СТАТЬЯ ВАЖ И ИЗУЧЕНИЯ 43
ДИЛИ 90 Подритярэн ек еқэс
Со поможыя тэ на загрыжоспэ
«Андэ вся розлэнпэ» (1 ФЕС. 5:21).
АМЭ УӶАНАСА
Со тэ терас, если амэ лям тэ загрыжосавас, и када на дэл тэ терас лэ Иеговастири дила.
1, 2. а) Пала со можэт тэ загрыжойпэ лэ Иеговаско мануш? б) Со амэ роздиқаса андэ кадэя статья?
ВСАВОРЭ амэ — и тэрнэ, и ԥурэ, — дэкала можэм тэ загрыжосавас a. Например, погиндосар пала тэрно ԥрал, саво на допатял, кай о Иегова лэс шол сама. Лэстэ дажэ можэт тэ авэл гиндо: «Трэбуй мэ тоди тэ болдював?» Или погиндосар пала взросло ԥрал, саво андэ тэрнэ бэрша на ужыля андо затеримос, важ кода кай камэлас май бут тэ терэл лэ Иеговастири дила. Ай акана, кала лэстирэ ерести хутилэл ловэ кати по котор марно, во можэт тэ гиндой: «Чаче мэ витидэм правильно дром?» Кай и ԥурэ тожэ исин пэско ԥаримос. Например, кай и ԥэй, савятэ ужэ най во о зор, можэт тэ дуқал оди, кай вой не можэт тэ терэл кадя бут, сар варикала. Сас тумэндэ варикала кацавэ вопросоря: «Интересно мэрни жызня лэ Иеговасти? Трэбуй сас манди варикала тэ отԥэндював варисостар важ лэ Дэвлэстири дила? Диқэл во андэр мандэ варисаво толко?»
2 Пэ кацавэ гиндоря нащи тэ ԥандавас и яқа. Через лэндэ амэ можэм тэ хасарас о патяимос андо Иегова и дажэ тэ парашас тэ терас лэстири дила. Андэ кадэя статья амэ роздиқаса, сар и Библия поможый амэнди, если амэ на допатяс, кай: 1) лэ Иеговасти интересно амари жызня, 2) амарэ решэнии сас правильни и 3) амэ вся кадя жэ трэбуй лэ Иеговасти.
СО ПОМОЖЫЯ ТЭ НА ЗАГРЫЖОСАВАС
3. Со тэ терас, если лас тэ загрыжосавас?
3 Кала амэ лас тэ загрыжосавас, амэнди трэбуй тэ родас совето андэ Библия. Кадя амэ састяраса амари дружба лэ Иеговаса, ашаса май дэвликунэ мануша и на домэкаса, кай амаро патяимос тэ ашэл май слабо (1 Кр. 16:13)
4. Со сыкавэн и алава «Андэ вся розлэнпэ»? (1 Фесалоники 5:21).
4 Проадинон 1 Фесалоники 5:21. Шув сама, кай андэ Библия пистромэ: «Андэ вся розлэнпэ». Сар када можно тэ стерэс? Кай андэ варисостэ тэ патяс, спэрва уӷан, зжалпэ када ла Библияса чи най. Ԥэнэса, о тэрно шаворо на допатял, кай лэстири жызня интересно лэ Дэвлэсти. Но кода, кай лэсти андо шэро дя варисаво гиндо, инке на сыкавэл, кай када чаче кадя. Важ када лэсти трэбуй тэ ԥэрнавэл и Библия и тэ уӷанэн, сар о Иегова диқэл пэр лэстэ па чачимастэ.
5. Сар «тэ ашунэс» лэ Иеговаско ответо пэ пэско вопросо?
5 Кала амэ адиносарас и Библия, амэ ԥэнэса ашунас лэ Иеговаско ӷолосо. Но если ту камэс тэ полэс, со во гиндой пала варисаво вопросо, трэбуй тэ пристос зор. Родэ и библейски стихоря, савэ поджан каринг тири тема. Важ када розуӷан, со пистромэ андэ амарэ публикацыи (Прит. 2:3—6). Манг лэ Иеговас тэ поможый тути тэ родэс и тэ додиқэс лэско гиндо. Посли када ту можэш тэ подтидэс и библейски принцыпоря, савэ поджан каринг тири ситуацыя, ай кадяжэ тэ виарақэс лашэ советоря. Инке тути анэна лашымос, если ту май бут уӷанэса пала лэ Дэвлэстирэ мануша, пала савэ пистромэ андэ Библия и савэндэ и ситуацыя андэ жызня шоласпэ пэ тири.
6. Если амэ пала варисостэ загрыжосавас, сар поможый амэнди, кай амэ стидаспэ амарэ ӷуртоса?
6 Кадяжэ, о Иегова дэл дума амэнца, кала амэ стидаспэ лэ ӷуртоса. Если амэ на промэкас амарэ собрании, амэ можэм тэ ашунас о ответо пэ пэско вопросо, кала варико ԥэнэн речь или кала и ԥрала и ԥэя дэн ответоря пэ вопросоря (Прит. 27:17). Акана подам дума, пала со моӷут тэ загрыжонпэ лэ Дэвлэстирэ мануша.
ИНТЕРЕСНО ЛЭ ИЕГОВАСТИ МЭРНИ ЖЫЗНЯ?
7. Пала со дэкала загиндонпэ и мануша?
7 Сас тутэ варикала кацаво вопросо: «Интересно лэ Иеговасти мэрни жызня?» Если ту гиндос, кай нисо на ашэс, через када тути можэт тэ здэлпэ, кай просто невозможно тэ авэс лэ Дэвлэско друӷо. Можэт, кацаво по ди сас и кай о царё Давидо. Во дэлас наздив, кай о Иегова вобще шол сама пэ мануша, и еқвар пушля: «Иегова, ко кацаво о мануш, кай ту лэс тэ шос сама... саво на жувэл вечно, ай ту всаек пэр лэстэ шос сама?» (Пс. 144:3). Сар тэ уӷанэс, чаче пала тутэ заботийпэ о Иегова чи най?
8. Пэр со шол сама о Иегова, кала диқэл пэ мануша? (1 Самуила 16:6, 7, 10—12).
8 Анда Библия амэ уӷанас, кай о Иегова шол сама пэ всаворэ мануша, дажэ пэ кодэла, ко фартэ прости важ авэр. Например, еқвар во бишалдя лэ Самуилос каринг о Есеё, савэстэ сас восемь шавэ. О Дэл ԥэндя тэ мақэл вулееса о шэро еқэсти андар лэндэ, кай кадэва мануш тэ авэл витидо сар царё андо Израилё. О Есеё ақардя всаворэ́ пэстирэ шавэн, ай лэ цыкнэдэрэс, савэс ақарэнас Давидо, на ақардя b. Но имено лэс витидя о Иегова. (Проадинон 1 Самуила 16:6, 7, 10—12.) О Иегова диқэлас андо Давидо кода, со на диқэнас авэр, — кадэва ӷольтяй фартэ лэс любияс.
9. Андар со дицол, кай о Иегова драго ӷанэн тут? (Кадяжэ диқэн и картинка.)
9 Погиндосар пала кода, сар о Иегова сыкавэл, кай лэсти интересно тири жызня. Во дэл совето, саво трэбуй имено тути андэ тири ситуацыя (Пс. 32:8). Хэба када на сыкавэл, кай во фартэ драго ӷанэн тут? (Пс. 139:1). Кала ту прилэс лэ Иеговастирэ советоря и диқэс, кай вонэ чаче поможын, ту инке май драго лэса тэ диқэс лэско вас андэ пэстири жызня (1 Лет. 28:9; Дила 17:26, 27). О Дэл диқэл, кай ту пристос зор тэ терэс лэстири дила и тэ кандэс лэс. Лэсти куч тиро шукарно характеро, и во камэл тэ дружый туса (Иер. 17:10). Во ақарэл тут тэ авэс лэско друӷо и авэла лошало, если ту закамэса тэ ашэс май пашэ каринг лэстэ (1 Иоан. 4:19).
«Сар ту лэса тэ родэс... [лэ Иеговас], во домэкэла, кай ту тэ виарақэс лэс» (1 Лет. 28:9). (Диқэн о абзацо 9.) c
ЧАЧЕ МЭ ПРИЛЭМ ПРАВИЛЬНО РЕШЭНИЯ?
10. Пала со амэ можэм тэ загрыжосавас, кала згиндосарас пала кода, со сас?
10 Дэсавэ христианоря, савэ згиндон кода, со сас, лэн тэ загрыжонпэ пала пэстирэ решэнии, правильно вонэ вся стердэ чи най. Можэт, лэндэ сас лащи бути, и вонэ драго затерэнас. Но вонэ отԥэнделэ кадэлэстар, кай май бут тэ терэн лэ Дэвлэстири дила. И акэ прожылэ бут бэрша. Акана вонэ диқэн, кай и мануша, савэ ужылэ андо затеримос, жувэн и, сар здэлпэ, ни андэр со пэсти на отԥэнэн. Важ када вонэ моӷут тэ загрыжонпэ: «Правильно мэ стердэм, кай кода разо бут состар отԥэнделэм важ о Иегова? Или через када мэ умэклэм варисо андэ жызня?»
11. Состар сас ԥарэс по ди кодэлэсти, ко пистросардя о 73-то Псалом?
11 Если тумэндэ по ди кацаво жэ, тумэнди авелоп драго тэ роздиқэн о 73-то Псалом. Кодэлэстэ, ко пистросардя кадэва Псалом, сас кацави жэ ситуацыя андэ жызня. Во диқэлас, кай авэр мануша на терэн лэ Дэвлэстири дила, но всаек лэндэ лашо зор, вонэ барвалэ и, здэлпэ, жувэн бахталэс (Пс. 73:3—5, 12). Кала во диқэлас пэр лэндэ, лэсти здэласпэ, кай андэ лэстири жызня нинай нисаво смысло. Кацавэ гиндонэндар во фартэ мучияспэ (Пс. 73:13, 14). Со лэсти поможысардя лэн тэ бирой?
12. Со поможысардя еқэ лэ Дэвлэстирэ манушэсти тэ бирой и ԥарэ гиндоря? (Псалом 73:16—18).
12 Проадинон Псалом 73:16—18. Кодэва, ко пистросардя кадэва Псалом, зажыля андэ лэ Иеговаско цэр. Котэ, машкар лэ Иеговаско народо, во додя, сар вся исин па чачимастэ. Во поля, кай, хоть кодэла мануша щас жувэн и раюин, англэ лэн на аштярэл нисаво лашымос. Во пар пэстэ поля, кай стердя правильно, кала стодя лэ Иеговастири дила по пэрво ҭан андэ пэстири жызня. И када лэс подритярдя. Через када лэстэ сас зор тэ на парашэл тэ терэл лэ Иеговастири дила (Пс. 73:23—28).
13. Со тэ терэс, если ту пережываеш, кай прилян неправильно решэния? (Кадяжэ диқэн и картинка.)
13 Если ту пережываеш пала кода, со витидянас варикала, со поможыя тути, кай по ди тэ ашэл спокойно? Погиндосар пала вся лашо, со тутэ исин, и пала кода, саво ту дэ барвало, кай чалёс лэ Иеговасти! Ай со аштярэл лэ манушэн, савэ на терэн лэ Дэвлэстири дила? Вся, со вонэ камэн и пэр со надеинпэ, сԥангло кати кадэла люмаса. Кочай лащи бути и раимос андэ жызня — када вся, со лэндэ можэт тэ авэл. Ай амэн аштярэл пэбутэстэ май бут подаркоря лэ Иеговастар (Пс. 145:16). Тай инке амэ не можэм точно тэ ӷанас, сави авелоп амэндэ жызня, тэ прилиноп амэ авэр решэния. Но амэ полас ек: если амэ прилас решэнии через кода, кай любисарас лэ Иеговас и лэ манушэн, када точно анэна каринг и чачуни бах.
Со май часто гиндосар пала райкани жызня, сави дэла тути о Иегова. (Диқэн о абзацо 13.) d
ВСЯ КАДЯ ЖЭ МЭ ТРЭБУЙ ЛЭ ИЕГОВАСТИ?
14. Саво ԥаримос исин кай дэсавэ христианоря и саво вопросо лэндэ можэт тэ авэл?
14 Через и ԥурэ бэрша, найлашо зор или насвалимос дэсавэ лэ Иеговастирэ мануша ужэ не моӷут тэ терэн кадя жэ бут, сар варикала. Лэндэ по ди можэт тэ авэл кацаво, кай лэндар нинай нисаво толко, и вонэ моӷут тэ пушэн: «Хэба трэбуй мэ кацаво лэ Иеговасти?»
15. Андэр со патялас ек лэ Дэвлэско мануш?
15 Кодэва, ко пистросардя о 71-во Псалом, пережывал пала кода жэ. Во мангэласпэ: «На́ ашав ман, кала мандэ на авэла зор» (Пс. 71:9, 18). Хоть кадэва лэ Дэвлэско мануш вимарделя анда зор, во всаек патялас, кай, если во на парашэл тэ кандэл лэ Дэвлэс, лэско Друӷо лэла тэ подритярэл лэс. И о Иегова на паруделя: важ лэстэ важно най скати амэндэ зор, ай сар амэ лэс тратисарас (Пс. 37:23—25).
16. Со и ԥурэ ԥрала и ԥэя моӷут тэ терэн важ о Иегова и важ авэр? (Псалом 92:12—15).
16 Амарэ ԥурэ, тумэ амэнди фартэ куч! Старыинпэ тэ диқэн пэр пэстэ лэ Иеговастирэ яқэнца. На́ бистрэн, кай о Иегова поможый тумэнди вся и время, скати тумэнди тэ на авэл бэрш и саво зор тумэндэ тэ на авэл. (Проадинон Псалом 92:12—15.) На́ гиндон пала кода, со тумэ щас не можэте тэ терэн. Фэдэр май бут шон сама пэ кода, со инке па тумаро зор. Кода, кай тумэ на парашэн тэ терэн лэ Дэвлэстири дила, ужэ придэл баро зор лэ ԥралэнди и лэ ԥэянди. Кадяжэ тумэ можэте тэ подритярэн лэн, кала шон сама кажнонэс андар лэндэ. Росԥэнэн лэнди, сар о Иегова поможыяс тумэнди вся тумари жызня и со тумэ со май фартэ аштярэн андо раё пэ ԥув. И вонэ авэна фартэ блаӷодарни, если тумэ лэна тэ мангэнпэ пала лэндэ! (1 Пёт. 3:12). Андэ любо ситуацыя кажно андар мэндэ можэт варисо тэ терэл важ о Иегова и важ авэр.
17. Васо на трэбуй тэ сыстос пэс аврэнца?
17 Если тути здэлпэ, кай ту терэс важ о Иегова фартэ набут, на́ умэк и вас. Во цэний вся, со ту терэс. Можэт, ту сыстос пэс аврэнца. На́ тер кадя. О Иегова тут никаса на сыстой (Гал. 6:4). Погиндосар акэ пала со: и Мария подарисардя лэ Исусости кучутно ароматно вулей (Иоан. 12:3—5). Ай и чороры ԥивли отдя важ лэ Дэвлэстири дила кати дуй хурдорэ манетки (Лука 21:1—4). Но о Исусо на сыстояс кадэлэ дуе жувлян. Важ лэстэ сас куч най лэ подаркостири цэмин, ай лэнго патяимос. О Иегова диқэл пэ пэстирэ мануша кадя жэ. Ту любис лэс и патяс лэсти, важ када вся, со ту терэс важ лэстэ, най евья андэ лэстирэ яқа. Лэсти када фартэ куч!
18. Если амэ пала варисостэ загрыжосавас, со амэнди можэт тэ поможый? (Кадяжэ диқэн и рамка «Лэ Иеговастирэ алава поможына тути будэр тэ загрыжоспэ».)
18 Всаворэ амэ дэкала лас тэ загрыжосавас пала варисостэ. Сар амэ диқлям, и Библия поможый амэнди тэ биросарас кацавэ гиндоря. Родэн андэр латэ ответоря пэ пэстирэ вопросоря, и тоди тумэ лэна май састэс тэ патян — тэ патян, кай лэ Иеговасти интересно тумари жызня. Кадяжэ тэ патян, кай во цэний вся, пэр со тумэ жан важ лэстэ, и точно дэла тумэнди бут лашымос. И сэрэн: о Иегова всаворэ́ одеса любий всаворэн пэстирэ кандинэ помошниконэн и заботийпэ пала лэндэ.
ДИЛИ 111 Амари радость
a ОБЪЯСНЕНИЯ. Андэ кадэя статья ԥэнэнпэ важ и мануша, савэ загрыжонпэ пала кода, кай о Иегова лэн на цэний или кай вонэ прилинэ неправильни решэнии. Кадэла гиндоря на сыкавэн, кай о мануш на патял андо Иегова и андэ кода, кай во зритярэла пэско алав.
b Хоть андэ Библия на ԥэнэнпэ, скати лэ Давидости сас бэрш, кала о Иегова лэс витидя, во, наверно, инке сас тэрноро. (Диқэн «Сторожэво башня» пала 1 сентябрё 2011 бэрш, страница 29, абзацо 2, пэ руско шыб.)
