Через ла қандиряко каридоро зажанас андэ Свынто комната. Андо «Нэвя люмако переводо», саво вимэклэ жы каринг о 2023 бэрш, ԥэнэнпэ: «О каридоро англа цэр сас 20 куя андо лунгимос, и када сас еқэндар лэ цэрэстирэ буӷлимаса, ай кадяжэ во сас 120 куя андо вучимос» (2 Лет. 3:4). Андэ авэр ла Библиятирэ переводоря пистромэ кацави жэ цыфра — «120 куя». Если када кадя, тоди вижал, кай андо вучимос кадэя башня сас 53 метроря!

Но после 2023 бэрш андо «Нэвя люмако переводо» акана пистромэ, кай о каридоро андэ лэ Саламоностири қандири «сас 20 куя андо вучимос» a (или варикай 9 метроря). Акэ васо када сас парудо.

Андэ 1 Царей 6:3 на ԥэнэнпэ, савэ вучимаса сас о каридоро. О Еремия, саво пистросардя лэ Царёнэндирэ книжки, пистрой андэ кадэва стихо, саво кай о каридоро сас лунгимос и буӷлимос, но нисо на ԥэнэн пала вучимос. Тоди, андэ авэр ӷлава, во фартэ подробно росԥэнэн, со сас андэ қандири. Например, во ԥэнэн пала круӷло моря анда вишуто састри, пала дэш тачки и пала дуй харкумунэ столборя, савэ тердёнас англа каридоро (1 Цар. 7:15—37). Если о каридоро чаче сас вучимаса май бут чем 50 метроря и сас май вучо, чем вся и қандири, васо о Еремия на ԥэндя пала када? И дажэ через фартэ бут бэрша и еврейски учони на пистронас, кай о каридоро сас май вучо, чем лэ Саламоностири қандири.

Тэ авелоп о каридоро андо вучимос 120 куя, лэстирэ стины на виритярдоп. Андэ дэлмутни время, кала строинас анда бар и анда кирпичо вуче цэра или авэр варисо, например ла қандирятирэ вороты андо Египто, лэн тэлэ терэнас май буӷлэс чем упрэ. Но лэ Саламоностири қандири сас строимэ па аврятэ. И учони гиндон, кай латирэ стины сас най май ҭулэ чем 6 куя (или 2,7 метроря). Важ када ек учоно, савэс ақарэн Тя́доро Бу́синко, ԥэнэн: «Па кода, савэ сас и стины кай о каридоро, лэско вучимос нисар на авелоп 120 куя».

И мануша, савэ терэнас копии, моӷли тэ шылинпэ андэ 2 Летопись 3:4. Андэ дэсавэ пуранэ тексторя андэ кадэва стихо пистромэ «120». Ай андэ авэр ашунглэ лила, например андо Александрийско кодэксо (сас стердо андо 5-то вико а. э.) и Амвросянско кодэксо (сас стердо андо 6-то вико а. э.), андэ кадэва стихо пистромэ «20 куя». Васо кодэва, ко терэлас копии, моӷ тэ шылийпэ и тэ пистрой «120»? Андэ еврейско шыб «120» пистройпэ сар «сто и двацать», ай «20 куя» — сар «куя двацать». И алава «сто» и «куя» фартэ шонпэ, важ када о мануш, саво терэлас копии, моӷ тэ пистрой «сто и двацать», ай най «куя двацать».

Канешно, амэнди интересно тэ уӷанас кацавэ маменторя и амэ старысавас со май точно тэ сыкавас, сави сас лэ Саламоностири қандири. Но май важно важ амэндэ кода, кай кадэя қандири сыкавэлас, сави авэла и ашунгли дэвликуни қандири. Сар жэ амэ блаӷодарни лэ Иеговасти, кай можэм тэ тэлювас лэсти андэ кадэя қандири! (Евр. 9:11—14; Тайна 3:12; 7:9—17).