1. Со подарисардя амэнди о Исусо?

 НИ ЕК мануш на стердя кадя дэ бут важ о миро, сар о Исусо. Кала во жувэлас пэ ԥув, во на жалуияс пэско зор, кай тэ поможый аврэнди (Лука 9:12—17). Со май баро анда лэстирэ подаркоря — када лэстири жызня, сави во отдя пала амэндэ (Иоан. 15:13). И посли кода сар о Исусо жунделя, во на парашэля анда вся ди тэ поможый амэнди. Во, сар и дя алав, мангля лэ Иеговас тэ дэл амэнди свынто зор, кай во тэ сытярэл и тэ подритярэл амэн (Иоан. 14:16, 17; 16:13). Ай кала амэ стидаспэ амарэ ӷуртоса, амэнди о Исусо дэл вся, со трэбуй, кай па вся и ԥув тэ поможысарас лэ манушэнди тэ андярэн лэ Дэвлэстири время (Матф. 28:18—20).

2. Пала кастэ жал и дума андо Ефесо 4:7, 8?

² Подам дума пала инке ек подарко лэ Исусостар. О апостало Павло ԥэндя, кай, посли кода сар о Исусо вазгляпэ упрэ, во «дя лэ манушэн сар блаӷословения». (Проадинон Ефесо 4:7, 8.) О Павло ԥэндя, кай кадэя блаӷословения — када мурша, савэ диқэн пала ӷурто (Еф. 1:22, 23; 4:11—13). И дума жал пала помошникоря андо ӷурто, пала катутнэ барэдэр ԥрала, ай кадяжэ пала раёни барэдэр ԥрала a. Канешно, вонэ най идеальни и дэкала шылинпэ (Иак. 3:2). Но амаро Баро Хулай о Исусо Христос через лэндэ поможый амэнди. Вонэ — лэстири блаӷословения важ амэндэ.

3. Сар амэ всаворэ можэм тэ поможысарас лэ ԥралэнди тэ придэн зор лэ ӷуртости? Призындярэн примеро.

 ³ О Исусо стодя кадэлэ муршэн, кай вонэ тэ придэн зор лэ ӷуртости (Еф. 4:12). Но амэ всаворэ можэм тэ поможысарас лэнди андэ кадэя дила. Када сар тэ строисарас Зало Царства. Варико зашол о бетоно или стол о кирпичо. Ай дэко поможый пэ стройка, например, кала тавэл тэ хан или анэн о материало. Точно кадя жэ май бут дила важ о ӷурто терэн лэ ӷуртостирэ помошникоря, и катутнэ барэдэр ԥрала, ай кадяжэ и раёни барэдэр ԥрала. Но всаворэ амэ можэм тэ поможысарас лэнди кодэлэса, со ԥэнас и терас. Давайте подаса дума, сави важно дила вонэ терэн и сар тэ авас блаӷодарни лэнди и лэ Исусости, саво лэн подарисардя амэнди.

И ПОМОШНИКОРЯ АНДО ӶУРТО — «КОДЭЛА, КО ПОМОЖЫЙ АВРЭНДИ»

4. Сави дила андо пэрво вико терэнас и помошникоря андо ӷурто?

⁴ Андо пэрво вико дэсавэ ԥрала сас помошникоря андо ӷурто (1 Тим. 3:8). Пэскати амэ ӷанас, када пала лэндэ пистросардя о Павло, кала ԥэндя пала «кодэла, ко поможый аврэнди» (1 Кр. 12:28). Вонэ слединас пала разни важни маменторя, кай и барэдэр ԥрала май бут тэ шон сама лэ ԥралэн и лэ ԥэян и тэ сытярэн лэн. Можэт, и помошникоря андо ӷурто терэнас копии па Свынти Лила или тинэнас вся, со трэбуй важ кадэя дила.

5. Со и помошникоря андо ӷурто терэн важ и ԥрала и ԥэя?

⁵ Ай соса адес залэнпэ и помошникоря андо ӷурто? Саво лашымос тумэнди кодэлэстар, со вонэ терэн? Кай кадэла мурша чимало дила (1 Пёт. 4:10). Вонэ диқэн пала лэ ӷуртостирэ ловэ и пала участкоря важ лэ Дэвлэстири дила, заԥэнэн и литература, заботинпэ пала апаратура, следин пала порядко пэ собрании и пала Зало Царства. Блаӷодаря кадэлэсти исин порядко, кала амэ росԥэнас важ о Дэл и стидаспэ пэ собрании (1 Кр. 14:40). Ай инке дэсавэ помошниконэнди дэн задании пэ собрания андэ будни деса, и инке вонэ ԥэнэн и библейски речи. Часто кадэлэ ԥралэн мангэн тэ поможын лэ барэдэрэсти андэ ӷрупа важ и служэния. Ай дэкала о барэдэр ԥрал можэт тэ лэл пэса лэ ӷуртостирэ помошникос, кала авэл каринг и ԥрала и ԥэя, кай тэ подритярэл лэн.

6. Росԥэнэн, васо тумэнди куч амарэ помошникоря андо ӷурто.

⁶ Уӷанам, со ԥэнэн и ԥрала и ԥэя пала помошникоря андо ӷурто. Акэ со ԥэнэн и ԥэй Ми́я b анда Баливия: «Тэ авэл лэнди зор! И собрании прожан сар па цылэстэ. Мэ моӷу тэ дилабав, тэ дав каментарии, тэ ашунав речи, тэ диқав картинки и видеоря. Би лэнго када авелоп невозможно!» Инке кадэя ԥэй ԥэнэн: «Кадяжэ вонэ диқэн пала безопасность и поможын амэнди подключица каринг и собрания па интэрнэто. Ай посли проӷрама вонэ подадинон и ловэ важ лэ Царствостири дила, роздэн и литература, ай кадяжэ поможын тэ прилас андо Зало. Хэба можно тэ на авас глаба пала кадэла ԥрала?» Кай и ԥэй Лэ́сли анда Калумбия о хулай служый барэдэрэ ԥралэса. Акэ со вой ԥэнэн: «Андо христианско ӷурто кадя бут дила! Драго, кай дэсави дила лэн пэр пэстэ и помошникоря андо ӷурто, а то мэ вобще на диқлоп пэстирэ хулас. Мэ кадя блаӷодарно кадэлэ ԥралэнди, кай лэнго ди ԥабол и кай вонэ всегда ӷотови тэ дэн зор!» Наверно и тутэ по ди кадя жэ (1 Тим. 3:13).

7. Сар тэ сыкавас лэ помошниконэнди андо ӷурто, кай амэ блаӷодарни лэнди? (Кадяжэ диқэн и картинка.)

⁷ И Библия ԥэнэн амэнди: «Авэн блаӷодарни» (Кол. 3:15). Важно тэ авас блаӷодарни лэ помошниконэнди андо ӷурто най кати андо ди, но трэбуй и тэ ԥэнас лэнди пала када. Акэ сар када терэл о барэдэр ԥрал о Кши́штофо анда Финляндия: «Мэ вся и время старысавав  тэ блаӷодарисарав лэн пала варисо конкретно. Например, пала лэндири дила или пала варисаво лэнго гиндо, саво придя манди зор. Мэ пистросарав лэнди открытка или сообщения и достав интя библейско стихо». Ай акэ со терэн о Паска́лё и Жаэ́ль, савэ жувэн андэ Нэви Каледония: «Андэ послиднё время амэ бут мангаспэ пала помошникоря андо ӷурто, блаӷодарисарас лэ Иеговас пала кадэла ԥрала и мангас, кай во тэ поможый лэнди». О Иегова отвечает пэ кацавэ молитвы, и кадэлэстар о христианско ӷурто ашэл инке май састо (2 Кр. 1:11).

И БАРЭДЭР ԤРАЛА АНДО ӶУРТО — «КОДЭЛА, КО ПРИСТОЛ БУТ ЗОР МАШКАР ТУМЭНДЭ»

8. Сави важно дила терэнас и барэдэр ԥрала андо пэрво вико? (1 Фесалоники 5:12, 13).

⁸ И барэдэр ԥрала андо пэрво вико анда вся ди заботинаспэ пала ԥрала и ԥэя (проадинон 1 Фесалоники 5:12, 13; 1 Тим. 5:17). Вмести вонэ прилэнас решэнии важ о вся христианско ӷурто. Кадяжэ вонэ проандярэнас и собрании и ковлэс сытярэнас лэ ԥралэн и лэ ԥэян, кай тэ фэрин лэндири дружба лэ Иеговаса (1 Фес. 2:11, 12; 2 Тим. 4:2). Канешно, кадэла мурша на бистрэнас пала пэстирэ еря. Вонэ дэнас лэнди вся, со трэбуй важ и жызня, ай кадяжэ поможынас, кай лэндэ тэ авэл састи дружба лэ Иеговаса (1 Тим. 3:2, 4; Тито 1:6—9).

9. Росԥэнэн пала дэсави дила, сави терэн и барэдэр ԥрала.

⁹ Адес и барэдэр ԥрала кадяжэ терэн бут дила. Вонэ ходакоря, савэ розындярэн и лащи новость (2 Тим. 4:5). Вонэ диқэн пала лэ Дэвлэстири дила, сави терэл о ӷурто пэ пэстири територия, сытярэн амэн тэ росԥэнас важ о Дэл и екжэнэ ԥабон кадэла диласа. Кадяжэ и барэдэр ԥрала — одялэ и справедливи сындомаря. Кала о христианино терэл баро бэзэх, вонэ поможын лэсти тэ рий пэстири дружба лэ Иеговаса. Авря ригатар, вонэ диқэн пала кода, кай о ӷурто тэ ашэлпэ вужо (1 Кр. 5:12, 13; Гал. 6:1). Но ӷлавно дила важ и барэдэр ԥрала — тэ авэн пастухоря (1 Пёт. 5:1—3). Вонэ ԥэнэн библейски речи, старыинпэ драго тэ уӷанэн кажнонэс андо ӷурто и подритярэн лэ ԥралэн и лэ ԥэян, кала авэн каринг лэндэ. Ай инке дэсавэ барэдэр ԥрала строин Залоря Царства и диқэн пала лэндэ, поможын тэ стидэн и канӷрэсоря и терэн и дила андэ камитеторя па связи лэ больницэнца и андэ ӷрупы па помощь лэ насвалэнди. И барэдэр ԥрала на жалуин пэско зор важ амэндэ!

10. Росԥэнэн, васо тумэнди куч амарэ барэдэр ԥрала.

¹⁰ О Иегова май данглал ԥэндя, кай авэна лашэ пастухоря, савэ драго диқэна пала лэско народо, и тоди и бакрорэ «будэр на лэна тэ даран и тэ тинонпэ ла даратар» (Иер. 23:4). И Ёха́на анда Финляндия пар пэстэ поля, кай када кадя и исин. Акэ со сас, кала латири дэй фартэ занасвайля: «Чаче тэ ԥэнав, манди на чалёл тэ росԥэнав аврэнди, со мандэ по ди. Но еқвар, кала мэ камавас тэ подав дума варикаса, ек барэдэр ԥрал, савэс мэ най фартэ драго ӷанавас, анда ди ман виашундя. Во мангляпэ манца и ԥэндя, кай о Иегова ман любий. Мэ на сэрав точно, со во ԥэндя. Но мэ сэрав, кай по ди манди ашэля спокойно. Мэ точно ӷанав, кай када о Иегова бишалдясас лэс каринг мандэ, кала када сас трэбуй». Ай сар и барэдэр ԥрала анда тумаро ӷурто поможысардэ тумэнди?

11. Сар можно тэ сыкавэс, кай амэ блаӷодарни лэ барэдэрэ ԥралэнди? (Кадяжэ диқэн и картинка.)

¹¹ О Иегова камэл, кай амэ тэ авас блаӷодарни лэ барэдэрэ ԥралэнди «важ вся, со вонэ терэн» (1 Фес. 5:12, 13). И ԥэй, сави кадяжэ жувэл андэ Финляндия, росԥэнэн: «И барэдэр ԥрала вся и время ӷотови тэ поможын. Но када на сыкавэл, кай лэндэ май бут время и зор, чем аврэндэ или кай лэндэ нинай пэско ԥаримос. Дэкала мэ просто ԥэнав лэнди: „Ту  розлашо барэдэр ԥрал!“». И Сера́ анда Турцыя ԥэнэн: «Лэ барэдэрэ ԥралэн трэбуй тэ подритярэн, кай лэндэ тэ авэл зор и май дур тэ терэн лэ Иеговастири дила. Важ када можно лэнди тэ пистросарас открытка, тэ ақарас лэн вместе тэ хас или тэ жас тэ росԥэнас лэнца важ о Дэл». Исин кацаво барэдэр ԥрал, савэсти ту особено блаӷодарно важ лэстири дила? Ԥэн лэсти пала када или погиндосар, сар инке ту можэш када тэ сыкавэс (1 Кр. 16:18).

И РАЁНИ БАРЭДЭР ԤРАЛА САСТЯРЭН И ӶУРТОРЯ

12. Через кастэ о Исусо андо пэрво вико састярэлас и ӷурторя? (1 Фесалоники 2:7, 8).

¹² О Исусо Христос дя лэ ӷуртости «сар блаӷословения» инке и аврэ муршэн, савэ терэнас авэр дила. Через и барэдэр ԥрала, савэ сас андо Иерусалимо, во бишалэлас лэ Павлос, лэ Варнавас и аврэ муршэн, кай вонэ тэ ездин па разни ӷурторя (Дила 11:22). Состэ? Кай тэ састярэн лэн (Дила 15:40, 41). Кадэла мурша бут состар отԥэндёнас важ и ԥрала и ԥэя и сас ӷотови дажэ тэ хасарэн пэстири жызня. (Проадинон 1 Фесалоники 2:7, 8.)

13. Сави дила терэн и раёни барэдэр ԥрала?

¹³ И раёни барэдэр ԥрала на бэшэн би дилако. Дэсавэ андар лэндэ марэн барэ дрома, кай тэ авэн андэ ӷурторя. Кажно курко о раёно барэдэр ԥрал ԥэнэн най ек речь, подритярэл лэ ԥралэн и лэ ԥэян, кала авэл каринг лэндэ, стидэл лэ пианеронэн и лэ барэдэрэ ԥралэн, кай тэ пэрэдэл лэнди важни гиндоря, ай инке проандярэл встречи важ и служэния. Во стидэл раёни и региональни канӷрэсоря и ԥэнэн пэр лэндэ речи. О раёно барэдэр ԥрал сытярэл пэ школа важ и пианероря, стидэл пэ особо встреча всаворэ́ пианеронэн анда пэско раёно и терэл авэр дила, сави лэсти дэл о филиало, — дэсо анда када можэт тэ авэл фартэ срочно.

14. Росԥэнэн, васо тумэнди куч амарэ раёни барэдэр ԥрала.

 ¹⁴ Сар и раёни барэдэр ԥрала поможын лэ ӷуртонэнди? Акэ со росԥэнэн ек ԥрал анда Турцыя: «Кажно разо посли кода, сар амэндэ авэл о раёно барэдэр ԥрал, манди камэлпэ май бут тэ поможысарав лэ ԥралэнди и лэ ԥэянди. Каринг амэндэ авэнас разни раёни, и мандэ дажэ никала андо шэро на сас, кай вонэ фартэ заняти или лэндэ нинай время тэ подэн дума манца». Ай акэ со росԥэнэн и Ёхана, пала сави амэ ужэ дям дума. Еқвар вой жыля тэ росԥэнэн важ о Дэл вместе лэ раёноса, но каринг лэндэ нико на вижыля. Вой росԥэнэн: «Мэ никала на бистрава кодэва дес. Андэ кодэя время лэдуй мэрнэ ԥэя пэрэлаглэ пэ авэр краё, и мэ фартэ нудисаравас пала лэндэ. О раёно барэдэр ԥрал анда ди подритярдя ман. Во поможысардя манди тэ полав, кай када найпэдолӷонэстэ, и андо раё пэ ԥув мандэ авэна бут возможности тэ проандярав и время мэрнэ чаченца и друӷонэнца». Бут андар мэндэ тожэ моӷут тэ росԥэнэн, сар лэн подритярдя о раёно барэдэр ԥрал (Дила 20:37—21:1).

15. а) И раёни барэдэр ԥрала терэн бут дила важ амэндэ. Сар амэ можэм тэ сыкавас, кай цэнисарас када? (3 Иоано 5—8). (Кадяжэ диқэн и картинка.) б) Васо амэ цэнисарас лэ ԥралэндирэ хулаян и сар амэ можэм тэ сыкавас, кай блаӷодарни лэнди? (Диқэн и рамка  «На́ бистрэн пала лэндирэ хулая́».)

¹⁵ О апостало Иоано ԥэндя лэ Гаёсти тэ на парашэл тэ шол сама лэ ԥралэн, савэ авэнас тэ подритярэн о ӷурто, и мангля лэс: «Сти́дэ лэн андо дром кадя, сар када камлоп о Дэл». (Проадинон 3 Иоано 5—8.) Сар амэ можэм кадя жэ тэ шас сама кацавэ ԥралэн? Например, тэ ақарас лэ раёнонэ барэдэрэ ԥралэс пэстэ тэ хал или тэ авас пэ встречи важ и служэния, савэ во проандярэл. И Лэсли, пала сави сас ԥэндо андо 6-то абзацо, терэл най кати када. Вой ԥэнэн: «Мэ мангавпэ пала лэндэ лэ Иеговасти, кай во тэ дэл лэнди вся, со трэбуй. Амэ лэ хуласа кадяжэ пистросарас лэнди письморя и ԥэнас, сар дэ фартэ амэ цэнисарас  кода, со вонэ терэн важ амэндэ». Сэрэн, кай и раёни барэдэр ԥрала — када кацавэ жэ мануша, сар и амэ. Вонэ моӷут тэ насвавэн, тэ загрыжонпэ пала варисо, ай дэкала дажэ тэ умэкэн и вас. Тиро лашо алав или найбаро подарочко можэт тэ авэл ответо пэ лэндири молитва! (Прит. 12:25).

АМЭНДИ ФАРТЭ ТРЭБУЙ И ПОМОШНИКОРЯ АНДО ӶУРТО И БАРЭДЭР ԤРАЛА

16. Савэ вопросоря моӷут тэ задэн пэсти и ԥрала? (Притчи 3:27)

¹⁶ Па вся и люма амэнди трэбуй, кай тэ авэн инке май бут ԥрала, савэ лэна тэ заботинпэ пала ӷурто. Если ту болдо ԥрал, можэш ту тэ дэс зор? (Проадинон Притчи 3:27.) Старыиспэ ту тэ ашэс помошнико андо ӷурто? Ай если ту ужэ помошнико, старыиспэ ту тэ ашэс барэдэр ԥрал? c Можэш ту варисо тэ парувэс андэ пэстири жызня, кай тэ сытёс андэ Школа блаӷовестников Царства? Кадэя школа поможыя тути тэ авэс ӷотово каринг кодэя дила, сави можэт тэ дэл тути о Исусо. Если ту гиндос, кай на поджас важ кадэя дила, мангпэ лэ Иеговасти. Манг лэс тэ дэл тути свынто зор, кай тутэ тэ вижал тэ стерэс любо дила, сави тути дэна (Лука 11:13; Дила 20:28).

17. Андар со дицол, кай о Исусо Христос заботийпэ пала амэндэ?

¹⁷ О Исусо дя алав, кай авэла пэстирэ учениконэнца кажно дес, пока на поджала и время кадэла люмати (Матф. 28:20). И амэ драго диқас, кай во зритярэл пэско алав. Во дя амэнди «лэ манушэн сар блаӷословения» — лэ помошниконэн андо ӷурто и лэ барэдэрэ ԥралэн. Сар жэ амэ блаӷодарни амарэ Царёсти, кай во кадя любий амэн, шол сама и здиқэл пар мэндэ! Во дя амэнди кадэлэ ԥралэн, кай вонэ тэ заботинпэ пала амэндэ. Амэ камас, кай вонэ тэ ӷанэн, сар дэ фартэ амэ цэнисарас вся, со вонэ терэн важ амэндэ. Кочай давайте тэ ԥэнас лэнди пала када или варисар инке тэ сыкавас, кай блаӷодарни лэнди. И канешно, на́ бистрэн тэ андярэн лашо алав по Иегова, важ кода кай имено во терэл «всаворэ лашэ и идеальни подаркоря» (Иак. 1:17).