И ИЗРАИЛЬТЯНОРЯ фартэ любинас и музыка. Андэ Библия часто ԥэнэнпэ пала мануша, савэ дилабэнас пэ инструменторя и анда муй. Па чачимастэ 10 процэнторя андэ Библия — када и диля. Само ашунглэ андар лэндэ — када Псалмы, Песня Соломона и Плач Иеремии. Андэ ек книжка пала библейско время ԥэнэнпэ: «И Библия драго сыкавэл, кай почти андэ вся лэ израильтянонэндири жызня сас и музыка» a.

Музыка кажно дес. Через и музыка и израильтяноря сыкавэнас, со лэндэ сас по ди (Ис. 30:29). Кала о царё трэбуй сас тэ бэшэл по троно, кала побединас пэ война и пэ празникоря и жувля дилабэнас пэ бубны, лошаса дилабэнас анда муй и цэлэнас (Суд. 11:34; 1 Сам. 18:6, 7; 1 Цар. 1:39, 40). Ай кала варико мэрэлас, и израильтяноря сыкавэнас пэстири дук и о ԥаримос через и диля (2 Лет. 35:25). Сар ԥэнэнпэ андэ ек инцыклопедия, «и евреёря сас фартэ музыкально народо».

Музыка андэ лэ царёско дворецо. И израильски царёря фартэ любинас музыка. О Сауло стодя лэ Давидос тэ дилабэл лэсти пэ арфа (1 Сам. 16:18, 23). Кала о Давидо екжэно ашэля царё, во терэлас музыкальни инструменторя, пистрояс диля и стидя ӷрупа анда музыканторя, сави ӷэт май интя дилабэлас андэ лэ Иеговастири қандири (2 Лет. 7:6; Ам. 6:5). Ай андо дворецо кай о Соломоно дилабэнас жувля и мурша (Эккл. 2:8).

Музыка андэ лэ Дэвлэстири дила. И музыка сас важно, кай о миро тэ андярэл лэ Иеговастири время. Амэ ӷанас, кай андэ Иерусалимско қандири сас 4000 музыканторя (1 Лет. 23:5). Вонэ дилабэнас пэ музыкальни трубы, кимвалоря, арфы и авэр инструменторя, пэ савэ исин струны (2 Лет. 5:12). Но най кати кадэла мануша, савэ ӷанэнас драго тэ дилабэн, хвалинас лэ Иеговас через и музыка. Кала и израильтяноря кажно бэрш жанас андо Иерусалимо по празнико, вонэ тожэ дилабэнас диля (Пс. 120—134). Ай сар дицол анда иудейски лила, кала и израильтяноря справинас и Патради, вонэ дилабэнас диля Халело b.

И музыка идоси фартэ важно важ лэ Дэвлэско народо (Иак. 5:13). Кала амэ дилабас диля, амэ хвалисарас лэ Иеговас (Еф. 5:19). Через и музыка амэ ашас май пашэ каринг и ԥрала и ԥэя (Кол. 3:16). Кадяжэ вой поможый амэнди тэ пэрэандярас о ԥаримос (Дила 16:25). Сар дэ драго, кай амэндэ исин музыка! Через латэ амэ можэм тэ сыкавас, кай патяс андо Иегова и любисарас лэс.