«Пала со тумэ тэ на манглоп лэ Дадэстар через мэрно алав, во дэла тумэнди» (Иоанна 16:23).

Анда лэ Иисусостирэ алава дицол, кай о Иегова камэл, кай амэ тэ мангаспэ кати лэсти, ай най лэ масхарянди, лэ свынтонэ манушэнди, лэ анӷелонэнди или лэ мулэнди. И тэ мангаспэ трэбуй через о Иисус Христос. Кала амэ мангаспэ лэ Иеговасти через о Иисусо, амэ прижанас, кай би лэ Иисусоско о Дэл на ашунглоп амарэ молитвы. Екжэно о Иисусо ԥэндя: «Нико на авэл каринг мэрно Дад па аврятэ, сар кати через мандэ» (Иоанна 14:6).

«Росԥэнэн вся, со тумэндэ по ди» (Псалом 62:8).

Кала ту мангэспэ лэ Иеговасти, ту трэбуй тэ дэс дума лэса, сар пэстирэ дадэса. Вместо кода, кай тэ адинос и молитва или тэ ԥэнэс кода, со висытелян, тути трэбуй тэ росԥэнэс кода, со тутэ по ди, и тэ терэс када пативалэс.

«Со бы амэ тэ на мангас лэ Дэвлэстар, во ашунэл амэн, если мангас кода, со сжалпэ лэстиря времяса» (1 Иоанна 5:14).

Андэ Библия росԥэнэнпэ, со о Дэл Иегова камэл тэ стерэл важ и мануша и со во аштярэл амэндар. Кай амарэ молитвы тэ чалён лэ Дэвлэсти, амэ трэбуй тэ мангаспэ пала кода, со во камэл. Ай кай май драго тэ уӷанас лэ Дэвлэс и лэстири время, амэнди трэбуй тэ сытювас па Библия. Тоди амарэ молитвы анэна лэсти радость.

Мангпэ пала кода, со тути трэбуй. Амэ можэм тэ мангаспэ лэ Дэвлэсти, кай тэ авэл со тэ хас, со тэ лас пэр пэстэ и кай тэ жувас. Кадяжэ амэ можэм тэ мангаспэ пала мудрость, кай тэ прилас правильни ришэнии, и пала зор, кай тэ пэрэандярас о ԥаримос. Инке амэ можэм тэ мангаспэ, кай май фартэ тэ патяс и кай о Дэл тэ простий амэн, ай кадяжэ, кай во тэ дэл амэнди помощь (Луки 11:3, 4, 13; Иакова 1:5, 17).

Мангпэ пала авэр мануша. Лэ родителёнэнди чалёл, кала лэндирэ бэяцэ ладин машкар пэстэ. Кадяжэ и лэ Иеговасти чалёл, кала амэ, лэстирэ бэяцэ, драго обжаспэ ек еқэса. Важ када ту можэш тэ мангэспэ пала тиро хулай или хулаи, пала бэяцэ и пала друӷоря. Андэ Библия ԥэнэнпэ: «Мангэнпэ пала ек еқэстэ» (Иакова 5:16).

Ԥэн лэ Дэвлэсти наис. Андэ Библия пала амаро Создателё ԥэнэнпэ, кай во терэл амэнди лашимос, бишалэл па нэбо брышын, дэл уражаё андэ пэсти время, дэл со тэ хас и ԥэрэл амарэ одя лошаса (Деяния 14:17). Кала амэ шас сама пэ вся о шукаримос, саво стердя важ амэндэ о Дэл, амэнди камэлпэ тэ ԥэнас лэсти наис. Инке сар амэ можэм тэ сыкавас пэстири блаӷодарность лэ Дэвлэсти, када тэ андярас лэстири время (Колоссянам 3:15).

Если амэ мангаспэ анда оди, но о Дэл най сразу дэл атвето пэ амари молитва, амэ можэм тэ умэкас и вас. Чаче о Дэл на шол сама пэ амарэ молитвы? Най, када най кадя! Давай роздиқаса дэсавэ примероря, савэ сыкавэн, кай дэкала трэбуй просто тэ на сдэспэ и тэ на парашэс тэ мангэспэ.

О Стиво, пала саво ԥэнэнаспэ андэ пэрво статья, ля тэ сытёл па Библия и уӷангля, кай трэбуй тэ на парашэл тэ мангэлпэ. Во ԥэнэн: «Если бы най и молитва, мэ ужэ дэлмут умэклоп и вас и на ӷанглоп, состэ тэ жував. Мэ блаӷодарно лэ Дэвлэсти, кай манди поможын мэрнэ друӷоря. Акана мэ фартэ бахтало».

Ай акэ со ԥэнэн и Дженни, сави гиндояс, кай вой нэдостойно, кай ла тэ ашунэл о Дэл: «Андэ фартэ ԥари время мэ мангавас лэ Дэвлэс тэ поможый манди тэ полав, васо мэ кадя вэрыто пала пэс гиндосарав». Сар лати поможысардя и молитва? Акэ со вой росԥэнэн: «И молитвы поможысардэ манди тэ полав, сар пэр мандэ диқэл о Дэл. Мэ полэм, кай дажэ если ман дошалярэл мэрно ди, када на сыкавэл, кай ман дошалярэл о Дэл. И молитвы кадяжэ поможысардэ манди тэ на сдавпэ и тэ борисавав вэрытонэ гиндонэнца». Со кадэлэстар вижыля? И Дженни ԥэнэн: «Через и молитвы мэ полэм, кай о Иегова чаче исин. Во любий ман и заботийпэ пала мандэ. Во мэрно Дад и Друӷо, саво вся и время пашэ и ӷотово тэ поможый. Ай мандар трэбуй кати тэ терав кода, со во мангэл».

Ай акэ со сас кай и Изабель. Кала вой аштярэлас тэ анэн бэятос, и врачоря ԥэндэ лати, кай о бэято арақадёла насвало. Важ латэ када сас шоко. Дэсавэ дажэ ԥэнэнас лати, кай вой тэ стерэл аборто. И Изабель ԥэнэн: «Манди здэласпэ, кай мэрно ди на виритярэла кацаво ԥаримос». Со лати поможысардя? Вой росԥэнэн: «Мэ на парашавас тэ мангавпэ. Мэ мангавас лэ Дэвлэстар помощь». Вой андя шавэс, савэсти приԥэндэ Жерард. Во арақаделя насвало. Ԥэнэн ли и Изабель, кай о Дэл дя атвето пэ латирэ молитвы? Да! Вой росԥэнэн: «Важ мандэ само лашо атвето пэ мэрнэ молитвы, када, кала мэ диқав, сар мэрно шаво, савэсти 14 лет, лошавэл ла жызняти, хоть во и инвалидо. Лэ Дэвлэско атвето пэ мэрнэ молитвы, када само райкано подарко, саво во важ мандэ стердя».

Кода, со росԥэндэ о Стиво, и Дженни и Изабель, шолпэ пэ кода, со ԥэндя о псалмопевцо. Акэ лэстирэ алава: «Иегова, ту ашунэса, кала тутар мангэна ковлэ одестирэ мануша. Ту дэса, кай лэндирэ одя тэ авэн смили и шоса сама пэр лэндэ» (Псалом 10:17). Вся када драго сыкавэл, пэскати дэ важно тэ на парашас тэ мангаспэ!

Андэ Библия запистромэ бут лэ Иисусостирэ молитвы. Само ашунгли андар лэндэ, када и молитва, пэ сави ԥэнэн Отче наш. Сости сытярэл амэн кадэя молитва?