1. Сар о апостало Павло диқэлас пэ помошникоря андо ӷурто?

 И ПОМОШНИКОРЯ андо ӷурто терэн фартэ важно дила. О апостало Павло фартэ цэнияс кадэлэ муршэн, савэ кандэн лэ Дэвлэс. Например, андо пэско письмо лэ христианонэнди, савэ жувэнас андэ Филипы, во шутя сама, сар лэ барэдэрэ ԥралэн, кадя и лэ помошниконэн андо ӷурто (Флп. 1:1).

 2. Со о Луисо гиндой пала кода, кай во помошнико андо ӷурто?

² И болдэ ԥрала, скати лэнди тэ на авэл бэрш, моӷут тэ ашэн помошникоря андо ӷурто. Например о ԥрал, савэс ақарэн Дэ́вано, ашэля помошнико андо ӷурто, кала лэсти сас 18 бэрш, ай о Лу́исо — кала лэсти сас ужэ пала 50. Кадэя дила анэн лэ ԥралэнди бари радость. О Луисо ԥэнэн: «Важ мандэ бари бах тэ поможысарав лэ ԥралэнди и лэ ԥэянди! Кала мэ гиндосарав, сар вонэ любин ман, манди тожэ камэлпэ варисо тэ стерав важ лэндэ». Кацаво жэ по ди кай и бут ԥрала па вся и ԥув.

 3. Пала со амэ подаса дума?

³ Если ту болдо ԥрал, но инке най помошнико андо ӷурто, погиндосар пала кода, кай тэ стос кацави цэль. Андэ кадэя статья амэ подаса дума, васо ту трэбуй тэ цырдэспэ каринг када и со пистромэ андэ Библия пала кода, саво мануш ту трэбуй тэ авэс. Но спэрва подаса дума, сави дила терэн и помошникоря андо ӷурто.

 СО ТЕРЭН И ПОМОШНИКОРЯ АНДО ӶУРТО

 4. Сави дила терэн и помошникоря андо ӷурто? (Кадяжэ диқэн и картинка).

⁴ О помошнико андо ӷурто — када болдо ԥрал, саво сас витидо свынтонэ зорэса, кай тэ поможый лэ барэдэрэ ԥралэнди андэ само разно дила. Дэсавэ андар лэндэ диқэн, кай лэ ԥралэндэ и лэ ԥэяндэ тэ авэл литература и адресоря важ лэ Дэвлэстири дила. Авэр поможын тэ прилэн и тэ диқэн пала лэ ӷуртоско зало. Кала жал и собрания, вонэ диқэн пала порядко, ай кадяжэ стон музыка и видеоря. Ӷлавно, со терэн и помошникоря андо ӷурто, — када поможын лэ барэдэрэ ԥралэнди андэ обычно дила. Всаворэ вонэ любин лэ Иеговас и жувэн па лэско законо. Кадяжэ вонэ анда ди любин лэ ԥралэн и лэ ԥэян па лэ Дэвлэстири время (Матф. 22:37—39). Сар о болдо ԥрал можэт тэ ашэл помошнико андо ӷурто?

 5. Со трэбуй тэ терэл о ԥрал, кай тэ ашэл помошнико?

⁵ Андэ Библия росԥэнэнпэ, савэ трэбуй тэ авэн и помошникоря андо ӷурто (1 Тим. 3:8—10, 12, 13). Драго розуӷан, со котэ пистромэ, и пристов зор, кай кадя тэ терэс. Но спэрва погиндосар, васо ту камэс тэ авэс помошнико андо ӷурто.

ПОГИНДОСАР, ВАСО ТУ ЦЫРДЭСПЭ ТЭ ТЕРЭС КАДЭЯ ДИЛА

 6. Васо о ԥрал трэбуй тэ цырдэлпэ тэ поможый аврэнди андо ӷурто? (Матфеё 20:28; кадяжэ диқэн и картинка).

⁶ Амэ старысавас тэ шаспэ по Исусо Христос. Во любияс пэстирэ Дадэс и лэ манушэн. Кочай лэско ди цырдэлас лэс тэ пристол зор и тэ поможый аврэнди андэ кодэя дила, сави сас совсем най ашунгли (проадинон Матфеё 20:28; Иоан. 13:5, 14, 15). Если ту тожэ любис лэ Иеговас и лэ манушэн, о Дэл подритярэла тут и поможыя тути тэ домардёс тири цэль — тэ ашэс помошнико андо ӷурто (1 Кр. 16:14; 1 Пёт. 5:5).

 7. Васо найдраго, если о ԥрал камэл тэ ашэл помошнико андо ӷурто кати важ кода, кай пала лэстэ драго тэ дэл дума о миро?

⁷ Андэ кадэя люма и мануша часто задиқэн андо муй кодэлэнди, кастэ вижыля бут со тэ домардёл. Но андэ лэ Иеговаско народо вся совсем па аврятэ. И ԥрала, савэ любин аврэн кадя жэ, сар о Исусо, на камэн тэ хулаин пэ авэр или тэ ашэн барэ ашунглэ мануша. Со, если барэдэрэ ԥралэса или помошникоса андо ӷурто ашэла путярдо мануш, саво камэл кати тэ ашундёл машкар о миро? Во,  наверно, отԥэндёла тэ терэл кодэя дила, сави на шолпэ андэ яқа, но сави важно, кай тэ заботийпэ пала лэ Иеговастирэ бакрорэ. Кацаво мануш можэт тэ погиндой, кай кадэя дила тэлярэл лэс (Иоан. 10:12). Если варико камэл тэ ашэл помошнико андо ӷурто, важ кода кай абурой андэр пэстэ и камэл тэ авэл май ашунгло, о Иегова никала на здиқэла пэ кацаво мануш (1 Кр. 10:24, 33; 13:4, 5).

 8. Со о Исусо поможысардя тэ полэн лэ апосталонэнди?

⁸ Лэ Исусостирэ пашутнэ друӷоря тожэ камэнас тэ терэн май бут андэ лэ Дэвлэстири дила. Но лэндэ най всегда сас правильни гиндоря. Погиндосарам, например, пала дуй апосталоря — о Иаково и о Иоано. Вонэ манглэ лэ Исусостар почотно ҭан андо лэско Царство. Со пэ када ԥэндя о Исусо? Во на хвалисардя лэн, ай, наоборот, росԥэндя лэ апосталонэнди: «Ко камэл тэ авэл машкар тумэндэ ашунгло, трэбуй тэ авэл тумэнди слуӷо, и ко камэл тэ авэл машкар тумэндэ пэрво, трэбуй тэ авэл всаворэнди рабо» (Мар. 10:35—37, 43, 44). И ԥрала, савэ анда ди камэн тэ поможын аврэнди, па чачимастэ авэна блаӷословения важ о ӷурто (1 Фес. 2:8).

СО ТЭ ТЕРЭС, КАЙ ТИРО ДИ ТЭ ЦЫРДЭЛПЭ ТЭ ПОМОЖЫЙ АВРЭНДИ

 9. Со тэ терэс, кай тиро ди тэ цырдэлпэ тэ поможый аврэнди?

⁹ Канешно, ту анда ди любис лэ Иеговас и камэс тэ поможыс аврэнди. И всаек ту можэт най фартэ камэс тэ лэс пэр пэстэ май бут дила андо ӷурто, сави обычно терэн и помошникоря. Со поможыя тути тэ парувэс пэско гиндо? Погиндосар, сар ту лэса тэ радуиспэ, если лэса тэ поможыс лэ ԥралэнди и лэ ԥэянди. О Исусо ԥэндя: «Май бари бах — тэ дэн, ай най тэ лэн» (Дила 20:35). Во кадя и жувэлас и сас фартэ радосно, кала поможыяс аврэнди. Кацаво жэ по ди можэт тэ авэл и тутэ.

10. Сар о Исусо сыкадя, кай радо тэ поможый аврэнди? (Марко 6:31—34).

¹⁰ Погиндосарам пала ек ситуацыя анда лэ Исусостири жызня, сави сыкавэл, кай во сас радо тэ поможый аврэнди. (Проадинон Марко 6:31—34.) Еқвар, кала о Исусо и апосталоря фартэ вицыелэсас, вонэ жылэ андо спокойно ҭан, кай тэ отцыён. Но бут мануша, кала уӷанглэ пала када, дожылэ каринг кодэва ҭан май пэрви, кай тэ ашунэн лэ Исусостири годявэрни дума. Кала о Исусо додиқля чимало манушэн, во моӷ тэ отԥэндёл тэ сытярэл лэн, важ кода кай лэсти и лэ апосталонэнди «найкала сас дажэ тэ бэшэн тэ хан». Или жэ во моӷ тэ росԥэнэн лэнди ек гиндо и тэ одбишалэл лэн цэрэ. Но о Исусо терэлас глаба пала мануша, важ када «во бутэсти ля лэн тэ сытярэл» и парашэля кати «май пашэ каринг о вечеро» (Мар. 6:35). Во стердя када най кай кадя трэбуй сас, ай кай лэстэ задуқая оди пала кадэла мануша. Во любияс лэн и кочай камэлас тэ сытярэл лэн. О Исусо сас фартэ лошало, кала поможыяс аврэнди.

11. Сар о Исусо пэ дила поможысардя лэ манушэнди, савэ авелэ лэс тэ ашунэн? (Кадяжэ диқэн и картинка.)

¹¹ Андэ кодэя ситуацыя о Исусо най кати сытярэлас лэ манушэн, но и позаботисайля пала кода, со лэнди трэбуй. Во стердя кадя, кай важ всаворэ, ко авеля лэс тэ ашунэн, тэ авэл со тэ хан. Потом во мангля пэстирэ учениконэн тэ роздэн кадэва хамос лэ манушэнди (Мар. 6:41). Кадя во сыкадя лэ учениконэнди, сар тэ дэн аврэнди помощь. Кадяжэ во поможысардя лэнди тэ полэн, кай фартэ важно тэ поможын аврэнди пэ дила. Точно кадя и терэн и помошникоря андо ӷурто. Погиндосар, савэ дэ лошалэ сас и апосталоря, кай вместе лэ Исусоса лэндэ вижыля тэ праварэн кадэлэ манушэн, тай инке кадя, кай всаворэ чалелэ! (Мар. 6:42). Канешно, када  сас най пэрво разо, кала о Исусо гиндояс май бут пала авэр, чем пала пэстэ. Вся и время, сави во сас пэ ԥув, во терэлас и дила важ авэр (Матф. 4:23; 8:16). О Исусо сас фартэ лошало, кала сытярэлас лэ манушэн и заботияспэ пала лэндэ. Патя, если ту ашэса помошнико андо ӷурто и лэса анда вся оди тэ поможыс лэ ԥралэнди и лэ ԥэянди, тутэ авэла кацави жэ радость.

12. Васо на трэбуй тэ гиндосарас, кай амэ нисо не можэм тэ стерас важ о ӷурто?

¹² Если ту гиндос, кай тутэ нинай нисаво таланто, на́ помэк о муй. Патя, андэр тутэ точно исин кода, соса ту можэш тэ поможыс лэ ԥралэнди и лэ ԥэянди андо ӷурто. Погиндосар пала лэ Павлостирэ алава, савэ запистромэ андо 1 Каринфо 12:12—30, и манг лэ Иеговас тэ поможый тути тэ полэс, сар кадэла алава тэ прилэс каринг пэстэ. Анда кадэла стихоря драго дицол, кай тутэ, кадя жэ сар любонэ аврэ лэ Иеговастирэ манушэстэ, исин пэско важно ҭан андо ӷурто. Если ту пока не можэш тэ ашэс помошнико андо ӷурто, на́ умэк и вас. Тер вся, со па тирэ зор, кай тэ поможыс лэ Иеговасти и лэ ԥралэнди и лэ ԥэянди. Ту трэбуй тэ патяс, кай и барэдэр ԥрала точно шона тут сама и дэна кодэя дила, сави ту сможэш тэ стерэс (Римо 12:4—8).

13. Со можно тэ ԥэнас пала кода, савэ трэбуй тэ авэн и помошникоря андо ӷурто?

¹³ Погиндосар инке акэ пала со. Почти вся, со пистромэ важ и помошникоря андо ӷурто, поджал и каринг всаворэ христианоря. Важ кода кай амэ всаворэ старысавас тэ ашас май пашэ каринг о Иегова, тэ терас лашымос важ авэр и тэ жувас кадя, кай тэ радосарас лэ Дэвлэс. Кочай, май ӥто всаворэстар, ту ужэ подэс лашо примеро, сар тэ андярэс лэ Дэвлэстири время. Со имено трэбуй тэ терэл о ԥрал, кай тэ ашэл помошнико андо ӷурто?

САР ТЭ ДОМАРДЁС ПЭСТИРИ ЦЭЛЬ

14. Со сыкавэн и алава «андярэн пэс пативалэс»? (1 Тимафеё 3:8—10, 12).

¹⁴ Роздиқаса, со важ и помошникоря андо ӷурто пистромэ андо 1 Тимафеё 3:8—10, 12 (проадинон). И помошникоря андо ӷурто «андярэн пэс пативалэс». Кадэла алава можно инке тэ пэрэандярэн кадя: «Вонэ надёжни; затердэ патив; полэн, кай терэн важно дила». Вся када на сыкавэл, кай тути нащи тэ асас и тэ терэс ԥэряса (Эккл. 3:1, 4). Но каринг и дила, сави тути динэ, трэбуй тэ поджас годяса. Если ту вся и время доандярэс пэстири дила до конца и терэс ла драго, тоди и ԥрала и ԥэя андо ӷурто лэна тэ ӷанэн,  кай моӷут тэ надеинпэ пэр тутэ и лэна тэ стон пэр тутэ патив.

15. Со сыкавэн и алава «вонэ найдвухлични» и «найчорымастирэ, кай тэ лэн и ловэ диляримаса»?

¹⁵ «Вонэ найдвухлични». Када сыкавэл, кай важно тэ на хохавэс, тэ на притерэспэ и тэ на дилярэс аврэн, ай тэ затерэс, кай тути тэ патян и тэ зритярэс пэско алав (Прит. 3:32). Кадяжэ и алава «найчорымастирэ, кай тэ лэн и ловэ диляримаса» сыкавэн, кай о мануш на затерэл диляримаса и на хохавэл андэ ловэ. Ай инке, во на старыийпэ тэ затерэл па ԥрала и ԥэя андо ӷурто.

16. а) Со сыкавэн и алава «на пэрэпэн»? б) Со сыкавэн и алава «вужи совесть»?

¹⁶ И алава «на пэрэпэн» сыкавэн, кай о христианино на трэбуй фартэ бут тэ пэл и тэ ашундёл, сар мануш, саво любителё бут тэ пэл. Лэстэ «вужи совесть», важ кода кай во жувэл па лэ Иеговаско законо. Хоть кацаво мануш най идеально, лэстэ лащи дружба лэ Дэвлэса и кадэлэстар лэстэ спокойно по ди.

17. Со сыкавэн и алава «трэбуй тэ диқэн, поджан вонэ важ кадэя дила чи най»? (1 Тимафеё 3:10; кадяжэ диқэн и картинка).

¹⁷ Сар пистромэ андэ Библия, англа кода сар тэ стон лэ ԥралэн помошниконэнца андо ӷурто, «трэбуй тэ диқэн, поджан вонэ важ кадэя дила чи най». И барэдэр ԥрала трэбуй тэ додиқэн, кай тутэ драго вижал тэ терэс пэстири дила андо ӷурто. Важ када, кала и барэдэр ԥрала мангэна тут варисо тэ стерэс, стер када точно па кодэва порядко, саво ужэ исин, и кадя, сар вонэ тути потԥэнэн. Драго полэ, со ту трэбуй тэ стерэс и каринг саво сроко. Если ту хваткаса терэс кодэя дила, сави тути динэ, и ԥрала и ԥэя шона сама пэ када и ту затерэса лашо алав англа лэндэ. Барэдэр ԥрала, на́ бистрэн, кай лэ болдэ ԥралэн трэбуй тэ сытярэн. (Проадинон 1 Тимафеё 3:10.) Исин андо тумаро ӷурто болдэ ԥрала, савэнди 10—14 бэрш и дажэ инке май тэрнэ? Вижал лэндэ екжэнэндэ тэ адинон и Библия и драго тэ ӷотовяца каринг и собрания? Дицол, кай вонэ старыинпэ тэ отвечают пэ собрания и тэ росԥэнэн важ о Дэл? Если да, тоди дэн лэнди дила, сави поджал па лэндирэ бэрша. Кадя тумэ сможэте «тэ диқэн, поджан вонэ важ кадэя дила». И потом, кала лэнди авэла 17 бэрш, лэн можно авэла тэ стон помошниконэнца андо ӷурто.

18. Сар тэ полас и алава, кай пала манушэстэ нинай дош?

¹⁸ И алава «пала лэстэ нинай нисави дош» сыкавэн, кай лэ христианинос нисар  на вижала тэ дошалярэн андэ варисави бари дила. Канешно, лэ христианонэн моӷут евья тэ дошалярэн. Дажэ по Исусо часто андярэнас хохавни дума и во ԥэндя, кай кацаво жэ авэла лэстирэ учениконэнца (Иоан. 15:20). Но если ту, сар о Исусо старыиспэ тэ андярэс пэс правильно, тоди тутэ вижала тэ затерэс лашо алав андо ӷурто (Матф. 11:19).

19. Со сыкавэн и алава «Кай о помошнико андо ӷурто трэбуй тэ авэл ек хулаи»?

¹⁹ «Кай о помошнико андо ӷурто трэбуй тэ авэл ек хулаи». Кала о Иегова загиндосардя, тэ авэл ери, во приԥэндя, кай лэ муршэстэ тэ авэл ек жувли. И када лэ Иеговаско законо важ всаворэ христианоря (Матф. 19:3—9). О мануш, саво андярэл лэ Дэвлэстири время, никала на трэбуй тэ терэл билажавардимос (Евр. 13:4). Но када инке най вся. Во трэбуй анда вся ди тэ любий пэстиря хулая и никала тэ на задиқэлпэ пэ авэр жувли (Иов 31:1).

20. Со значит тэ авэс лашо хулай пэ пэско ери?

²⁰ «Во трэбуй тэ авэл лашо хулай пэ пэстирэ бэяцэ и пэ вся ери». Ту, сар хулай андо ери, трэбуй драго тэ диқэс пала лэстэ. Кажно курко сти́дэ тирэ ерес, кай май бут тэ уӷанэн важ о Дэл. Часто ԥир кажнонэса анда пэско ери тэ росԥэнэн важ о Дэл. Поможысар тирэ бэятонэнди тэ ашэн лэ Иеговастирэ друӷоря (Еф. 6:4). Если тутэ вижал тэ диқэс пала пэско ери, када сыкавэл, кай ту сможэш тэ диқэс и пала ӷурто. (Диқэн 1 Тимафеё 3:5.)

21. Со моӷут тэ терэн и ԥрала, савэ инке най помошникоря андо ӷурто?

²¹ Кучутно ԥрал, если ту пока най помошнико андо ӷурто, пожалуста, шув сама пэ гиндоря анда кадэя статья и мангпэ пала када лэ Иеговасти. Драго розуӷан, саво трэбуй тэ авэл о помошнико андо ӷурто, и старысав тэ авэс кацаво. Тер вся, кай май фартэ тэ любис лэ ԥралэн и лэ ԥэян, и гиндосар, васо ту камэс лэнди тэ поможыс (1 Пёт. 4:8, 10). Если ту цырдэспэ тэ ашэс помошнико андо ӷурто, ту авэса фартэ лошало, кай поможыс аврэнди. Патя: о Иегова тут анда ди блаӷословия! (Флп. 2:13).