И ԥрала анда Вефилё ужэ май бут бэршэстар строинас здания важ о радио WBBR по острово Ста́тэно андо Нью-Йорко. Вонэ вишындэ и витки, строисардэ баро цэр важ и бутярнэ и инке ек здания важ и студия. Кала вся сас стердо, и ԥрала линэ тэ стон техника важ о радио. Но най вся сас кадя вушэро.

Сас фартэ ԥарэс тэ ваздэн и ӷлавно антэна важ и радиостанцыя. Вой сас андо лунгимос май бут чем 90 метроря, и ла трэбуй сас тэ амблавэн машкар дуй барэ кашта, савэ сас андо вучимос май бут чем 60 метроря. Пэрво разо кай и ԥрала нисо на вижыля. Но вонэ на здэнаспэ, и лэ Иеговастирэ зорэса лэндэ вся получисайля. О Ка́лвино Про́сэро, саво терэлас котэ, потом ԥэнэнас: «Тэ стердоп амэ вся важ еқварэс, амэ завазглоп о нак и ԥэндоп ек еқэсти: „Савэ жэ амэ хамаря сам!“». И ԥрала сэрэнас, кай лэндэ вся вижыля кати лэ Иеговаса. Но сас и авэр ԥаримос.

Андэ кодэя время о радио кати залэласпэ. Нащи сас просто тэ жас андо маӷазино и тэ тинэс гата техника. Но и ԥрала смоӷли тэ виарақэн найдур передатчико, саво варико стердя екжэно, и тэ тинэн лэс па вас; во сас фартэ мощно. Ай о микрофоно вонэ вилинэ анда обычно телефоно. Еқвар ӥвэндэ, ужэ вечером, и ԥрала закамлэ тэ диқэн, со лэндэ вижыля. Лэнди трэбуй сас варисоса тэ вижан андо эфиро, и вонэ витидэ лэ Царствостирэ диля. О Ернэ́сто Ло́у росԥэндя, сар прожыля лэнго пэрво эфиро: «Кала дилабэнас и диля, андэ студия  позвонисардя о сындомари b Рутэрфордо. Во сас андо Бруклино (када варикай 25 километроря) и ашунэнас кадэя пэрво передача.

«Помударэн вся када, — ԥэндя о Рутэрфордо. — Тумэ евчин сар мыцы!» И ԥрала ӥто вся мудардэ. Канешно, лэнди сас лажаво кацавэ алавэндар, но вонэ полинэ, кай и техника терэл и кай вонэ ӷотови тэ вижан андо эфиро.

Андо 24 февралё 1924 бэрш сас и пэрво передача. Тоди о ԥрал Рутэрфордо ԥэндя, кай кадэя радиостанцыя авэла «важ лэ Избранонэстирэ Царствости дила». Во ԥэндя, кай латири цэль — «тэ поможый всаворэ манушэнди, андэ сави бы вера вонэ тэ на авэн, май драго тэ уӷанэн и Библия и тэ полэн, сави щас жал время».

И пэрво передача прожыля фартэ драго. Инке май бут чем 30 бэрш лэ Иеговаско народо через и радиостанцыя WBBR росԥэнэнас и новость важ лэ Дэвлэско Царство.

Андо июлё 1924 бэрш и Библейски иследователя стидэ́пэ по канӷрэсо андо Калу́мбусо (штато Ага́ё). Вонэ авелэ анда разни краёря па вся и ԥув. И речи ԥэнэнас пэ английско, арабско, венгерско, греческо, итальянско, литовско, немецко, польско, руско, украинско, французско, ай кадяжэ пэ скандинавски шыба. Дэсавэ речи пэрэдэнас па радио. Кадяжэ и ԥрала манглэ, кай андэ катутни ӷазета кажно дес тэ пистрон пала кода, со терэласпэ по канӷрэсо.

В четверг, 24 июля, май бут чем 5 000 ԥрала и ԥэя жылэ тэ росԥэнэн пала Дэл. Вонэ роздинэ почти 30 000 книжки и залинэ тэ проандярэн тысячи изучении. Андэ «Сторожэво башня» пэ кадэва дес сас ԥэндо «само радосно часть по канӷрэсо».

Инке ек важно события тердяпэ в пятницу, 25 июля. О ԥрал Рутэрфордо заадиносардя о тексто, андэ саво сас би дарако пистромэ пала дош против барэ мануша анда авэр веры. Када сас пистросардо сар юридическо лил. Андэр лэстэ ԥэнэнаспэ, кай и барэ мануша андэ политика, андэ веры и андэ камерцыя «на дэн лэ манушэнди тэ уӷанэн пала лашымос, саво анэна лэ Дэвлэско Царство». Ай инке андэ кадэва лил сас ԥэндо, кай кадэла мануша «подритярдэ и Лига Нацый и ԥэндэ, кай када — „лэ Дэвлэско  Царство пэ ԥув“». И Библейски иследователя трэбуй сас тэ авэн фартэ смили, кай тэ жан и тэ росԥэнэн пала када.

Ӷэт май интя андэ «Сторожэво башня» ԥэнэнаспэ: «Лэ Барэ Хуласко найбаро войско, саво стидяпэ андо Калумбусо, ашэля инке май састо андо патяимос... ...Акана лэн на пэрэдаравэна ни и мануша, ни лэ вороӷостирэ росԥабардэ стрелы». О Ле́о Кла́усо, саво сас пэ кодэва канӷрэсо, росԥэнэн: «Кала амэ ужасастар, амарэ одя ԥабонас, кай тэ росԥэнас всаворэ́ манушэнди пэ амарэ краёря пала кода, со амэ ашундям».

О тексто, саво о ԥрал Рутэрфордо заадиносардя по канӷрэсо, сас пистромэ андэ листовка «Дош пэ рашая». Сас вимэклэ милионоря кацавэ листовки, и андо октябрё и Библейски иследователя линэ лэн тэ роздэн. Андо найбаро форицо Кли́влендо (штато Аклахо́ма) о Фрэ́нко Джо́нсано закончил тэ росԥэнэн пала Дэл пэ пэско участко. Но лэстэ сас инке 20 минут англа кода, сар пала лэстэ тэ авэл и машына. Сас опасно просто тэ тердёл аврял и тэ аштярэл. Через кода, со во росԥэнэнас, и мануша котэ фартэ холяйлэ и ужэ родэнас лэс. О ԥрал Джонсано гараделя андэ қандири, сави сас найдур. Андэр латэ нико на сас, и во постодя и листовки «Дош пэ рашая» андэ лэ рашастири Библия и пэ кажно сидения. О Фрэнко стердя када фартэ ӥто. Лэстэ инке ашэласпэ набут время, и во стердя кадя жэ и андэ авэр дуй қандиря.

Посли када о Фрэнко прастая интя, кай трэбуй сас тэ диқэлпэ лэ ԥралэнца, и гараделя пала заправка. Котар во додиқля, кай и мурша, савэ пала лэстэ ӷонинаспэ, пролаглэ мимо и на додиқлэ лэс. Ӥто подлаглэ и ԥрала, во захукля лэндэ андэ машына, и вонэ улаглэтар.

«Па дром анда форо, — ԥэнэн ек анда ԥрала, — амэ диқлям кодэла трин қандиря. Англа кажно тердёлас варикай по 50 человек. Дэсавэ адинонас и листовка, ай варико сыкавэлас ла лэ рашасти. Тэ попэрделоп амэ андэ лэндирэ вас, амэнди драго дорэслопэ! Амэ блаӷодарни лэ Иеговасти важ кода, кай во поможысардя амэнди тэ стерас лэстири дила ворта англа лэнго нак».

И Библейски иследователя андэ авэр страны сас кацавэ жэ смили. По северо андэ Францыя о Ю́зэфо Кре́то росԥэнэнас пала Дэл кодэлэнди, ко пэрэлагля анда Польша и терэлас пэ шахты. Во камэлас тэ ԥэнэн и речь «Ӥто и мулэ ринапэ каринг и жызня». И ԥрала и ԥэя поможынас лэсти и ақарэнас лэ манушэн пэ кадэя речь. Кала важ када уӷангля о рашай, во ԥэндя лэ манушэнди анда қандири, кай вонэ интя тэ на жан. Но кадэлэстар лэ манушэнди наоборот ашэля май интересно. Май бут чем 5 000 мануша авелэ тэ ашунэн амарэ ԥралэс, и авеля дажэ кодэва рашай. О Юзэфо ԥэндя лэсти, кай если во камэл, во можэт тэ доԥэнэн кода, андэр со патял, но о рашай отԥэнделя. Посли пэстири речь о ԥрал Крето роздя вся и литература, сави лэстэ сас пэса. Дицолас, кай кадэла мануша сас боқалэ би лэ Дэвлэско (Ам. 8:11).

О Кло́до Бра́уно авеля тэ росԥэнэн важ о Дэл андэ Африка, андэ страна, пэ сави щас ԥэнэн Га́на (андэ кодэя время Сомнакуно Береӷо). Во ԥэнэнас речи, роздэлас и литература, и через када бут мануша ашундэ о чачимос. О Джо́но Бла́нксоно, саво сытёлас по фармацэвто, авеля пэ речь, сави ԥэнэнас о ԥрал Брауно. Во сразу поля, кай када о чачимос. Во ԥэнэн: «Мэрно ди ԥаболас через о чачимос. Мэ на  ашавас мулком и росԥэнавас пала лэстэ всаворэнди, каса сытювавас».

Анда Библия о Джоно уӷангля, кай о Дэл — када най Троица. Важ када во жыля андэ Англиканско қандири, кай тэ роспушэл пала када лэ рашас. Но кодэва вишутя лэс анда қандири и дя кырлэса пэр лэстэ: «Ту най христианино, ту лэ Бэнгэско слуӷо! Завиисав катар!»

Кала о Джоно авеля цэрэ, во пистросардя лэ рашасти и ақардя лэс тэ диқэнпэ и англа всаворэ тэ розлэн о вопросо пала Троица. Пэ када о рашай приԥэндя лэ Джоности тэ авэл кай о барэдэр учителё. Кала о Джоно авеля лэстэ, во пушля, чаче во пистросардя лэ рашасти чи най.

— Да, — ԥэндя о Джоно.

О учителё ԥэндя лэ Джоности тэ пистрой лэ рашасти и тэ мангэл извинения. Важ када о Джоно пистросардя:

«Мэрно учителё мангля ман тэ мангав извинения. И мэ ӷотово када тэ стерав, если прижанэса, кай сытярэс лэ хохаимасти».

— Бланксоно, ту чаче камэс када тэ пистрос? — пушля о учителё.

— Да, мэ камав тэ пистросарав чачимос.

— Тут жэ сразу вишона катар. Ту жэ полэс, кай тутэ на вижала тэ сытёс катэ и тэ жас против о рашай анда ӷлавно қандири андэ страна?

— Но, учителё, кала амэ пэ тирэ урокоря варисо на дополас, амэ жэ можэм тэ задас вопросоря?

— Ни ай сар, канешно можэте.

— Имено када мэ и стердэм. Кодэва мануш сытярэлас амэн па Библия, и мэ задэм лэсти вопросо. Если во нащи ответит пэр лэстэ, васо мэ трэбуй тэ мангав извинения?

Лэ Бланксонос на вишутэ, хоть во и на пистросардя нисаво письмо.

Андо декабрё андэ «Сторожэво башня» сас пистромэ: «Амэ полностью соӷласни кодэлэса, со ԥэндя о Давидо: „Ту дэса манди зор тэ маравпэ“ (Псалом 18:39). Саво жэ дэ райкано сас кадэва бэрш! Амэндэ вся вижалас, важ кода кай амэнца сас лэ Барэ Хуласко вас... Лэстирэ кандинэ помошникоря... лошаса росԥэнэнас важ лэстэ».

Кала заканчивался о бэрш, и ԥрала закамлэ тэ строин инке ек радиостанцыя паша Чикаго. Лати приԥэндэ WORD, со значит «алав». Кадэя названия драго поджалас, важ кода кай через кадэя радиостанцыя о Алав лэ Дэвлэстар ля тэ ашундёл инке май фартэ. Пэ кадэва разо и ԥрала использовали май мощно техника, сави дэлас возможность тэ пэрэдэн лэ манушэнди и новость пала Царство инке май дур, дажэ андэ Канада.

Андо 1925 бэрш о Иегова поможысардя тэ полас май драго и алава анда 12-то ӷлава Свынто Тайна. Най всаворэнди чалеля, сар амэ лям тэ полас кадэя ӷлава, и вонэ дажэ парашэлэ тэ терэн лэ Иеговастири дила. Но май бут анда ԥрала обрадосайлэ. Вонэ инке май драго полинэ, со тердяпэ по небо и сар када влияет пэ лэ Дэвлэско народо пэ ԥув.