӷурто (Матф. 6:24; 1 Иоан. 2:15—17). Пуш пэстар: «Сар мэ диқав пэ ловэ? Лошало мэ кодэлэсти, со мандэ исин, или важ мандэ ӷлавно май бут тэ  затерав и вся и время тэ тинав варисо нэво?» (1 Тим. 6:6, 17—19).

 8. Со сыкавэн и алава «андэ вся тэ ӷанэн мера» и «тэ ритярэл пэс андэ вас»?

⁸ О барэдэр ԥрал трэбуй «андэ вся тэ ӷанэн мера» и «тэ ритярэл пэс андэ вас». Када сыкавэл, кай во трэбуй тэ следий скати хал и пэл, скати время лэстэ ужал, кай тэ отцыёл, ай кадяжэ пала кода, кай тэ утидэлпэ сэжо. Кадэя люма камэл тэ замарэл всаворэнди андо шэро, сар вонэ трэбуй тэ жувэн. Но ту на трэбуй тэ подэспэ кодэлэсти, со на зжалпэ ла Библияса (Лука 21:34; Иак. 4:4). Инке во трэбуй тэ ашэлпэ спокойно, кала лэс старыинпэ тэ холярэн. О барэдэр ԥрал «най матимари». Када сыкавэл, кай во на трэбуй тэ пэл кадя, кай фартэ тэ матёл. Кадяжэ во на ашундёл сар мануш, саво дэкала любий фартэ бут тэ пэл, дажэ если кадэлэстар во фартэ на матёл. Пуш пэстар: «Дицол па мэрни жызня, кай мэ андэ вся ритярав пэс андэ вас?»

 9. Со сыкавэн и алава «здраво тэ гиндой» и «андэ вся порядко»?

⁹ О барэдэр ԥрал трэбуй «здраво тэ гиндой». Када сыкавэл, кай во загиндойпэ пала кода, со пистромэ андэ Библия, кала прилэл разни ришэнии. Во старыийпэ драго тэ росполэл и советоря анда Библия и кадэлэстар ашэл май годявэрно и прилэл правильни ришэнии. Во на грабийпэ, ай старыийпэ тэ розуӷанэн май бут, кай правильно тэ полэл и ситуацыя (Прит. 18:13). Па лэстири жызня дицол, кай важ лэстэ важно тэ радуий лэ Иеговас. Инке кай о барэдэр ԥрал «андэ вся порядко» — када сыкавэл, кай во най росшуто и вся терэл вовремя. По кацаво мануш вся и время можно тэ надеиспэ. Во старыийпэ тэ терэл точно кадя, сар пистромэ. Если ту лэса тэ старыиспэ тэ авэс кацаво мануш, пала саво амэ щас дям дума, тутэ вижала тэ затерэс пэсти лашо алав. Ай акана уӷанаса, со трэбуй тэ терэл о барэдэр ԥрал, савэстэ исин пэско ери.

ДРАГО ДИК ПАЛА ПЭСКО ЕРИ

10. Сар дицол, кай о ԥрал «лашо хулай андэ пэско ери»?

¹⁰ Если тутэ исин пэско ери и ту камэс тэ ашэс барэдэр ԥрал, тоди тири хулаи и всаворэ тирэ бэяцэ трэбуй тэ ашундён лашэ алавэса. Важ када ту трэбуй тэ авэс «лашо хулай андэ пэско ери». Мэк дицол, кай ту любис пэстирэ ерес и драго заботиспэ пала лэстэ. Со андэ када ужал? Тути трэбуй тэ сытярэс пэстирэ ерес па лэ Дэвлэстири время. Например, тэ терэс семейно изучения, тэ заботиспэ пала кода, кай и хулаи и бэяцэ тэ авэн пэ собрании и тэ поможыс кажнонэсти андар лэндэ тэ росԥэнэн важ о Дэл. Васо када кадя важно? О апостало Павло пистросардя «Если мануш на ӷанэн тэ диқэл пала пэско ери, тоди сар во лэла тэ заботийпэ пала лэ Дэвлэско ӷурто» (1 Тим. 3:5).

11, 12. Васо о Иегова шол сама пэ кода, сар андярэн пэс лэ барэдэрэ ԥралэстирэ бэяцэ? (Кадяжэ диқэн и картинка.)

¹¹ Если тутэ исин бэяцэ, савэнди нинай 18 бэрш, вонэ трэбуй тэ авэн «кандинэ и сытярдэ». Тути трэбуй анда вся ди тэ сытярэс лэн. Канешно, сар и всаворэ бэяцэ, вонэ любин тэ цэлэнпэ и тэ балуинпэ. Но важно тэ сытярэс лэн тэ кандэн лэ родителёнэн, тэ стон патив пэ авэр и драго пэс тэ андярэн. Инке ту трэбуй тэ пристос вся о зор, кай тэ поможыс лэ бэятонэнди тэ ашэн лэ Дэвлэстирэ друӷоря и тэ жувэн па библейски понятии, ай кадяжэ, тэ стон цэль тэ болдён и тэ домардён ла.

¹² «И бэяцэ андярэн лэ Дэвлэстири время и кацавэ бэятонэн на дошалярэса, кай вонэ шалыинпэ и на кандэн». Со, если о болдо бэято или о бэято, саво камэл тэ болдёл, стердя баро бэзэх? Сар када можэт повлиять пэ лэско дад? Если во на сытярэлас и на дэлас годи пэстирэ бэятости, тоди, наверно, во будэр не можэт тэ авэл барэдэр ԥрал. (Диқэн «Сторожэво  башня» пала 15 октябрё 1996 бэрш, страница 21, абзацоря 6, 7, пэ руско шыб.)

ПОМОЖЫСАР ЛЭ ӶУРТОСТИ

13. Со сыкавэн и алава «устожливо» и «тэ на тердёл пэ пэско»?

¹³ И ԥрала, савэндэ исин христианско характеро, па чачимастэ блаӷословения важ о ӷурто. Устожливо мануш старыийпэ тэ жувэл мирно всаворэнца и поможый андэ када аврэнди. Кадяжэ во приашундёл каринг авэр мануша и старыийпэ тэ полэл лэнго гиндо. Прецтавь, кай ту ужэ барэдэр ԥрал. Кала стидяпэ лэ барэдэрэ ԥралэнго круӷо, май бут ԥрала витидэн кодэя решэния, сави тути най фартэ чалёл. Со ту терэса, если када на жал против и Библия? Подритярэса ту лэ ԥралэн? Кодэва, ко камэл тэ ашэл барэдэр ԥрал, «на трэбуй тэ тердёл пэ пэско». Важ када, во на трэбуй тэ домардёл, кай вся тэ авэл имено кадя, сар правильно па лэстирятэ. Во полэл, кай важно тэ пушэл совето аврэндар (Быт. 13:8, 9; Прит. 15:22). О барэдэр ԥрал кадяжэ трэбуй тэ «на ӷулел андо скандало» и «на трэбуй тэ авэл холинако». Када сыкавэл, кай лэсти нащи тэ андярэл пэс аврэнца ӷрубо и тэ спорийпэ. Во трэбуй тэ обжалпэ ковлэс лэ манушэнца и тэ стол пэр лэндэ патив. Инке лэсти важно тэ пристол вся о зор, кай тэ ладий аврэнца, дажэ кала када фартэ ԥарэс (Иак. 3:17, 18). Кала ту дэс дума ковлэс и спокойно, када можэт тэ улэл и холи. Када важно андэ дума кодэлэнца, касти на чалён лэ Иеговастирэ свидетеля (Суд. 8:1—3; Прит. 20:3; 25:15; Матф. 5:23, 24).

14. Васо о барэдэр ԥрал — када «най кодэва мануш, саво кати болделя»? Со сыкавэн и алава «тэ отдэл пэско ди важ авэр»?

¹⁴ Барэдэрэ ԥралэса не можэт тэ ашэл «кодэва мануш, саво кати болделя». Када на сыкавэл, кай во трэбуй тэ авэл болдо бут бэрша. Но кай тэ ашэл састо андэ вера, лэсти трэбуй время. Старысав тэ лэс примеро лэ Исусостар. Када поможыя тути тэ гиндос май бут пала авэр, чем пала пэстэ, тэ авэс ӷотово тэ терэс вся, со трэбуй важ и ԥрала и ԥэя, и спокойно тэ аштярэс, кала о Иегова дэла тути тэ терэс май бут (Матф. 20:23; Флп. 2:5—8). Инке о  барэдэр ԥрал трэбуй «тэ отдэл пэско ди важ авэр». Вижал, во трэбуй тэ жувэл па лэ Иеговаско законо и тэ терэл кадя, сар о Дэл ԥэнэн через пэстири орӷанизацыя (1 Тим. 4:15).

15. Трэбуй о барэдэр ԥрал шукар тэ ԥэнэн и речи? Росԥэнэн.

¹⁵ Андэ Библия ворта ԥэнэнпэ, кай о барэдэр ԥрал трэбуй тэ «ӷанэн тэ сытярэл». Сыкавэл када, кай ту трэбуй драго тэ росԥэнэс и речи? Най. Най кай и всаворэ барэдэр ԥрала шукарнэс када вижал. (Диқэн 1 Каринфо 12:28, 29 и Ефесо 4:11.) И всаек, кала о барэдэр ԥрал росԥэнэн важ о Дэл или дэл дума лэ ԥралэнца и лэ ԥэянца, лэсти трэбуй тэ ӷанэн тэ сытярэл и тэ подритярэл лэн. Но кадяжэ лэсти трэбуй тэ старыийпэ тэ ашэл инке май лашо учителё. Со тути андэ када поможыя?

16. Сар тэ ашэс лашо учителё? (Кадяжэ диқэн и картинка.)

¹⁶ О барэдэр ԥрал «трэбуй састэс тэ приритярдёл лэ чачунэ алавэсти, саво жал лэ Дэвлэстар». Важ када, кала ту ԥэнэс и речи или дэс варикасти совето, на́ бистэр, кай вся, со ту ԥэнэс трэбуй тэ авэл па Библия. Важ када, старысав драго тэ розуӷанэс и Библия и амари литература (Прит. 15:28; 16:23). Кала адинос варисаво стихо андэ Библия, старысав тэ полэс, со во сыкавэл. Тоди тутэ вижала тэ стерэс кадя, сар уӷанглян. Кала сытярэс аврэн, старысав тэ лэс лэн лэ одестар. Кай тэ ашэс инке май лашо учителё, пуш совето кай авэр барэдэр ԥрала. Уӷан лэндар, со ту можэш тэ стерэс май фэдэр и тер кадя, сар вонэ потԥэнэн (1 Тим. 5:17). И барэдэр ԥрала трэбуй «тэ придэн зор» аврэнди. Но дэкала лэнди прижалпэ тэ дэн советоря аврэ христианонэнди и дажэ «тэ лажаварэн» лэн. Сар бы тэ на авэл, тэ терэн када трэбуй ковлэс. Если ту обжаспэ аврэнца драго и анда ди, ай и советоря всегда дэс па Библия, када сыкавэл, кай ту лэс примеро амарэ Ашунглэ учителёстар, лэ Исусостар (Матф. 11:28—30; 2 Тим. 2:24).

НА ТЕРДЮВ ПЭ ЕК ҬАН

17. а) Со авелоп драго тэ терэн и помошникоря андо ӷурто, савэ камэн тэ ашэн барэдэр ԥрала? б) Пала со трэбуй тэ сэрэн и барэдэр ԥрала, кала старыинпэ тэ полэн, можэт о ԥрал тэ ашэл барэдэрэ ԥралэса чи най? (Диқэн и рамка  «Барэдэр ԥрала, авэн устожливи».)

¹⁷ Дэсавэ помошникоря гиндон, кай лэндэ никала на вижала тэ ашэн барэдэр ԥрала важ  кода, кай лэнди бут со трэбуй авэла тэ парувэн андэр пэстэ. Но сэр, кай ни о Иегова, ни и ԥрала на аштярэн тутар, кай ту авэса андэ вся идеально (1 Пёт. 2:21). И на бистэр: о Иегова никала на ашавэла тут екжэнэс. Во поможыя тути и дэла пэско свынто зор (Флп. 2:13). Посли кадэя статья, со имено тути закамляпэ тэ лашарэс андэр пэстэ? Мангпэ пала када лэ Иеговасти. Розуӷан май драго, со ԥэнэнпэ андэ амари литература пала кадэя тема, и пуш кай и барэдэр ԥрала, сар ту моӷ бы фэдэр када тэ терэс.

18. Каринг со трэбуй тэ цырдэнпэ и помошникоря андо ӷурто?

¹⁸ Всаворэнди амэнди, дажэ кодэлэнди, ко ужэ ашэля барэдэр ԥрал, трэбуй тэ терас вся, кай амэндэ тэ авэл кацаво характеро, пала саво амэ адес уӷанглям (Флп. 3:16). Ту помошнико андо ӷурто? Тоди старысав тэ терэс важ о ӷурто инке май бут. Манг лэ Иеговас, кай во тэ сытярэл тут и тэ поможый тути тэ парудёс. Кадя тутэ вижала инке май бут тэ терэс важ и ԥрала и ԥэя (Ис. 64:8). Патя: о Иегова точно здиқэла пэр тутэ важ кода, кай ту пристос зор тэ ашэс барэдэр ԥрал!